Chapter 3

Nang makarating kami sa bahay ay naroroon na sila Boyet at Annika. Sa kanila ko na ipinaluto ang ibinigay ni Nanay Lucing. Nagpalit lamang ako ng damit at umalis na rin kami ni Marco. Hanggang ngayon ay hindi pa kami nag uusap ni Ate Cynthia, masama pa rin ang loob ko sa kanya.

Nakamasid lamang siya sa amin ni Marco nang kami ay umalis. Wala pa rin si tatay kaya inihabilin ko na lamang kila Annika na sabihing magkikita kita kami nila Mildred.

"May problema ba kayo ng ate mo Lyrica? " Tanong sa akin ni Marco.

"May nangyari kasi kagabi..." Napabuntong hiningang sabi ko. Madahan siyang nagmaneho ng motor at nakinig sa akin.

"Yung mga naipon kong pera mula sa naging sahod ko sa pagtatrabaho ay kinukuha pala niya... Iniipon ko iyon upang makaluwas na ako ng Maynila. Sobrang pagtitipid ang ginagawa ko nitong mga nakaraang buwan upang makaalis na ako. Kaso nung tiningnan ko kagabi ang pitaka ko, lilimang daang piso na lamang ang natira." Napaiyak na naman ako ng maalala ang mga naipon ko. 

Nakikinig lamang sa akin si Marco, sa aming lima siya ang pinaka kasundo ko. Sa kanya lamang ako nakakapagkwento ng lahat ng nangyayari sa buhay ko.

"Wala naman na akong magawa dahil wala rin naman siyang maibibigay sa akin. Mag aaway lamang kaming dalawa. Ayoko ng dagdagan pa ang problema ni Tatay." Nang maalala ko si tatay ay mas lalo lamang akong naiyak.

"Desidido ka talagang lumuwas ng Maynila Lyrica?"

" Oo naman, maraming oportunidad sa Maynila Marco. Hindi ba at balak mo ring doon magtrabaho pagkatapos mo sa iyong kurso? " Nagpunas ako ng aking luha. 

"Ah, oo Lyrica. " Parang wala sa wisyong sagot niya.

"Huwag ka na lamang mag iiwan ng pera sa bahay ninyo Lyrica. Ikaw na lamang ang umiwas." Dagdag pa ni Marco.

Tumango lamang ako sa kanya at nagpatuloy na kami sa aming pagbyahe.

Nang makarating sa labas ng bahay nila Krisha ay agad kong inayos ang sarili.

"Maganda ka na Lyrica." Asar sa akin ni Marco.

"Baliw! Tinitingnan ko lamang kung mugto ang mata ko." Irap ko sa kanya at tinawanan lamang niya ako.

"Ay nandito na pala ang magkasintahan!" Pang aasar sa amin ni Mildred. Napairap naman ako kay Mil dahil doon. Palagi na lamang kaming ganito tuwing nagkikita kita kami.

"Kaya lalong umaayaw sa akin si Lyrica dahil sa mga kantyaw ninyo." Tawa ni Marco.

"Palagi pa namin kayong aasarin ng lalong humindi sa iyo itong si Lyrica! " Dagdag pa ni Krisha.

"Hay nako, kaya huwag ninyo kaming aasarin ni Mil. " Kakamot kamot sa ulong sabi ni Wren. Sabay sabay naman kaming nagtawanang magkakaibigan. 

Matagal na kasing nanliligaw kay Mildred itong si Wren, ngunit ayaw pa itong sagutin ni Mil dahil mas inuuna niyang makapagtapos ng pag aaral. Ang kinuhang kurso ni Mildred ay Elementary Education, samantalang si Wren at Krisha naman ay Bussiness Administration. Sa susunod na taon ay ipagpapatuloy ni Krisha ang pag aaral niya. Si Marco naman ay Accountacy ang kinuhang kurso, ganun rin ang kursong kinuha ko noong ako ay napasok pa. 

"Napakababagal ninyong manligaw, tingnan niyo si Ivan sa sobrang bilis nabuntis niya agad ako." 

"Ay gaga ka girl! Hindi ko pinangarap mabuntis ng maaga!" Parang hinahighblood na sabi ni Mildred. Agad ko rin namang sinang ayunan ang bagay na iyon.

"Paano? Magmamadre yata kayong dalawa ni Lyrica! " Saad ni Krisha.

"Ay mas mabuti pa! " Mabilis na sabi ko.

"Ay kawawa naman niyan si Marco." Tawa ni Mildred.

"Magsitigil na nga kayo! Naku, sa tuwi na lamang na nagkikita kita tayo ayan ang inuungkat ninyo! " Saway ko.

"Nasaan na ba si Mimi ha? " Tanong ko kay Krisha, mag iisang taon na ang anak nito.

"Baka tulog na si Mimi. Iniwan ko kanina kay Ivan e." 

"Mag uwian na tayo, natulog na pala ang binisita natin." Biro ni Mil.

"Aba e ako? " Angil naman ni Krisha.

"Ayaw na namin sayo." Biro din ni Wren.

"Harsh neto! Akala mo naman hindi ako tinutulungan dati! " Irap ni Krisha.

"Magsitigil na nga kayo! Bibili lang ako ng gin. Ang iingay niyo talaga. Kaya tayo narito ay para magrelax relax! " Sabi ni Marco.

"Inuman session naman pala! Sige na, bumili kana at tatahimik na kami. Stress na stress na ako sa unibersidad! " Sabi ni Mildred.

"Sama ako pre." Sabi naman ni Wren kay Marco at umalis na ang dalawa.

"Every linggo na lang kayo may inuman a! Dadaya talaga! Dumadayo lang talaga kayo rito para magsipag inom e." 

Oo nga naman. Sa kanila ko lamang rin natutunan ang mag inom. Si Krisha, nung hindi pa siya nagbubuntis ay halos gabi gabi niya kaming ayain na mag inom. Kahit naman ganoon ay alam ko naman ang aking hangganan sa alcohol. Hindi naman siguro masamang magsaya ako minsan...

Napabuntong hininga ako.

"Ang lalim naman nun Lyrica, may problema ba? " Tanong ni Mildred at alam kong napukaw rin noon ang atensiyon ni Krisha.

"Iniisip ko lamang ang pagluwas ko ng Maynila. "

"Buo na talaga ang loob mong mag Maynila? " Tanong ni Krisha sa akin.

"Oo naman. Hindi ko pa nga lamang nasasabi kay Nanay Lucing." Napabuntong hininga ako.

"Mas kailangan ko talaga ngayon ng malaking kita. Gusto ko ng patigilin si tatay sa pagtatrabaho niya." Dagdag ko pa.

"Tanggapin mo na kasi yung alok ko Lyrica. Sa isang kompanya sa Maynila nagtatrabaho yung pinsan ko. Tiyak matutulungan ka nun." Sabi sa akin ni Mildred.

"Nakakahiya kasi Mil... Isa pa, naubos na yung iniipon ko." Napabuntong hininga ako.

"Papahiramin kita Lyrica. Tsaka tanggapin mo na ang offer ni Mil. Ayaw ka man namin mapalayo pero baka doon ka nga makakahanap ng magandang trabaho. Malaki pati ang pasahod sa Maynila." Udyok na rin ni Krisha. Sa amin kasing lima si Krisha at Marco ang pinaka may kaya sa buhay.

"Hoy, ano yan ha? Bakit hindi kami kasali sa chismisan na yan?" Bungad ni Marco ng makabalik sila galing sa pagbili sa tindahan.

"Alam mo ba yung girl's talk Marco? " Mataray na sabi ni Mildred.

"Sus, baka kung ano ano ng pinag uusapa niyo riyan." Gatong pa ni Wren at lumapit kay Mildred.

"Tigilan mo ako Wren, baka masapak kita." 

"Ay, taray! Nauna pa ang away kesa sa pagiging magsyota." Sabi ni Krisha. Napatawa naman kami dahil doon.

"Iniiba niyo ang usapan hmm? " Nanunuri kaming tiningnan ni Marco.