Chapter 68

MALAWAK NA BAKURAN, maaliwalas ang kapaligiran at napapalibutan ng nagtataasang Pine Tree ang semi-bungalow white house na pag-aari ni Christoff Tamayo. Ngunit kumpara sa mansyon sa Villa Agatha ay mas maliit pa rin itong maituturing.

Napansin agad ni Agatha na mahilig sa orchids ang nakatira rito, tila orchidarium ang malawak na hardin na may iba't ibang variety ng hanging plants. Impressive ang kabuuan, nakakarelax ang ambiance ng bakuran nito. Umikot pa ang paningin ni Agatha, naghahanap ng mapagkukunan ng dagdag impormasyon at pagkakakilanlan sa tunay na pagkatao ng nagkumbida sa kaniya upang saluhan ito sa isang hapunan.

Nagkalat ang ilang mga tauhan ni Christoff, tila hindi mabuti ang kapangahasan ni Agatha na paunlakan ito sa imbitasyon nito dahil mas pinili niyang pumuntang mag-isa ayon sa plano nila ni Tristan. Hindi kotse kundi si Apollo ang sinakyan ng heredera.

Gustong matawa ni Agatha nang mapapalatak si Alexis kanina nang makita siya nito bago umalis ng Mansyon.