Chapter 6: Meet the brother

“Puff.”

Nabigla si Shaun na noon ay nakatutok sa laptop. Napaubo siya ng dalawang beses, at nang lingunin niya, nakita niya ang seryosong mukha ni Yesha. Bigla siyang natuwa sa batang ito.

"Gusto mo ba 'yan?" tanong niya, medyo aliw ang tono.

Tahimik na tumango si Yesha habang hawak-hawak ang makina sa kamay, seryoso ang mukha.

Ngumisi si Shaun, at may kapilyuhan sa kanyang gwapong mukha. "Pwede naman. Pero alam mo bang gamitin 'to? Ang mga ipad cellphone at laptop at computer, komplikadong mga  bagay 'yan. Hindi 'yan madaling maunawaan ng mga tulad mong bata."

Lumapit agad si Yesha at magalang na nagtanong, "Paano po ba ito gamitin?"

Naalala ni Shaun ang huling pagkakataong nagreklamo sa kanya si Angel habang umiiyak, dahil binully raw siya. Lalo siyang natuwa at lumaki ang ngiti sa labi. Tinawag niya si Yesha palapit, at pinakita ang laptop binuksan ang pahina ng program code at sinabi, "Tingnan mong mabuti. Yung mga magagandang larawan na nakikita mo, gawa 'yan sa mga letrang ito. Halimbawa..."

Habang nagsasalita, mabilis niyang tinipa ang keyboard. Lumitaw ang mga linya ng code na parang mga mahiwagang titik. Maya-maya, pinindot niya ang enter, at lumitaw ang isang bagong page.

"O, kita mo? Madali lang 'yan." Itinulak niya ang laptop sa harap ni Yesha, saka yumuko at pabulong na nagsabi, "Gusto mong subukan? Kahit tanga, maiintindihan 'to. Kung hindi mo magawa, ibig sabihin, bobo ka. Huwag mo na akong tawaging kuya, at kapag nakita mo ako sa labas, huwag mo na akong kilalanin. Gets?"

Nasa gilid ang butler, pawis na pawis.

Alam kasi ng butler kung gaano katalino si Shaun sa teknolohiya. Nakapag-aral pa ito sa Chinese Academy of Sciences ng isang taon, at halos propesyonal na ang kakayahan sa programming. Kaya naman, obvious na niloloko lang niya si Yesha.

Ganito rin ang ginawa niya kay Angel dati hanggang sa mapaiyak ito, at hanggang ngayon ay umiiwas pa rin sa kanya ang bata.

Napatingin ang butler kay Yesha. Galing pa probinsya ang bata baka nga ngayon lang ito nakakita ng computer. Lalong kinaawaan ang bata.

Nang makita ni Shaun na nakatitig pa rin sa screen si Yesha, tinulak niya ito ng bahagya, "Ano? Gawin mo na. Pinahiram ko na sa'yo ang precious kong laptop. Kung kapatid talaga kita, dapat magawa mo ito."

Napadikit si Yesha sa mesa at dahil sa height niya, parang nakapatong ang ulo niya sa keyboard. Natawa si Shaun at kinuha siya para iupo  ng maayos sa gaming chair. Pinaglaruan ni Yesha ang keyboard, pinindot ang ilang keys, at maingat na tinitigan ang mga letra sa screen.

Napa-krus ng mga binti si Shaun, sabik na sabik na makita si Yesha na magkamali at sumuko. Hinihintay na lang niya ang tamang oras para asarin ito.

Hindi pa talaga nakakagamit si Yesha ng laptop noon. Ang tanging pagkakataon lang na nakakita siya nito ay nung dumaan ang ilang kriminal sa border ng kanilang nayon. Alam niyang makapangyarihan ang bagay na ito at nakaka-access ng balita mula sa labas. Kaya agad siyang nainteresado.

Noong una, awkward pa siya sa keyboard, at hindi niya kabisado ang posisyon ng mga letra. Wala rin siyang ideya kung ano ang ibig sabihin ng mga ito. Pero mabilis siyang matuto, at magaling siyang umalala. Sa tulong ng mga imahe at logic ng pagkakasunod-sunod ng code, unti-unti siyang natutong mag-type.

Mabagal pa sa simula, pero nang kabisaduhin na ng kanyang utak ang layout ng keyboard, bumilis na rin ang kanyang mga daliri. Natututo na rin siyang mag-experiment ng mga kombinasyon habang nagtatype.

Akala ni Shaun ay nag lalaro  lang si Yesha. Pero nang makita niya ang code nito...

Nahulog ang hawak niyang chopsticks.

Nang pinindot ni Yesha ang enter key at lumabas ang bagong pahina, natulala si Shaun.

"Ikaw ba ang gumawa nito?" tanong niya, mabilis na kinuha ang Laptop para tingnan kung paano siya dinaya.

"Eh, hindi mo ba nakita kung anong tinype ko?" tanong ni Yesha, nagtataka.

"Hindi 'yan ang ibig ko sabihin!" halos mapasigaw na si Shaun. "Okay naman lahat, pero... ang dami mong typo error?!"

Tinuro niya ang mga mali. Tumango si Yesha, "Alam ko lang po kasi ay tagalog."

Hindi pa kasi siya nakapasok ng paaralan. Yung kaunting alam niyang salita ay mula sa mga code ng kanilang border communication.

Hindi na alam ni Shaun kung ano ang sasabihin.

Tinitigan niya si Yesha na parang nakakita ng multo. Sa sumunod na segundo, binuhat niya ito at mabilis na umakyat ng hagdan.

"Young master!" sigaw ng butler, takot na takot. "Bawal pong manakit, sabi ni master!"

"Manahimik ka!" sagot ni Shaun, sabay sara ng pinto.

Pinaupo niya si Yesha sa gaming chair, binuksan ang apat na malalaking screen, at pinakita ang codes.

"Anong kaya mong intindihin dito?"

Tinitigan ni Yesha ang mga screen. Kumplikado ang mga character, kakaiba ang mga kombinasyon. Habang tumatagal, napansin niya ang isang maling linya sa pangatlong screen.

"May mali dito," aniya, sabay turo.

Napakunot-noo si Shaun. "Saan?"

Tinapik ni Yesha ang screen, binura ang code, at nag-type ng panibago. Bago pa man siya pigilan ni Shaun, pinindot na niya ang enter.

"Hoy, huwag mong—!"

Bigla siyang naputol. Ang ginagawa nila ay parte ng hacker competition. Nasa gitna na sila ng intense na laban. Hindi siya natulog ng ilang araw, at ngayon, parang sinira lang ni Yesha ang lahat.

Akma na siyang magalit, nang biglang lumiwanag ang screen at lumabas ang salitang "WIN". Sumabay ang hiyawan mula sa kanyang teammates.

" Shaun, ang galing mo! Nahanap mo agad 'yung weak spot. Talo ang kalaban! Champion tayo!"

Napatitig si Shaun sa screen, nanlalaki ang mata.

Putcha.

Nang lingunin niya si Yesha, iba na ang tingin niya. Parang naliwanagan siya.

"Gusto mo pa ng laptop? Bibilhan kita," sabi niya, parang nahihiya pa.

Hindi alam ni Yesha ang tungkol sa laban, pero alam niyang nakatulong siya. Kaya tumango siya agad. "Oo, gusto ko."

"Okay, tara. Labas tayo."

Nagmamadaling nagbihis si Shaun at dinala si Yesha pababa.

Nasa may hagdan ang butler, at nang makitang ayos sila, napabuntong-hininga siya ng malalim. Pero nanlaki ang mata niya nang marinig ang balak ni Shaun na isama si Yesha sa labas.

Kilala kasi siya bilang sobrang talino pero mahirap pakisamahan. Hindi rin niya gusto ang adopted sister nilang si Angel, at madalas hindi kinakausap ang kahit sino sa bahay.

Pero ngayon, si Yesha na bagong dating pa lang, ay parang may mahika at napalapit agad sa kanya.