Chapter 18

ANASTACIA’S POV

Apat na araw matapos naming pumunta sa kastilyo ay naging abala ang Young Master. Nasa physical examination siya nitong huling tatlong araw. Ngayon ay uuwi na siya kaya naman hindi ko mapigilang matuwa. Inayos ko pa ang uniporme ko at mas inayos ang pagkakatali ng buhok ko. Para ‘kong palaging hindi mapakali kapag alam kong parating na siya.

“Anastacia, may ginagawa ka ba?”

Napalingon ako sa pintuan. Si Mia ‘yon, isa sa servant.

“Bakit?” tanong ko.

“Wala pa rin kasi si Kaya, baka puwede mo kaming tulungan sa dinner? Marami rin kasing ibang ginagawa ‘yong iba. Pero kung may iba ka namang ginagawa ay tatawag na lang ako sa kabilang kuwarto.”

“Hindi, okay lang naman. Maaga pa naman sa pagdating ni Young Master.”

“Mabuti, salamat, Anastacia.”

Lumabas ako ng silid para sundan si Mia. Sa kusina kami nagtungo.

Lima lamang sila roon at kukulangin nga lalo at mabilisan ang gusto palagi ng mas matandang Bezarius.

“May kailangan kasi kaming iluto, biglaan na papunta raw ang ina ng Master. Kaya kailangan kita talaga,” ani Mia.

“Wala namang problema.”

Tumulong na ‘ko sa pag-aangat ng mga pagkain patungo sa dining table ng pamilya.

Ngayon ko lang makikita ang lola ng Young Master. Mayroon siyang malaking larawan sa pasilyo at istrikta ang kanyang hitsura. Para siyang nasa edad na apatnapu kung titingnan. Sa labas raw ng Vampire City nakatira ang lola ng Young Master kaya hindi siya naliligaw. Pero may ilang pagkakataon na rin naman siyang nadalaw, iyon lamang ay hindi nagtatagal at palaging oras ng tulog o pahinga ko.

Ang head ng mga servant na si Apostola ay abala pala sa pagpapapalit sa mga Butler ng mga kurtina. Naging kulay asul ‘yon na matingkad.

Si Calixto naman ay wala, pero alam ko ay siya ang sumusundo sa lola ng Young Master.

Nang matapos ako sa paglalapag ay nakihanay rin ako sa ibang tagasilbi. Lima kaming naroon. Pero pababa na rin ‘yong iba at paayos na rin. Iyon ‘yong may iba talagang toka na ginagawa sa mansion.

Si Mistress Rossana ay patungo na sa lamesa.

“Apostola, nasaan na ba ang Master ninyo?” mataas ang boses nito.

“Mistress, titingnan ko sa itaas.”

“Sinabi ko na sa kanyang darating ang kanyang ina. Inuuna pa niya ang makipaglandian sa tagasilbing si Kaya,” mariing sabi ni Mistress Rossana.

Noon ko naalala na wala nga pala si Kaya. Kumabog ang dibdib ko. Si Kaya, siya ba ang bagong babae ng ama ng Young Master?

Biglang bumalik sa alaala ko ang mga pasa niya minsan na nakikita ko.

Paano ko naman malalaman kung kahit kailan hindi naman siya nagkuwento sa ‘kin. Parang gusto ko tuloy pabilisin ang oras at para makompirma ko ‘yon kay Kaya.

“Nariyan na pala siya,” sabi ni Mistress Rossana na mukhang nakahinga ng maluwag.

Pababa ang Master sa hagdanan.

“Nasaan na si King?” tanong ni Master Ezekiel.

“Kanina ko pa siya ipinasundo sa Butler natin. Parating na rin ‘yon.”

“Bakit pabigla-biglang dumalaw si mommy?” tanong ni Master Ezekiel.

“Hindi ko alam, pero ang tingin ko ay may nakapagbalita na sa kanya tungkol sa dalawang prinsesa ng mga Pureblood, maging ang imbitasyon na natanggap ni King,” sagot ni Mistress Rosanna.

Nauna silang naupo sa kanilang puwesto.

“Kung gano’n, oras niya namang makialam sa buhay ni King?” sarkastikong tanong ni Ezekiel.

“Mas mabuti ‘yon, mas magaling naman ang mommy mo sa pagkumbinsi.”

Parang nanghihina ang tuhod ko sa mga naririnig ko. Pakiramdam ko gusto nilang ipilit ang Young Master sa isa sa mga prinsesa.

“Anastacia, you’re here,” puna sa ‘kin ni Mistress Rossana.

Alam kong hindi man ako nilingon ng mga kasama ko ay nakahanda ang tainga nila para marinig ang sasabihin sa ‘kin ni Mistress Rossana.

“Maganda ang magiging buhay ni King kapag Pureblood ang napangasawa niya. Mabuti pa ay kumbinsihin mo rin siya. Sumusunod din siya sa ‘yo,”anito.

Hindi ko alam pero napatango ako.

“O-opo, Mistress Rossana.”

Nangiti si Master Ezekiel. “Puwede ka naman maging babae pa rin ni King.”

Iyong tingin ni Mistress Rossana sa asawa ay tila may kahulugan.

“Anastacia, pilitin mo siyang mas piliin ang magandang kinabukasan niya.” Nginitian ako ni Mistress Rossana.

Tila tinutusok nang maraming karayom ang puso ko.

“Umaasa ako na hindi ako nagkamali sa pagpili sa ‘yo para kay King,” dagdag pa niya.

Tumango naman ako. Nagpipigil akong maluha. Parang sinasakal ang pakiramdam ko.

Dumating na ang bisita kaya napatayo ang mag-asawa at ngiting-ngiting sinalubong ang babaeng maganda pero matapang ang hitsura. Nakasuot ‘to ng itim na bestida at maraming suot-suot na mamahaling alahas.

“Maligayang pagdating, mommy,”sabi ni Mistress Rosanna. Hinalikan niya sa pisngi ang bisita.

“Mommy, mas maganda sana ang inihanda namin sa ‘yo kung nagpasabi ka kaagad.” Hinalikan ni Master Ezekiel ang ina sa pisngi.

“Where’s my grandson, King?” maging ang boses ng lola ni King ay mataas, at mukhang istrikta.

“Parating na rin siya, maupo tayo habang hinihintay siya, mommy,” nakangiting aya ni Mistress Rosanna sa kanyang ina.

Binati namin nang sabay-sabay ang bisita.

“Maligayang pagdating, Mada’am Margarita.”

Tiningnan niya kami isa-isa at napatitig sa ‘kin.

“Isa ka siguro sa babae ni Ezekiel.”

Nabigla ako sa sinabi niya.

Napatikhim si Ezekiel. “Bakit mo naman nasabi ‘yon, mommy?”

Naupo na ang mga ‘to.

“Dahil maganda ang hitsura at katawan niya. Hindi ba at iyan ang mga gusto mong tagasilbi? Iyong may magagandang hitsura.”

Nagkatinginan ang mag-asawa.

“H-hindi—”

Umiling si Mistress Rossana para pigilin ako.

“May bago ba sa anak ninyo?”

Gusto ba nitong mas paniwalaan ‘yon kesa sabihin na ako ang personal maid servant ng Young Master?

“Mistress Rossana may liham mula sa mga Pureblood,” sabi ng isang lumapit na Butler.

Halatang napokus na sa liham na may emblem ang tatlo. Si Mistress Rosanna ang nagbukas no’n dahil siya ang napag-abutan.

Ibinukas muna nito ang liham at binasa ‘yon ng tahimik. Unti-unting ngumiti ‘to at nasiyahan.

“Ang palasyo ay bukas kay King para maging candidate na asawa ni Alexandra Bathory.”

Halata ang kasiyahan ng tatlo.

“May dalawa pang pangalan pero mukhang pumili sila sa 1^st, 2^nd, and 3^rd mansion,” dagdag ni Mistress Rossana.

“Kung gano’n, mukhang magtatagal ako rito para gabayan ang aking apo.”

Nagkatuwaan na sila. Habang unti-unting tila nabibingi ako. Nanlalamig ang katawan ko. Habang nanginginig naman ang tuhod ko. Pero hindi ako nagpahalata.

Kung aalalahanin ko ay halata sa prinsesang si Alexandra ang pagkakagusto sa Young Master. Iba ang ngiti niya. Hindi ako nagkakamali nang mapansin kong isa na siya sa napili niya. At kinakabahan, mas lalong natatakot ako dahil alam ko na sa lahat ng nakasayaw niya sa Young Master makikita ang kanyang buong atensiyon.

Nang dumating ang Young Master ay sinalubong siya ng masasayang mukha ng kanyang pamilya. Nakangiti rin naman siya. Pero napabaling siya sa ‘kin at nginitian din ako.

“King, napakalaki mo na kaagad.” Tuwang-tuwa ang lola niya at napatayo pa para yakapin ang Young Master. “Kumusta naman ang pag-aaral mo? Palagi ka pa rin bang napagagalitan dahil nananakit ka ng kaklase mo?” tila natutuwa pa ‘to.

Natawa ang Young Master.

Naupo na sila para simulan ang pagkain.

Nagsisimula na silang mag-angat ng kubyertos nang magsimulang buksan ni Mistress Rossana ang tungkol sa liham.

“King, may liham ang kastilyo para sa ‘ting pamilya.”

“Tungkol saan, mom?” tanong ng Young Master.

“Isa ka sa tatlong pagpipilian na asawa ni Prinsesa Alexandra,” masayang balita ni Mistress Rossana sa anak.

Kailangan kong idiretso ang tingin ko dahil baka magbagsakan ang mga luha ko.

“Pero hindi ako interesado sa kanya.”

Natigilan ang lahat sa naging kaswal niyang sagot.

“King, naiintindihan mo ba ang sinasabi mo?” hindi makapaniwala ang ina.

Nag-angat ng mukha ang Young Master.

“Hindi ko siya gusto. May dalawa pa siyang pagpipilian. Mas maganda iyong mapunta siya sa lalaking gusto siya,” sagot ng Young Master.

“Ano ang dahilan bakit parang hindi mo siya magugustuhan?” nakangiting tanong ng lola ni Young Master King.

“May iba ‘kong gusto at alam naman nila ‘yon.”

“King!” may babala si Mistress Rosanna.

Nag-angat ng kamay ang Mada’am Margarita.

“Sino ang nagugustuhan mo?” nakangiti pa rin si Mada’am Margarita.

“Si Anastacia, siya lang ang gusto ko.”

Halatang nabigla ang mag-asawa. Maging ako at ang mga servants ay gano’n din.

“At sino naman si Anastacia? Saang pamilya ba siya naroon?”

“Mom, ‘wag mo na siyang tanungin. Si Anastacia ay isang Royal—”

Nangunot ang noo ng Young Master at napabaling sa kanyang ama at ina. Nasa hitsura ng Mistress Rosanna na nagbibigay babala siya sa anak na ‘wag itong magsasabi.

“King?” si Mada’am Margarita.

“Si Anastacia ‘yong nasa likuran ni dad,” sabi ni Young Master.

Nabigla kaming lahat sa naging pagsagot niya.

Pinagkatitigan naman ako ni Mada’am Margarita, isinunod nito ang Master and Mistress. Iba ang ipinalabas ng mga ‘to kanina.

“Sinasabi mo na ang babaeng ito ay si Anastacia?” turo sa ‘kin ng Mada’am Margarita.

Nangiti ang Young Master.

“Siya si Anastacia, grandma.”

“Isa siyang servant, hindi ba?” tanong ni Mada’am Margarita sa Young Master.

“Sa ‘kin lang siya, tumutulong lamang siya kung gusto niya.”

Tumango-tango ang Mada’am Margarita.

“Ibig mong sabihin isa siyang personal maid servant?”

Ngumiti ang Young Master bilang pagsangayon.

Nangiti ang Mada’am Margarita. “Walang problema kung gusto mo siya. Ang babaeng servant ay maaari mong kunin at itapon kung kailan mo gustuhin.”

Nabigla ang Young Master, ako naman ay hindi na dahil kanina pa ‘ko nakararamdam ng kakaiba sa tatlo.

“King, ang babaeng ‘to ay isa lamang alipin. Bayad ang kanyang buhay, katawan, at kahit mag-asawa ka ng marami ay wala siyang karapatang pigilan ka.” Tumayo si Mada’am Margarita at lumapit sa ‘kin.

Sa pagtitig pa lamang niya ay para na ‘kong babagsak sa tindi nang tensiyon.

Lumapit siya sa ‘kin bago humarap sa Young Master.

“Maganda siya sa ngayon. Pero tatanda rin siya kaagad. Iyong pagkakagusto mo sa kanya ay dala lamang ng hitsura’t katawan niya. Maaari mo siyang gamitin sa kahit na anong paraan.” Nilingon niya ‘ko. “Tama ako, hindi ba? Anastacia?”

Napadiretso ako ng tayo.

Marahan akong tumango.

Nangiti siya lalo. “May plano ka bang pigilan siyang mag-asawa ng iba?”

Umiling ako. Nakagat ko ang ibaba kong labi. Nanginginig na maging ang kamay ko.

Lumingon siya sa Young Master. “Kahit mag-asawa ka, maaari mo pa rin siyang gamitin hangga’t gusto mo. Makukuha mo siya ng madali lamang kaya hindi niya kailangan na seryosohin mo. Nadadala ka lang ng kabataan mo. Sinasabi ko ‘to sa ‘yo dahil magiging malaking pagsisisi mo kung palalagpasin mo ang oportunidad na magka-asawa ng isang Pureblood.”

“King,” untag ni Mada’am Margarita sa Young Master. Marahil napapaisip na siya.

“Grandma, ang pinagsasalitaan mo ay si Anastacia. Buhay ko ang minamaliit mo. Hindi ninyo maiintindihan kahit kailan kung gaano ko siya kagusto, handa akong mamatay para sa kanya.”