Chapter 6

NASA OPISINA SI Denver nang muling magbigay ng notification ang bangko tungkol sa joint account nila ni Janice.  Nagulat siyang malaman na nag-withdraw na naman ito ng four million pesos.  Kahapon lang ay kumuha na ito ng ten million pesos.  Ano bang pinagagamitan nito ng pera samantalang ibinibigay naman niya ang lahat nitong mga pangangailangan?

                Sabagay, baka nahihiya lang itong magsabi sa kanya.  Anyway, asawa na niya ito at gaya ng sinabi niya rito, lahat ng sa kanya ay pag-aari na rin nito.  Isa pa, hindi matutumbasan ng kahit na anong salapi ang kaligayahang nararamdaman niya dahil sa kanyang asawa.

                Kaya nga ganado siya palaging umuwi ng bahay.

                “Sir, eto na po iyong set ng alahas na in-order nyo,” anang kanyang sekretarya, ipinatong nito sa mesa niya ang isang box na naglalaman ng isang set ng mga alahas.  Worth 50 million pesos ang halaga niyon.  Gusto kasi niyang sorpresahin si Janice.  Ipinasadya niya iyon sa isang jewelry shop na pag-aari ng pinsan niya.  Tadtad iyon ng mamahaling diamante at 24k gold.

                “Sa palagay mo, magugustuhan ito ni Janice, Miss Albufera?” Tanong niya sa kanyang sekretarya.

                “Sir, kahit sinong babae, luluwa ang mga mata sa  ganda ng set na yan.  . .” sagot ng dalaga sa kanya.

                Napangisi siya.  Ngayon pa lang ay nasasabik na siyang ibigay iyon sa kanyang asawa.  Kaso’y marami pa siyang meeting na kailangang tapusin.  Hah, ni hindi niya inaasahang mahibang ng ganito katindi sa isang babae.  Maski siya ay hindi makapaniwala.  Kung nuon ay wala sa bukabularyo niya ang ganito, ngayon ay naniniwala na siya sa mga kaibigan niyang sobra kung magmahal.  Talaga nga palang darating ka sa point na may makikilala kang isang babae na ‘the one’ para saiyo at kapag dumating ang pagkakataong iyon, ito na ang magiging buhay mo.

                Naalala niya ang first love niyang si Rosemarie.  Inibig rin niya ito ng matindi pero sinaktan lamang siya nito.  Pagkatapos nuon, never na siyang naging seryoso sa isang babae.  Hanggang sa muli siyang makadama ng matinding pag-ibig.  At nakakagulat na nahigitan pa niyon ang damdamin niya para kay Rosemarie.

                Masaya siyang dumating sa buhay niya si Janice.

                Mushy as it may sound ngunit ganito ang nararamdaman niya para kay Janice.  Parang dito na lamang umiinog ang buhay niya ngayon.

LUMUWA ang mga mata ni Minerva nang iabot ang four million pesos mula kay Janice.  Napangisi siya. Actually, two million pesos lang naman ang hinihingi niya rito kaya nagulat siya nang doble ang iabot nito sa kanya.

                Madali lang naman pala niyang matatakot ang isang ito.  “Salamat anak,” tuwang-tuwang sabi niya rito, “Hulog ka talaga sakin ng langit!”

                “Mommy, hindi pwedeng palaging ganito kung hindi’y magtataka na si Denver.  Kahit ubod ng yaman ang lalaking iyon, maingat iyon pagdating sa pera.  Kaya please Ma, dahan-dahan lang sa paggasta, okay?” Pakiusap ni Janice sa ina.  Gusto niya itong makitang masaya pero talagang nalululong na ito sa sugal.  Kasalanan rin naman niya dahil nuong nakikita niya itong nahihirapan sa nangyari sa Papa niya, nilibang niya ito at dinala sa casino.  Hindi naman kasi niya alam na magiging sugarol ang Mama niya.  Ang gusto lang naman niya nuon, pansamantala itong makalimot.  “Kapag inubos mo yan sa pagsusugal, talagang ipaparehab na kita, Ma.” Babala pa niya rito.

                Inirapan lang siya ng Mama niya saka tumayo na.  Hinimas niya ang lumalaki niyang tiyan.  Sandali na lang at magpapalit na sila ng pwesto ni Jasmine.  Nahihirapan na siya sa ganitong kalagayan.  Kahit may nurse ang Papa niya, very stressful para sa kanyang araw-araw itong makitang nahihirapan.  Kating-kati na ang mga paa niyang maglakwatsa at gumimik.

                Hindi siya tulad ng kanyang kambal na magpapakamartir sa pag-aalaga sa ama.  Masakit sa dibdib niya iyon.  At least kapag nag-eenjoy siya, nakakalimutan niya pansamantala ang katotohanang sinapit ng ama niya.

“ANG GANDA. . .” namimilog ang mga mat ani Jasmine nang iabot sa kanya ni Denver ang isang set ng mga alahas.  Halos araw-araw na lamang ay may regalo siyang natatanggap mula rito.  At hindi lang iyon basta regalo, mga milyones ang halaga kagaya na lamang ng ipagshopping siya nito ng mga branded bags, shoes at clothes kahapon.  Nalula nga siya sa presyo nang makita ang halagang binayaran ng asawa.  “P-pero hindi mo naman ako kailangang bilhan ng mga ganito.  Actually, wala akong maisip na paggagamitan ng. . .”

                “Maniwala ka, marami kang paggagamitan ng mga ito. . .in fact next week invited tayo sa wedding ng kaibigan ko.”

                Hindi siya umimik.  Para sa kanya, sapat nang kasama niya ito.  Hindi niya kailangan ng mga material na bagay para lang maging masaya.   Bigla na naman siyang nakaramdam ng takot.  Alam niyang pansamantala lamang ang mga sandaling ito.  Iniisip pa lamang niyang maghihiwalay sila nito ay para nang tinatadtad ng pinong-pino ang puso niya.

                Hindi niya akalaing mahuhulog ang kalooban niya kay Denver.  Hindi niya napigilan ang damdamin.  Hindi naman kasi mahirap ibigin ang lalaking ito dahil taglay lahat ni Denver ang mga katangiang hinahanap niya sa isang lalaki.

                Ngunit hiram lamang ang mga sandaling ito.

                Si Janice ang totoong mahal nito.

                “Sweetheart, may problema ba?” Nag-aalalang tanong nito nang mapansin ang malayong tinatakbo ng utak niya.

                Umiling siya.

                “By the way, kung kailangan mo ng pera, don’t hesitate to tell me. . .walang problema sakin kung anong binibili mo. . .sabi ko nga, pwede mong ubusin ang laman ng joint account natin. And don’t get me wrong, sweety pero ano nga palang pinaggamitan mo ng pera?” Tanong nito sa kanya.

                Napakunot nuo siya, “Anong pera?”

                Dinukot nito ang phone at ipinakita ang mga withdrawals niya.  Kinilabutan siya nang makitang sa loob lamang ng isang Linggo ay nakapag-withdraw siya sa bangko ng twenty five million pesos.  Ni singkong duling ay wala siyang kinukuha sa joint account nila ni Denver.

                Nagpanting ang mga tenga niya.  Sobra naman na yata ang ginagawang ito ni Janice kay Denver.