Chapter 3: Pagibig na Walang Sukat

Tahimik na lamang na lumuha si Yuna. Inaamin niyang crush niya noon si Felix kahit pa nga sampung taon ang tanda nito sa kanya  noon. Sixteen pa lamang siya nang una niya itong makita at si Felix ay bente-otso na noon. Pinakabatang milyonaryo sa kanilang lugar. Sa loob ng isang taon ay mga apat na beses  niyang nakita ang binata na kausap ng ama. Kaarawan niya nang muli itong makita at isinayaw pa nga siya. Doon muling nabuhay ang  paghanga ni Yuna sa binata at inalagaan na niya iyon sa kanyang puso.

Oo, mahal niya si Felix. Masaya siyang inadya ng kapalaran na maikasal sila. Ramdam  naman niyang pinakialaman siya ni Felix nang gabing iyon kaya hindi na siya tumutol  kahit pa nga mukhang shotgun wedding ang nangyari. Sa kanyang puso ay hindi na magiging mahirap ang mahalin ito kaya naman ipinangako niyang gagawin ang lahat upang matutunan siyang mahalin ng lalaki. 

Naniniwala kasi siya na kung nagawa naman siyang galawin ni Felix ay baka magawa  din siyang mahalin nito.  Ngunit sa paglipas ng mga buwan at taon ay napatunayan ni Yuna na baka ang nangyari sa  kanila ni Felix noon ay dahil lang sa kalasingan nito. Ang mga pagninig nila ni Felix  ngayon ay walang kahulugan at tanging tawag lamang ng laman ng lalaki.

Pagdilat ng mga mata ni Yuna, katulad ng inaasahang ay wala na nga ang asawa sa tabi niya at ilang araw na naman ang lilipas bago siya muling uuwian  nito.  Dalawang taon nang ganito ang routine ng buhay niya sa asawa. Nasasanay na siyang umuuwi lamang si Felix kapag naisipan o kaya naman ay naghahanap  ang katawan sa pangangailangan bilang lalaki. 

Bagamat umaasang sa tagal ng panahon ay may pag-ibig na sa puso ni Felix para sa kanya,  nawawasak ang bawat pag-asa ni Yuna sa tuwing matatapos ang umaga. Isang linggo ang lumipas nang muling makaramdam ng pananakit ng tiyan at sikmura si Yuna. Ito na ang pang limang ulit na sumakit tiyan ni Yuna. Noong mga unang beses ay nagagawa pa niyang tiisin o kung minsan ay itulog na lang pero ngayon ay kakaiba na ito. Uminom na siya ng Buscopan pero hindi halos nawala ang masakit. Kinabukasan ay nagpasya na si Yuna.

“Manang Azun, pwede nyo ho ba akong samahan? Masama ho ang pakiramdam ko. Mahapdi po ang sikmura ko," sabi ni Yuna sa mayordoma sa  mansyon ni Felix.

“Sige hija, naku baka kung ano na yan ha. Kailan ho ba ang huling dalaw ninyo?" tanong ng  matandang nanunukso ang ngiti.

“Naku, Manang Azun, huwag na ho ninyo akong tuksuhin. Malulungkot lang ulit ako," sabi ni  Yuna.

"Bakit wala pa rin ba? Aba bakit natatagalan eh ki-bata-bata mo pa. Sinusunod mo bang inumin ang mga herbal na gamot na pinapainom sayo ng biyenan mo?" tanong nito.

"Opo naman, kahit ho sukang-suka na ako sa panlasa pero wala pa din.”

“Hindi naman kaya sa edad na ni Sir Felix yan kaya mahirap makabuo?” tanong pa ng matanda. “Ay siya! dagdagan mo na lamang ang dasal, hija, at saka gawin mo iyong mga senearch  natin sa internet!” sabi in Manang Azun.

“Manang, ano ba? Hindi ko kaya yun. Saka kas...” Hindi na natuloy ni Yuna ang sasabihin.  Hindi niya masabi na madalas ay mabilisan at brutal ang pagniniig nila ni Felix kaya  madalas ‘yun ang marahil na dahilan kung bakit hindi nagsasalubong at nagtatagpo ang kanilang semilya. ‘Yun ang eksplinasyun na napanuod niya sa internet.

Hindi niya iyon masabi sa matanda kahit pa nga close siya dito na para na rin niyang ina.  Ulila si Yuna sa ina kaya naman napalapit siya sa matandang tagapangasiwa ng bagay ni  Felix.

“Magbibihis na po ako Manang Azun ha, Alis na po tayo agad habang hindi pa makulimlim,” aniya.

Habang nasa biyahe ay naisipan ni Yuna na mag-usisa tungkol sa asawa. Marami na siyang naitanong dito tulad ng paboritong pagkain, ayaw na pagkain, pabango at kulay pati ang mga  hilig at mga maliit na detalye tungkol rito. Pero may nasagap siyang tsismis noon na binalewala niya pero nais ni Yuna na tanungin ang  matanda kung totoo iyon.

“Manang may naging kasintahan ba si Felix noon na nakilala ninyo? ‘Yun ho ba ang dahilan  kung bakit matagal bago nag-asawa si Felix?” tanong ni Yuna sa matanda. Napansin ni Yuna na naging malikot ang mga mata ng matanda at tila naaligaga sa  kinauupuan.

"Manang please, sabihin nyo sa akin. Kailangan kong malaman kung may dahilan ba kaya hanggang  ngayon ay nahihirapan akong kunin ang loob ni Felix,” sabi ni Yuna. Hindi lingid sa matanda ang  sitwasyon nilang mag-asawa. Ito rin kasi ang naging sumbungan niya.

“Alam mo hija, ang pagkakaalam ko ay may kasintahan si Felix noon. Nakilala niya iyon sa Amerika. Kaya nga noon madalas halos dalawang beses sa  isang buwan iyon bumiyahe si Felix para lamang puntahan ang babae. Nakilala ito ni Felix sa Amerika. Napilitan lang umuwi si Felix dahil sa mga negosyo ng pamilya at naiwan doon ang  babae,” kuwento ng matanda.

“Hindi ko alam kung anong nangyari. Basta isang araw na lang umuwi si Sir Felix na lango sa alak at  galit na galit, pinagbabasag ang mga baso at alak sa silid niya habang sinisigaw ang  pangalan ng babae. Galit na galit siya kay Raquel na ayon sa kanya ay ayaw magpakita sa  kanya. Ginawa ni Felix noon ang lahat para lamang kausapin siya ng babae at pinahanap pa niya  ito.”

“Tapos nagulat na lang kami matapos ang isang taon inuwi ka ni Felix at sinabing alagaan ka bilang kanyang asawa…”

Tumango-tango si Yuna sa kuwento ng matanda pero sa kaibuturan ng kanyang puso ay  nasasaktan siya. Sa kwento ng matanda ay parang mahal na mahal ni Felix ang babae sa  nakaraan nito. Kaya ba ganito ito sa kanya ay dahil sa sapilitan ang kasal nila at hindi na siya nagkaroon ng panahon mahanap ang babaeng mahal nito? Kaya ba ganito ang trato nito sa kanya ay dahil mahal pa  nito ang dating kasintahan?

Pinigilan ni Yuna ang maluha dahil nahihiya siyang makita ng matandang kasama ang lahat. Saka para saan ba ang mga luhang iyon. Simulat simula pa lamang sa unang gabi pa lamang niya bilang lihim na asawa ni Felix  inalisan na siya nito ng karapatang lumigaya.

Pababa sila ng kotse ng makita ni Yuna si Felix na may kasamang babae.  Noong una ay akala niya ay hawig lamang dahil ang paalam nito ay luluwas ng ibang bansa  para sa isang conference.

Sumiklab ang galit ni Yuna kahit pa nga halos mamaluktot na sa sakit ng sikmura. Hindi niya  kilala kung sino ang babae pero ang katotohanan na nagsisinungaling si Felix na luluwas ng bansa at hindi man lang umuwi sa kanya ay sapat na para  maghurumintado siya sa galit.