Chapter 23

Tinitigan ni Chyna si Ira, warning her na 'wag makipag-inuman pero wa epek.

"Malamig kasi, makakabawas 'yun sa ginaw sa katawan...," pangangatwiran ni Ira at agad na nakiupo malapit sa mga matatanda.

Tuloy-tuloy ang tinginan at pakiramdaman namin. May simpleng komunikasyon na nabuo sa mga titigan na iyon.

"Sige, tagay rin ako, 'Tay...," pakikisali ni Marissa na nakasimple ng pag-apruba ni Ian.

Gusto man ni Ian makitagay kahit isa, nag-aalala siya sa sarili na baka masarapan siya sa lambanog at mawili. Alam niyang siya ang pinakamalakas sa mga lalake at kailangan siya in case may di man magandang mangyari.

Tumayo naman si Emong at Max upang makisali rin sa tagayan. Ito ay upang hindi makahalata ang matatanda na may pag-aalangan kami sa lugar at sa ilan sa kanila lalo kay Mang Hamin na tahimik lamang pagdating nila.

Sa bagay na ito ako proud sa aming magpipinsan, sa tinginan pa lang, nagkakabasahan na. Kung sisiyasatin mo, sa galaw lamang at direksyon ng mata ang aming mga ginawa ngunit nagkahulihan na kami ng nais ipahiwatig sa isa't isa.

Nais ko man, palitan si Brix o Chadie sa pagbabantay ng siga, hindi naman ako makagalaw na ang mga hita ko ang ginawang unan ni Jing-Jing sa pagtulog.

Sa sitwasyong iyon, ramdam ko ang pagiging alerto ng mga lalake sa grupo sa takot na baka may mangyari sa mga babae.

Nais man ni Chyna na bantayan si Ira sa pakikipag-inuman sa matatanda, hindi na niya kinaya pa ang antok at nakihiga na sa tabi ni Eloisa. Ilang saglit pa ay lumapit si Kat sa akin at nagsabing matutulog na rin muna sila ni Carey. Tumayo kami ni Pete at hinayaang magtabi-tabi sa pagtulog ang mga babae. Pumwesto kaming bantay sa kanila sa magkabilang panig.

Sa totoo lang natatakam kami sa alak lalo at malamig ang hangin ngunit hindi namin alam kung malalabanan ba namin ang antok sa oras na makatikim kami kahit isang tagay nito.

Hindi mo makikitaan ng takot at pagkailang si Ira kahit pa mag-isa lamang siyang babae na kainuman ng mga lalake. Marahil, tiwala naman siya sa amin na hindi namin siya pababayaan.

"Buti na lang po at may dala kayong maiinom panlaban sa lamig...," pagbubukas paksa ni Emong sa inuman. "Tamang tama nabitin ako kanina dun sa inuman sa party..,"

"Pumunta ka doon? Bakit hindi ka nag-aya?...," hampas ni Ira sa katabi. Pinagitnaan ni Max at Emong si Ira upang mas mabantayan nila ito.

"Ang daya mo insan ha, hindi ka nagsabi...," sibe ni Max.

"Nabitin nga ako kasi pasaway si Carey kaya hindi ako nakapagtagal doon," panghihinayang muli ni Emong.

"Party saan?," takang taka na hitsura ni Mang Salde.

"Sa paglampas po sa mga kabahayan galing sa inyo, meron po kami nadaanan kanina na party...hindi n'yo po nadaanan papunta dito?," pahayag ni Ian na nasa likod ng kanyang nobya.

Nagkatinginan si Marissa, at Mang Salde.

"Naku, namalik-mata lamang kayo...baka napagkatuwaan lang kayo...," naibulalas ni Mang Lindo.

"Paano pong napagkatuwaan?," kunot noong tanong ni Max.

"Pre...," istilong aawat si Mang Salde sa kumpare ngunit nagpatuloy ito.

"Imposible kasi na magparty pa ulit dito, kasi simula noong magkasunog, ipinagbawal na dahil muntik madamay yung mga kabahayan...," salaysay ni Mang Lindo.

"Daldal mo talaga, Pre," matawa-tawang tabig ni Mang Salde sa kaibigan.

"Okey lang 'yun pre para makapag-ingat rin itong mga kabataang ito...," magaang bigkas ni Mang Lindo na tipong natural lamang sa kanya.

"Ano po bang nangyari doon?," panakang usisa ni Ian.

"Isang kumpanya yata iyong nagparty noon. Ang sabi pumutok daw 'yung kawad ng kuryente nila sa mga speaker kaya nagkasunog. Madami rin namatay kasi mga nakuryente lalo at malapit sa tubig-dagat... Kung may nakita man kayo na mga sinasabi n'yong nagpaparty, baka mga kaluluwa iyon ng mga namatay sa sunog...," patuloy na salit ni Mang Lindo sa kanila.

"Pero totoong tao ang mga nakasayaw ko at nakausap doon," gumugulong isipin ni Emong.

"Parang totoo iyong nakita namin kanina...," labis na mangha ni Ian.

Nang lingunin kami ni Ian, parehong reaksyon rin ang nakita niya sa amin. May agwat man ang pagitan namin sa kanila ay malinaw naming naririnig ang kanilang kwentuhan.

"Kailan pa po nangyari 'yun?," urirat ni Max.

"Mga ilang buwan pa lang nakakalipas...," sagot ni Mang Lindo na lalong nagpakilabot sa amin.

"Kaya mag-ingat kayo sa bonfire n'yo...kung tutuusin nga bawal na iyan dito...," paalala ni Mang Salde.

Natahimik kami at mga nakiramdam.

"O kaninong tagay na?," pambasag ni Mang Hamin sa katahimikan.

"Alam mo ba tungkol dito?," pagtatanong ni Ian kay Marissa.

"Oo...hindi ko lang sinabi kasi ayoko matakot kayo...," paliwanag ni Marissa.

" 'Wag kayong mag-alala, nandito naman kami at safe naman kayo dito sa napili n'yong puwesto...," pagsapo ni Mang Salde sa aming pangamba.

Walang palit-minuto, sumigaw si Chyna:

"Hardy...c Jing!,"

Nang dahil sa pagka-curious ko sa rebelasyon ni Mang Lindo, ilang hakbang na nalayo ako sa pwesto ng mga babaeng natutulog.

Paglingon ko, kapit na ni Chyna ang nobya ko na todo sa panginginig.

Bigla ko naalala 'yung bilin niya sa akin noon.

"Sabi nila Mommy at Daddy, bawal daw ako sobra malamigan kundi para daw akong kokombulsyunin...,"

"Eh ano ginagawa nila 'pag nagkakaganoon ka?,"

"Iniipitan nila ng kahit ano yung palad ko para di raw magtikom ng todo kamay ko tapos iniipitan daw nila ng kutsara yung bibig ko para di ko makagat dila ko...,"

"Chy... lagyan mo ng kahit anong maiipit sa palad niya para hindi magtikom ng todo...," mabilis na atas ko kay Chyna na kumaripas sa kanyang bag upang kumuha ng kung ano.

Nagising na rin ang iba at alumpihit na lumapit kay Jing-Jing bunga ng pag-aalala.

"Arrrggghh...," impit kong naisigaw nang ilagay ko ang dalawang daliri ko sa kanyang bibig at madiinan itong kagatin niya.

Nakakatakot ang panginginig niya na tipong epileptic patient.

"Balutan at yapusin n'yo lang siya para mawala ang lamig ng katawan niya...," mando ko sa mga nakapaligid na babae kay Jing-jing habang namimilipit ako sa kirot ng kagat nito sa daliri ko.

Ipinahawak naman ni Chyna ang isang bote ng pabango at alcogel sa magkabilang kamay ni Jing-Jing.

Ngunit para bang hindi ito humihinto sa panginginig.