Kabanata 1

MULA sa boarding house nila sa Tanza Cavite, nilakad na lang ni Raquel ang patungo sa STI University kung saan siya ay graduating na sana sa kursong Bachelor of Science in Secretarial Administration (BSSA). Kapag may iniisip siyang mabigat na problema ay mas gusto niya ang naglalakad habang nag-iisip.

     Nanghihinayang siya 'pagkat isang semester na lang naman at matatapos na siya sa kolehiyo. Ayaw man ay mapipilitan siyang huminto muna sa pag-aaral. Hindi na siya matutulungan ng kanyang ina na matustusan ang kanyang pag-aaral.

     Isang domestic helper ang kanyang ina sa ibang bansa. Patay na ang kanyang ama, kaya naman napilitan mangibang bansa ang kanyang ina upang suportahan silang magkapatid.

     Natigil siya sa paghakbang nang marinig na tumunog ang kanyang cell phone.

     “Aling Lolita, bakit ho?” bungad niya, biglang may bumundol na kaba sa kanyang dibdib. Paanong hindi siya kakabahan? Hindi ugali ng kanyang kasera na tawagan siya sa cellphone.

     “Raquel, si Mark, nasa ospital!” pagbabalita nito ukol sa kanyang bunsong kapatid. “Pumunta ka na ngayon dito sa General Trese Hospital, dalian mo!”

     “H-ho?” Dinaklot ng pag-aalala ang puso niya para sa kapatid. “K-kumusta ang kapatid ko?”

     “Pumunta ka na lang dito!”

     “S-sige po, pupunta na ako riyan!”

     Natagpuan ng dalaga ang sarili na umiiyak at nagmamadaling pumasok sa ospital na binanggit ni Aling Lolita makaraan ng isang oras.

     “A-ano’ng nangyari kay Mark?” usisa ni Raquel nang malapitan si Aling Lolita na dinatnan niya sa loob ng emergency room.

     “Nanonood lang si Mark ng telebisyon kanina kasama ng aking apo nang bigla na lang siyang nag-collapse. Sa takot ko’y dinala ko na rito sa ospital.”

     “K-kumusta na raw siya, Aling Lolita?” tanong pa niya na pilit nilalabanan ang takot na nadarama sa maaaring mangyari sa kapatid.

     “Inoobserbahan na siya ngayon ng mga doktor. Kailangan natin ipagdasal na sanay magising na ang kapatid mo at sanay wala siyang malubhang sakit.”

     Waiting for the doctor felt like an eternity for Raquel. Sadyang hindi na siya makapaghintay na malaman ang kondisyon ni Mark. Nang harapin siya ng doktor ay halos pigil-hininga na inantabayanan niya ang sasabihin nito.

     Parang binagsakan ng langit at lupa si Raquel nang mga sandaling ‘yon habang masinsinan siyang kinakausap ng doktor.

     “Kailangan manatili sa ospital ang pasyente para sa series of test. Bata pa lang ang kapatid mo ay nagkaroon na ito ng problema sa dugo–”

     “A-ano’ng ibig mong sabihin, doktor?” putol niya sa sasabihin nito. Kinabahan siya nang sambitin nito na may problema sa dugo ang kapatid.

     Nakita niyang humigit ng isang malalim na hininga ang manggagamot. Hinubad nito ang suot na salamin sa mata at tinitigan siya.

     “Miss, may problema sa dugo ang kapatid mo na ngayon ay naging full-blown leukemia.”

     “L-leukemia?” sambit niya, biglang nanlamig ang pakiramdam niya.

     Marami pang sinabi sa kanya ang doktor ngunit ang lahat ng iyon ay pumasok lang sa isa niyang tainga at lumabas naman sa kabila. Nakapokus ang isipan niya sa maaaring mangyari sa kanyang kapatid.

     Pagkatapos nilang mag-usap ng doktor ay nakiusap siya kay Aling Lolita na bantayan muna ang kanyang kapatid. Lumabas siya ng ospital at naghanap ng telephone booth.

     Nang araw ring ‘yon ay nag-overseas call si Raquel sa ina upang ipaalam dito ang kalagayan ng kapatid. Pero ayon sa employeer nito, last year pa nakabalik sa Pilipinas ang kanyang ina.

     Sinubukan tawagan ng dalaga ang kaibigan ng kanyang ina na nagtatrabaho rin sa Middle East. Laking pasasalamat niya dahil sinagot nito ang kanyang tawag.

     “Tapos na ang kontrata ng iyong ina, Raquel. Ayoko sanang sabihin ito pero tingin ko’y karapatan mo bilang anak na malaman ang totoo tungkol sa iyong ina.”

     “Ano’ng ibig n’yong sabihin, Aling Rosa?” kinakabahan niyang tanong.

     “May bago ng asawa ang iyong ina. Ang alam ko ay nakatira sila ngayon sa Davao.”

     Hindi makapaniwala si Raquel sa nalaman. Ngayon ay alam na niya ang dahilan kung bakit hindi siya matutulungan ng ina na matustusan ang kanyang pag-aaral. Pero higit na mas kailangan niya ngayon ang ina dahil nasa ospital si Mark.

     “Aling Rosa, may numero ho ba kayo ni inay na maaaring matawagan? Kailangan niyang malaman na nasa ospital ang kapatid ko.”

     “Pasensya ka na, Raquel, hindi ko alam ang bagong mobile number na ginagamit ng iyong ina. Sige, ibababa ko na ang telepono at baka makita ako ng amo ko.”

     “Sandali la–” hindi natuloy ang sasabihin niya dahil nawala na sa kabilang linya ang kausap.

     Parang wala sa sarili na naglakad si Raquel pabalik sa ospital. Gulong-gulo ang isip niya. Hindi niya alam kung ano ang gagawin. Nasa ospital ang kanyang kapatid. Wala siyang sapat na pera. Kailangan nang malaking halaga ng pera para sa pagpapagamot nito.

     Ang kanyang ina na dapat ay inaasahang makakatulong sa kanya, pinagtataguan pa yata silang magkapatid.

     Wala sa sarili si Raquel na naglalakad sa kalsada. Sa harap ng maraming tao ay umiyak siya nang umiyak. Nag-aalala siya para sa kapatid. Saan siya kukuha ng perang gagamitin sa pagpapagamot nito?

     Oo nga’t nakapag-aral siya sa kolehiyo, subalit wala namang diploma dahil nasa third year college palang siya. Tiyak na mahihirapan siyang maghanap ng trabaho. Isa pa, ngayon niya na kailangan ang pera para simulan na ang series of test na sinasabi sa kanya ng doktor.

     Tumawid ng kalsada si Raquel. Pero bago pa siya makarating sa kabilang kalsada’y nahagip na siya ng isang sasakyan.

     Ang bilis ng mga pangyayari. Naramdaman ni Raquel ang sakit ng pagkahagip sa kanya ng bumper ng sasakyan. Sa sobrang sakit ay agad ding namanhid ang kanyang buong katawan at bago pa bumagsak sa konkretong semento’y nawalan na siya ng ulirat.

     Nataranta ang lalaki. Umibis ito ng kotse. Agad na binuhat ang walang malay na dalaga at isinakay sa likurang bahagi ng sasakyan.