Chapter 1

"Pirmahan mo na ang mga documents na nagpapatunay na kusang loob mong inililipat sa pangalan ko ang lahat ng mga ariarian mo, Arielle," mariing utos ni Tyron sa kanyang asawang si Arielle.

Nakaupo si Arielle sa upuan at sa harapan niya ay ang mga papeles na nais papirmahan sa kanya ni Tyron.

"Walang hiya ka, Tyron! Isa kang demonyo! Pinagsisisihan ko na nagpakasal ako sa'yo!" umiiyak na sigaw niya. Hindi siya makapaniwala na magagawa ito sa kanya ng asawa niya.

It's been three months magmula nang magpakasal siya kay Tyron na naging boyfriend niya ng limang taon bago niya tinanggap ang alok nitong kasal. At sa loob ng five years and three months nilang magkarelasyon ay ngayon lang niya natuklasan na matagal na pala siyang niloloko nito. At kasama nito sa panloloko sa kanya ay ang kanyang pinsan na si Claire.

Matagal na palang may lihim na relasyon ang dalawa at matagal na rin siyan pinapaikot nila sa ibabaw ng kanilang mga palad. Habang siya ay devoted sa kanyang asawa ito naman ay nagpapakasaya sa kandungan ng ibang babae at winawaldas ang kayamanan niya na naiwan sa kanya ng mga magulang niya. At sa dinami-rami ng babae sa mundo ay sa pinsan pa niya ito nakipagrelasyon.

Tatlong buwan na tiniis niya ang hindi magandang pagtrato sa kanya ng mother-in-law at sister-in-law niya para lamang sa huli ay matuklasan niya ang ginagawang panloloko sa kanya nina Tyron at Claire.

Nagpaalam siya kaninang umaga na a-attend siya sa birthday party ng kanyang best friend. Gabi pa naman gaganapin ang party ngunit maaga siyang magtutungo sa bahay ng kaibigan niya para makatulong siya sa pag-prepare ng mga kakailanganin para sa party nito mamaya.

Ngunit habang nagmamaneho siya sa daan ay bigla siyang nakaramdam ulit ng pagkahilo. Kaya sa halip na sa bahay ng kaibigan niya siya dumiretso ay dumaan muna siya sa clinic na kanyang nadaanan para magpa-check up. Hindi na niya mabilang kung ilang beses na siyang nakaramdam ng ganoon kaya nagpasya na siyang magpatingin sa doktor. Doktor din naman ang kaibigan niya ngunit hindi siya maaasikaso nito ngayon dahil busy ito sa paghahanda par sa birthday party nito mamayang gabi.

Pagkatapos siyang suriin ng doktor ay natuklasan nito na unti-unti siyang nilalason. Ang lason ay inihahalo sa liquid na may lasa kaya hindi niya malalaman na may halong lason pala ang iniinom niya.

Biglang pumasok sa isip niya ang gatas na iniinom niya tuwing gabi. Si Tyron mismo ang nagtitimpla ng gatas at iniinom niya sa harapan nito. Akala niya ay sweet at caring lamang ito sa kanya, iyon pala ay sinisigurado nito na iinumin niya ang gatas na may halong lason.

Matapos niyang matuklasan na lihim siyang nilalason ng asawa niya ay agad siyang umuwi sa bahay niya para komprontahin ito. Nasa bahay si Tyron dahil wala itong pasok sa kompanyang pag-aari niya kung saan ito ang tumatayong vice-president at siya ang chairwoman.

Pagdating niya sa bahay niya ay mas nasorpresa siya nang makita si Claire sa loob ng kanilang silid habang n*******d at enjoy na enjoy na gumigiling sa ibabaw ng asawa niya. Sa galit niya ay sinabunutan at pinagsasampal niya ito ngunit bigla siyang pinukpok sa ulo ni Tyron gamit ang babasaging flower vase kaya nawalan siya ng malay. Nang magising siya ay nakaupo na siya sa upuan at nakaharap sa mga dokumentong nasa ibabaw ng mesa.

Inamin ni Tyron na matagal na silang may relasyon ni Claire at pinlano nila ang pagpapakasal nito sa kanya para magkaroon ito ng karapatan sa kompanyang minana niya mula sa kanyang mga magulang bago namatay ang mga ito. Inamin din nito sa kanya na pinlano nilang dalawa ni Claire ang aksidenteng nangyari sa mga magulang niya dahil natuklasan ng mga ito ang lihim nitong relasyon sa kanyang pinsan. At sa pag-aalala na baka sabihin sa kanya ng parents niya ang natuklasan nila kaya pinatay nila ang mga magulang niya at pinalabas na aksidente lamang ang nangyari.

Labis na nadurog ang puso niya sa kanyang nalaman. Dahil pala sa kanya kaya namatay ang mga magulang niya. Humingi na lamang siya ng tawad sa kanyang mga magulang sa isip niya dahil iyon lang ang kaya niyang gawin.

Pinipilit nina Tyron at Claire na pirmahan niya ang mga papeles para mailipat sa pangalan ng una ang lahat ng mga ariarian niya ngunit nagmatigas siya kaya ilang beses siyang nakatanggap ng sampal mula sa kanilang dalawa.

"Pipirmahan mo ba ang mga papeles o papatayin kita ngayon din?" nananakot ang tono na wika ni Tyron. Kinuha nito ang ballpen sa ibabaw ng mesa at nilagay sa kanyang kamay pagkatapos ay pilit siyang pinapirma.

"Sa tingin mo ay hindi magdududa ang abogado ko kapag nakita niyang kakaiba ang pirma ko?"

Huminto sa pagpupumilit si Tyron na pumirma siya sa papeles at binitawan ang kanyang kamay pagkatapos ay malakas na sinuntok ang mesa.

"Gusto mo ba talaga na mas lalo kang masaktan bago mo pirmahan ang mga papeles?" sigaw ni Tyron na tila ba nauubusan na ng pasensiya sa kanya.

Lumapit si Claire at hinawakan sa dibdib si Tyron. "Ako ang bahala sa kanya, Love. Tingnan lang natin kung hindi siya pumirma."

Naglakad si Claire papunta sa drawer at kinuha ang isang matalas na gunting. Pagkatapos ay malademonyo ang ngisi na naglakad ito palapit sa kanya.

"A-Ano ang gagawin mo, Claire?" nanlalaki ang mga matang tanong niya.

Sa halip na sagutin ang kanyang tanong ay biglang hiniwa ni Claire ang kanyang kaliwang pisngi gamit ang gunting. Napasigaw siya ng malakas sa sobrang sakit. Pakiramdaman niya ay hindi pisngi ang hiniwa nito kundi ang puso niya. Saglit kasi na huminto siya sa paghinga dahil sa sobrang sakit na kanyang nararamdaman. Nang akmang tatayo siya sa upuan ay hinuli naman ni Tyron ang mga kamay niya at muli siyang iniupo sa upuan.

Hindi pa nakuntento si Claire dahil ang kabilang pisngi naman niya ang hiniwa nito at ginuhitan ng ekis. Pakiramdaman niya ay mamamatay na siya sa sobrang sakit ng kanyang mukha. Nahiling niya na sana ay lamunin na lamang siya ng sahig para hindi na niya maramdaman ang ginagawang pangto-tortured sa kanya ng dalawa.

"P-Pipirma na ako!" sigaw niya. Hindi niya batid kung makakayanan pa niya kapag patuloy na hiniwa ni Claire ang kanyang mukha.

"Pipirma ka naman pala gusto mo pa na pahirapan ka muna." Napahalakhak si Tyron. Nakikinita na niya ang kanyang sarili na nakaupo sa upuan na tanging ang pinakamataas na posisyon sa kompanya ang puwedeng maupo lamang.

Nanginginig ang mga kamay na pinulot ni Arielle ang ballpen sa ibabaw ng mesa. Pipirmahan na sana niya ang papeles nang biglang pumasok sa kanyang isip na tiyak papatayin din siya ng dalawa kahit na pumirma pa siya. Sa isiping iyon ay nakaisip siya ng ideya. Sa halip na pumirma ay tinusok niya ng ballpen ang likuran ng kamay ni Tyron na nakapatong sa ibabaw ng lamesa

Malakas na napasigaw si Tyron habang hawak ang ballpen na nakatusok pa sa kamay niya. Agad naman siyang dinaluhan ni Claire para tulungang maalis ang ballpen sa kamay niya.

Sinamantala ni Arielle ang pagkakataong iyon at mabilis siyang tumakas palabas ng kanilang silid habang sumisigaw at humihingi ng tulong. Nakita niya ang katulong na si Emma na palabas sa silid nito. Tumakbo siya palapit dito para humingi ng tulong.

"Help me, Emma! Please, help me!" pagmamakaawa ni Arielle.

"Diyos ko! A-Anong nangyari sa'yo, Ma'am Arielle?" nahintakutang tanong ng katulong.

"Help me! Papatayin ako nina Tyron at Claire. Tumawag ka ng pulis! Bilisan mo!"

"Mahabaging Diyos!" sambit ng katulong. Akmang tatakbo na ito palapit sa telepono nang biglang lumabas sa silid sina Tyron at Claire

"Subukan mong tumawag ng pulis at pati ikaw ay papatayin ko!" mariing banta ni Tyron sa katulong na biglang namutla ang mukha pagkakita dalawa.

Alam ni Arielle na hindi na magagawang tumawag ng pulis ni Emma kaya tumakbo na lamang siya papunta sa hagdan para iligtas ang kanyang sarili. Ngunit naabutan siya ni Tyron bago pa siya makababa sa unang baitang ng hagdan.

"Akala mo makakatakas ka sa amin?"

Isang malakas na suntok sa sikmura ang ibinigay ni Tyron sa kanya. Bigla siyang napaluhod at tila huminto sa pagtibok ang kanyang puso dahil sa sobrang sakit na kanyang naramdaman.

"How dare you, Arielle! I will kill you, bitch!" galit na sigaw naman ni Claire bago siya sinipa ng malakas.

Napasigaw na lamang siya nang bigla lumipad ang katawan niya sa ere bago bumagsak sa gitna ng hagdan at gumulong pababa. Kahit matindi ang tinamo niyang pinsala sa katawan dahil sa pagkakahulog sa hagdan ay nagawa pa rin niyang makabangon. Ang determinasyong makatakas mula sa mga kamay ng dalawa ang nagbibigay ng lakas sa kanya para makatayo.

Nagdidilim man ang kanyang paningin at masakit na masakit ang kanyang ulo at buong katawan ay nagawa pa rin niyang makatakbo sa palabas ng bahay. Tumakbo siya sa gitna ng kalsada, umaasa na sana ay may dumaan na sasakyan para may mahingan siya ng tulong.

Habang tumatakbo siya sa kalsada ng mabagal ay nakarinig siya ng malakas na busina ng kotse sa likuran niya. Sa pag-asang isa sa mga taong nakatira sa subdivision ang sakay ng kotse ay huminto siya sa pagtakbo at humarap sa kanyang likuran. Ngunit pagharap niya ay sinalubong siya ng kotse ni Claire.

Biglang tumilapon sa malayo ang katawan ni Arielle nang matamaan ng bumper ng kotse ni Claire na minamaneho mismo nito sakay ang asawa niya. Nang bumagsak ang duguan niyang katawan sa kalsada ay alam na niyang katapusan na ng buhay niya. Unti-unting ipinikit niya ang kanyang mga mata at tinanggap na lamang ang kamatayan niya.

Sa walang hanggang kadiliman na kanyang nakikita ay biglang nagkaroon ng maliit na liwanag na kasing-laki lamang ng maliit na bola. Ngunit biglang lumaki ang liwanag hanggang sa sinakop na nito ang buong paligid. Sa sobrang liwanag ay nasilaw siya kaya ipinikit niya ang kanyang mga mata.

Nang mawala ang nakasisilaw na liwanag ay saka pa lamang siya nagmulat ng kanyang mga mata para lamang mabigla sa nakita niyang kapaligiran. Nanlaki ang mga mata niya nang makitang nakaupo na siya sa loob ng mamahaling restaurant. At sa harapan niya ay naroon si Tryon na matamis ang pagkakangiti habang hawak ang maliit na kahita na may laman na wedding ring.