Chapter 2 (Romance in the bus)

Mabagal ang maneho ng school bus dahil sa daloy ng trapiko subalit hindi alintana ang pagkainip ng mga studyante sa halip pinuno ito ng ingay at tawanan. May kanya-kanya silang gawain at estilo sa buhay na tila walang pakialamanan. May nagkakantahan, may nagkukuwentuhan, may tugtugan at kulitan, at meron din namang abala sa pagsi-cellphone at pagre-review habang nasa biyahe. Bagama't tahimik na nanood ng vlog video si Bethany katabi si Jerry na abala rin sa paglalaro ng online game. 

"Jerry, tingnan mo! Maraming views na 'yong ginawa nating prank kay kuya!" natutuwang bulong ni Bethany. 

"Lagot ka n'yan kay Kuya, ate. Magagalit 'yon 'pag napanood 'yan," malumanay na sagot ni Jerry habang nanood. 

"Prank lang naman 'to, e," sagot ni Bethany. 

Samantalang may isang studyante, na nagngangalang Kyle Rodriguez, ang lumapit at pinausog nito ang isa sa mga tropa nito sa kabilang upuan katapat ni Jerry at nakiupo. Nakasuot ito ng uniporme at may pulang sombrero na bahagyang nakapatong sa kanyang ulo. Siya ay parang siga kung kumilos dahil na rin sa porma ng kanyang pananamit, mala-gangster na estilo ng buhok at may hikaw sa kaliwang taynga na nagpapatingkad sa kanyang mabangis na hitsura. Siya ang lider ng omega team, ang grupo na kinahuhumalingan at hinahangaan ng mga estudyante sa Marymount Academy. 

"Hi, miss Beautiful!" bungad na pag-bati ni Kyle. Kumaway siya subalit hindi 'to napansin ni Bethany dahil naka-head set. 

"Whoooh!, pare, di ka pinapansin. Ahaha," sigawan at panunukso ng tropa n'ya. 

Kinalabit nito si Jerry " Paki naman sa ate mo."

"Ate, tawag ka!" inalis ang headset mula sa kanang taynga ni Bethany. 

"Nino?" tanong ni Bethany. 

"S'ya, uh," tinuro si Kyle. 

"Huh, Bakit daw?" pagtatakang tanong ni Bethany. Nakunot ang noo nang makita si Kyle. 

"Hi, miss Beautiful... May gusto sana akong aminin sa'yo," pahayag ni Kyle. 

"Bakit? Ano ba 'yan?" masungit na tanong ni Bethany. 

"Matagal na kasi 'tong nararamdaman ko sa'yo... Gusto kita," pag-amin ni Kyle habang ang mga tropa nito at ang mga estudyanteng naroon sa school bus ay nakiusisa na rin. Subalit may isang babaeng estudyante rin na naroon na kumukuha ng video nila.

"Ewan ko sa 'yo!" naiinis na tugon ni Bethany at sabay taas ng kilay nito. 

"Whoooh! Ay! Busted!" sigaw at tilian ng mga tropa nito at ng ibang estudyante na naroon. 

"Paano ba kita mapapasagot? Ganito na na lang... Pick-up lines na lang tayo," sabi nito sa sarili at nag-iisip ng mga salitang ihahayag. 

"Okay 'yan, pre. Maganda 'yan," sabi ng mga tropa nito. 

"Apoy ka ba?" tanong n'ya. 

"Yuck, ang corney," bulong sa sarili ni Bethany. 

"Bakit daw,  sabi ni ate?" pang-aasar na tugon ni Jerry at nakatikim ito ng batok mula kay Bethany. "Aray!"

"Wala, akong sinasabing ganyan. Nakikisali ka pa sa kanila, e." 

"Kasi alab you," pahayag ni Kyle at nagsigawan ang mga estudyante at katropa nito. "Whoooh! "

"Ballpen ka ba?" tanong ni Kyle"

"Ballpen ka ba?" nagngawa-ngawang pag-uulit ni Bethany. "So waley!" 

"Bakit daw sabi ni ate?" muling pang-aasar ni Jerry. 

"Ano ba, Jerry?" naiinis na tanong ni Bethany at hinampas nito sa braso si Jerry sabay sabunot "Kanina ka pa, e. Nang-aasar ka na naman. Isusumbong kita kay Mommy."

"Kasi di kita mabura sa isipan ko" linyaang sagot ni Kyle. Samantalang naghiyawan ang mga tropa nito at pati narin ibang estudyanteng naroon. 

"Pansinin mo naman ako, miss Beautiful" panunuyong sabi ni Kyle. 

"Asa ka!" taas kilay na sagot ni Bethany sabay suot ng headset sa taynga. 

Nasa kusina parin si Elizabeth at kausap nito si Ian sa pamamagitan ng Video Call habang kumakain ng almusal. Nakapatong ang isang bayong sa mesa na may lamang iba't ibang uri ng prutas malapit sa kanya. Kumuha ito ng mansanas mula sa bayong at binalatan. 

"Anong oras ka pa n'yan pupunta ng Fruit Juice Bar? tanong ni Ian. 

"Hinihintay ko na lang pumasok ng school si Ken bago ako umalis at ibibilin ko rin kay Cora 'yong labahan," aniya Elizabeth.

"Baka naghihintay na 'yong mga impleyado mo doon," pag-aalalang sabi  ni Ian.

"Iniwan ko naman doon 'yong susi sa pinagkakatiwalaan kong barista."

Samantala nagmadali at kumaripas na bumaba ng kusina si Ken, saklay nito ang bag pack na may badminton at may lamang sports attire sapagkat ito'y papasok na at suot nito ang polo na naka-tack in. 

"Mommy, papasok na po ako ng school" paalam ni Ken habang dumadampot ng sandwich at bahagyang lumapit sa likod ni Elizabeth "Hi, Dad, papasok na po ako ng school. Kumusta ka na po d'yan? " masigasig na wika nito sa kanyang ama. 

"Okay naman ako dito 'nak. Sige,  ingat ka sa pag-alis mo."

"Opo, Dad. Ikaw rin po, " tugon ni Ken. 

"Di ka ba mag-aalmusal?" pag-aalalang tanong ni Elizabeth. 

"Okay lang, Mommy. Tama na 'tong sandwich sa'kin".

"Itabi mo na 'tong P1500, pang taxi mo at budget mo sa school," wika ni Elizabeth. 

"Meron pa naman ako dito, Mommy. D'yan mo na 'yan sayo, Mommy. Pangdagdag na lang 'yan sa gastusin dito sa bahay. Magko-commute na lang ako, " aniya Ken habang puno ang bibig nito ng kinakaing sandwich. 

"Hindi ka ba mali-late n'yan 'pag nag-commute ka? " pag-aalalang tanong ni Elizabeth. 

"Okay lang po, Mommy. Alis na po ako Mommy... Dad... Bye po," nagmadaling lumabas ng bahay habang kain-kain nito ang sandwich. 

"Sige, ingat ka, 'wag kang magpapagutom," pahabol na bilin ni Elizabeth. 

"Opo, Mommy!" pahabol na tugon ni Ken sa labas. 

Bagama't nanlumo si Elizabeth paglabas ni Ken habang kausap nito si Ian. 

"Uh, ba't ka parang nalulungkot ko yata? tanong ni Ian. 

"Kasi naaawa na ako kay Ken. S'ya na lang 'yong naasahan ko dito sa gawaing bahay at pati narin doon sa Fruit juice bar ko kahit galing sa eskwela" 

"May mga anak ka pa naman d'yan ah. Sila Bethy at Jerry. Ba't di mo utusan?" wika ni Ian. 

"Itong si Bethy, e, puro nalang pagpapaganda at pag-o-online ang inaatupag... Si Jerry naman, e,  puro nalang online games... At kung anu-anong kalokohan na lang ang pinaggagagawa".

"Sana pinagsasabihan mo... O kaya paggalitan mo! Tumatanda na lang ang mga yan nang walang alam sa gawaing bahay." 

"Pinagsasabihan ko naman kundi matigas ang ulo. Malalaki na sila, di na sila bata, at di tulad no'ng mga bata pa sila na pwedeng paluin... Kanina nga e, pinagalitan ko 'yong dalawa, sila Bethy at Jerry...  Paano kasi pinagtripan 'tong si Ken. Gumawa ng set-up 'yong dalawa. Nilagay pa naman 'yong manok sa tabi ng kama ni Ken. No'ng paggising naman ng isa, e, nagalit kasi may ipot na pala sa bibig nito," paliwanag ni Elizabeth. 

"Loko, talaga 'tong dalawa e, bakit naman kasi naisipang gawin 'yon?" 

"Ewan ko, baka parte na naman 'yon ng prank nila," tugon ni Elizabeth. 

Samantala may biglang tumawag sa kanya sa labas "Ate Beth!, Ate Beth! ".

"Sandali lang, Hon, may tumatawag sa'kin sa labas, balikan nalang kita Mamaya" pakiusap ni Elizabeth

"Sige, Hon."

 Pansamantalang pinutol ni Elizabeth ang kanilang usapan at lumabas ito upang tingnan kung sino ang tumatawag. Nakita nito si Aling Cora sa tapat ng gate na may dalang payong.

"Ikaw pala 'yan, Cora. Pasok ka."

Binuksan ni Cora ang gate at bahagyang lumapit sa pwerta malapit kay Elizabeth. 

"Ibilin ko muna 'to sa'yong bahay kasi pupunta ako ng Fruit Juice Bar. Nando'n na 'yong labahan malapit sa CR... May mga gulay d'yan sa Refrigerator... Kung gusto mo... Kuha ka at lutuin mo para may pananghalian ka," bilin ni Elizabeth. 

"Opo, ate. Salamat po," sagot ni Aling Cora. 

Lumabas si Elizabeth at bahagyang lumapit sa garage, "Mang Berto! Mango Berto!" mariing tawag niya at nakita nito si Mang Berto na nagpupunas ng side mirror ng kotse. Si Mang Berto ay isang tsuper at may katandaan na rin at nasa saisenta anyos na. Siya ang tagahatid sundo nina Elizabeth galing at papunta ng Fruit Juice Bar. 

"Yes, Ma'am. Bakit po?" tugon ni Mang Berto. 

"Tara na. Punta na tayo ng Fruit Juice Bar."

"Ah. Sige po, Ma'am," tugon ni Mang Berto.

Pumarada ang school bus sa parking area ng Marymount Academy at paspas na nagsilabasan ang mga estudyante galing sa loob. Samantala nakipagsiksikan palabas sina Bethany at Jerry sa mga nag-uunahang estudyante.

"Ate, pasok na 'ko sa classroom namin," paalam ni Jerry. 

"Ewan, ko sa'yo! Bahala ka!" naiinis na tugon Bethany. 

"Hi, Miss, Beautiful!, Miss, Beautiful!" panunuksong sigaw ni Jerry sabay takbo.

Kaya bahagyang hinampas ni Bethany si Jerry ng kanyang clutch bag dahil sa inis nito. "Wag ka nang magpakita sa'kin, a!" Di kalauna'y biglang dumaan malapit sa kanya sina Kyle pati at ang mga kaibigan nito. 

"Hi, Miss, Beautiful!" mahinahong sabi ni Kyle sabay kindat ng mata at bahagyang lumayo. 

"Yuck! Akala mo naman ang gwapo" nagngangawang bulong ni Bethany. 

"Balang araw, mapapasagot din kita."

"Asa ka!" naiiritang tugon ni Bethany sabay talikod. 

Sandali itong umupo sa study area at inilapag ang dalang bag nito sa mesa habang may hinihintay. Matalim na tiningnan nito si Kyle habang nakatalikod ito kausap ang tropa. 

"Kahit kelan 'di kita sasagutin. Duh!... Kala mo kung sino," kausap nito ang sarili. "Ang gwapo n'ya pala 'pag nakangiti." Tinitigan nito si Kyle at bahagyang sinampal ang kanyang sariling mukha. "Di pwede 'to. Gising Bethy! Gising!"

 Samantala may dalawang babaeng estudyante na sina Steffany at Sandra, ang nag-uusap sa kabilang study area. Tila naka-focus ang usapan nila sa walang kamalay-malay na si Bethany. Sila ay kapwa nasa ikalabing dalawang baytang na sa Senior High School sa Marymount Academy. 

Si Steffany ay may pagkatisay, at may kulot at mahabang buhok habang si Sandra ay may pagkamorena, at may mahaba at tuwid na nakataling buhok na kapwa naka-uniporme din tulad ni Bethany. Nanonood sila ng video na kuha mula sa school bus na kung saan naghayag ng damdamin si Kyle kay Bethany. Si Sandra ang kumuha ng video mula sa school bus. Nanlumo si Steffany habang pinapanuod ito at matalim na tiningnan nito si Bethany.

Maikling minuto ang lumipas nang biglang lumapit sa kanya ang kanyang mga matatalik na kaibigan at kaklase na sina Aliyah at Patricia. Si Aliyah ay may pagkatisay at may naka-pony tail na mahaba at maitim na buhok at yakap-yakap nito ang libro. S'ya ang pinakaseryoso sa magkakaibigan 'pag dating sa kuwentuhan. Si Patricia naman ay may pagkatisay din at may maikling buhok. S'ya ang pinakamadaldal at masiyahin 'pagdating sa usapan ng magkakaibigan. 

"Uy, Bes, ba't parang nakabusangot ka? Ang aga-aga," usisa ni Aliyah. 

"Paano ako di magbusangot, e, nabubwesit ako sa kapatid ko. Pati narin do'n sa buwesit na pangit na lalaking 'yon! Feeling gwapo. Ang kulit! Lapit ng lapit sa 'kin... Sabi pa naman sa 'kin, gusto daw n'ya ako, " naiinis na saad ni Bethany at itinuro ng nguso nito si Kyle na nakikipag-usap sa tropa nito. "Yong lalaking 'yon. "

"Sino 'yon? 'Yon ba 'yong nakasuot ng pulang sombrero? Si Kyle? " tanong ni Aliyah. 

"Oo, s'ya nga! " tugon ni Bethany. 

"Anong pangit? E, sobrang gwapo nga. Heartthrob 'yan bes... Heartthrob 'yan dito sa school. 'Yang grupong 'yan, sila ang omega team,  sobrang famous. Crush ko nga s'ya" kinikilig na wika ni Patricia. 

"Diba nasa grade 12 na yan? " tanong ni Aliyah. 

"Oo, bes, kasi itong si ate girl, Bethy, e sobrang pa-choosy. Kung ako n'yan, ay pak! I will grab the opportunity" maharot sabi ni Patricia. 

"Duh? Di ko s'ya type 'no? I choose to die rather than to fall in love with him. Wala akong paki-alam sa kanya."

"Ano ba kasing nangyari kung bakit inis na inis ka sa kanya?" tanong ni Aliyah. 

"E, pinagtripan n'ya ako kanina kasama ng mga kaibigan niya sa school bus!" paliwanag ni Bethany. 

"Baka nga talaga gusto ka n'ya... May suklay ka ba bes Aliyah? Ang haba kasi ng buhok ni bes Bethy," natutuwang saad ni Patricia. 

"Maiba lang ako bes, ba't ang dami mong dala?" tanong ni Aliyah. 

"Mag-o-over night kasi ako sa bahay nila Francesca, gagawa kasi kami ng thesis, " aniya Bethany. 

"Sana tayo na lang 'yong magkagrupo kung walang groupings, " wika na Patricia. 

Biglang may kumuliling sa eskwelahan habang nag-uusap sila.

"Nag-alarm na! Baka nando'n na si Sir! Dalian na natin!" pag-aalala ni Patricia. Kinuha ni Bethany ang nakalapag na gamit mula sa mesa at kumaripas tumakbo ang tatlo papuntang silid aralan subalit sinadyang binangga ni Steffany si Bethany. 

"Aray! Excuse me!" bulalas ni Bethany. 

Bagama't walang kibo na lumakad at hindi man lang lumingon si Steffany at ang kasama nitong si Sandra. 

"Loko 'yon, ah. Hoy!  Bastos! Walang modo!" nagagalit na saad ni Patricia.

"Tama na, Patricia." Pag-awat ni Aliyah. 

"Sino ba 'yong mga 'yon? " tanong ni Bethany. 

"Familiar sila sa 'kin. Pero di ko alam 'yong pangalan nila. Pagkaka-alam ko, nasa Grade 12 na 'yong mga 'yon," saad ni Aliyah. 

Nanlumo si Bethany "Tara na. Hayaan n'yo na sila," yaya niya. 

Nasa biyahe si Ken sa sinasakyang bus papuntang Xavier University kung saan s'ya nag-aaral. Di ito mapakali habang pinagmamasdan ang mga pasahero na tila masakit sa kanyang mga mata na tingnan ang mga pasaherong magkasintahan at mag-asawang naghahawak kamay at naghahalikan habang nasa biyahe. Lalo na't naiinis ito dahil sa magkasintahang nagliligawan sa tabi niya. 

"Maraming lugar na pwedeng maglampungan, e dito pa talaga sa bus! Uy! hindi 'to hotel... Maghihiwalay din kayo for sure...Walang poreber! Di naman sa bitter ako and I know I am NGSB, sana ilugar n'yo naman 'yong lampungan n'yo dahil hindi 'to hotel!" bulong nito sa sarili.

 Pansamantalang tumigil ang bus dahil may isang pasahero na bumaba subalit may mga pasahero din sumakay ng bus. 

Nakatayo ang isang matandang babae kaya di  natiis ni Ken na ipaubaya ang upuan nito "Lola, dito na po kayo."

"Salamat, iho, pagpalain ka ng Diyos," wika ng matandang babae. 

"Walang anuman po, Lola."

"Ang bait mo, iho. Sana magka-girl friend ka na," pabirong wika ng matandang babae.

Subalit nagtaka si Ken kung bakit nasabi ito ng matandang babae at bahagyang ngumiti na lamang.