189.🔞Book 3: Perpekto

TUMAYO siya at nilabas ang mga bestida sa kabinet niya. Isa-isa niya itong isinukat habang nasa tapat siya ng salamin. Ganito ang ginagawa niya kapag bawal siyang lumabas. Kahit man lang dito ay mabawasan ang pagkabagot niya.

Ang gaganda ng mga bestida ng Ate Yassie niya. Kaso lang ay mahahaba sa kanya. Matangkad kasi ito kumpara sa kanya. Siya kasi ay maliit lang at payat pa. Nilugay niya ang tuwid at itim na napakahaba niyang buhok. Lagpas na ito ng kanyang bewang. Kailan kaya siya gugupitan ulit? Saka kailan darating ang doktor na tumitingin sa ngipin niya na may 'bakal' na brace daw kung tawagin sabi nila Nancy. Nagsisimula na kasi itong lumuwag.

Kinuha niya ang kulay pulang bestida na parang palda. Naalala niya na sinuot ito ng ate niya pero hindi sa bewang kundi sa dibdib banda.

Napasimangot siya ng malaglag ito. Para lang yata ito tao na may malaking hinaharap.

Nasukat na niya ang lahat at napagod na siya sa kakaikot sa harap ng salamin pero wala pa rin si Aling Nita.