Episode 2: Four Years Ago

Enya's POV

"Nakakainis ka na, Enya! Panay ang absent mo, ha! Ang dalang na nating lumabas at mamasyal, lagi na lang si Braylon ang inaatupag mo." Nakabusangot na si Avalon sabay irap sa'kin. "Tapos ngayon, may gana ka pang magpakita. Minsan hindi mo na rin nasasagot ang tawag ko."

Napayakap siya sa kaibigan sabay alo rito. Ganito pala ang ma-in love—nakakabaliw! Isang araw lang niyang hindi makita ang nobyo, parang hindi na siya mapakali. Alam niyang busy ito sa negosyo dahil businessman ito pero nakakapagtaka naman na ngayong araw, hindi ito tumawag. 18 lang siya at 27 naman ang lalaki. Alam niyang bata pa siya pero para sa kanya, walang kinikilala ang pag-ibig pagdating sa edad. Bestfriend ng asawa ni Avalon ang nobyo niya ngayon.

Hinampas siya ni Avalon sa balikat kaya naparaaray na lang siya. "Day-dreaming pa, girl." Inis nitong saad. "Babaero 'yang boyfriend mo kaya 'wag kang iiyak sa'kin kapag nahuli mo ulit siya. Trust me, friend, hinding-hinding ko makalimutan 'yong sinabi ng katiwala nila sa Seacliff Island. Marami raw dinadala na babae si Braylon do'n sa private resort nila."

Natigilan siya pagkarinig nito at may kirot sa dibdib niya dahil sa araw-araw na paalala ng kaibigan niyang 'to. Inilihim niya ang ilang beses na pagkahuli sa nobyo kasama ang ilang babae. Biglang namasa ang mata niya pero agad siyang tumalikod sa kaibigan para hindi nito makita ang naiiyak niyang mukha. Pinakalma niya muna ang sarili bago tumili nang pagkalakas-lakas.

"Ikaw ba, Ava, ang bata mo pa pero kasal ka na kay Asher. Luh! Huwag mo'kong pangaralan, alam ko ang ginagawa ko. Lahat ng tao nagbabago. A-ouch!"

Hawak na ng kaibigan ang tenga niya para patigilin siya "Talaga lang, ha? Ba't ka umiiyak nang isang araw at bigla ka na lang nawala, huh?"

Nanunuri ang mata nito at hindi niya makayanang salubungin ang nagtatanong na mata nito. "I-iyong ano... ang utang kasi ni Nanay ang laki na." Pagpapalusot niya. "Pinahiya na naman siya ng inutangan niya nang maningil. Hindi na nga nagkasya ang allowance ko kasi binigay ko na lang sa kanya para may pambayad siya." Sa parteng ito, totoong hinahatian niya ang ina sa perang nakukuha niya sa scholarship niya bilang allowance pero hindi ito sapat sa kanila.

Hindi niya nakaugaliang humingi kay Braylon dahil nahihiya siya sa sitwasyon ng buhay nila. Hindi alam ng lalaki na lubog sa utang ang nanay niya. Baka maging isa ito sa mga dahilan para lalo lang siyang bitawan nito lalo pa't on and off din ang relasyon nila.

"Kasi n-naman, muntikan na'kong bumagsak," pagdadahilan niyang muli. "Kaya promise, pag-iigihan ko na. Pakopya, ha?" Nakagat niya na lang ang labi dahil madalas na ang pagsisinungaling niya sa kaibigan. Lahat ng ginagawa niya, sinasabi niya rito pero marami na siyang inililihim lalo na ang ilang beses na pagtataksil ni Braylon sa kanya.

At ngayon nga, may balak na naman siyang um-absent para kitain ang nobyong hindi pa nagpaparamdam sa kanya buong maghapon. Dalawang subject na lang naman at matatapos na sila. A-absenant na lang niya ang dalawang klaseng iyon dahil labis na ang pangungulila niya sa mahal niya. Napapitlag siya nang tapikin siya ng kaibigan sa braso sabay hila sa kanya sa susunod na subject nila. Kahit may asawa na si Avalon, hindi ito huminto ng pag-aaral.

"Wait lang, Avalon. 'Di ba, wala naman tayong gagawin sa subject na 'yon? Puro discussion lang naman 'yan." Hindi niya alam kung papa'no magpapalusot sa kaibigan para makatakas. Umilaw bigla ang utak niya kaya napangiti siya. "Best, magto-toilet lang ako, ha? Mauna ka na, susunod ako sa'yo."

Pinagdikit pa niya ang hita para ipakita rito na ihing-ihing na siya kasabay ng bahagyang panginginig niya. Pinandilatan siya nito ng mata.

"Bilisan mo, ha? Naku, Enya, 'wag ka nang um-absent... please lang!"

"Naman! Sa toilet lang ako pupunta, noh!" May halo na ngang inis ang boses niya bago siya tumalikod. "See you, best." Ngiting-ngiti siya nang maglakad na ito papunta sa room nila kaya nang masigurong hindi na siya makikita nito, bigla siyang tumakbo papuntang gate ng eskwelahan.

Hingal na hingal siya nang makalabas ng school at agad siyang pumasok sa isang tricycle na nakaparada sa gilid ng kalsada. "Manong sa highway lang po." Magta-taxi na lang siya papunta sa Makati kung nasaan ang condo ng nobyo.

Excited siyang bumaba sa mismong tapat ng condominium ng nobyo. Susurpresahin niya si Braylon kaya hindi niya pinaalam ang pagpunta niya ngayon. Napahinto pa siya sa bukana ng entrance ng building. Nilabas niya ang maliit na salamin bago tiningnan ang mukha. Actually, hindi niya gusto ang nakikita dahil patpatin pa rin siya. Kahit ano yatang kain niya, payat pa rin talaga siya. Kuminis na rin siya dahil sa mga sabong nabibili niya sa online pero kulang pa ito sa kanya. Kinapkap niya sa bulsa ng palda ang regalong ibibigay sa lalaki. Isa itong couple bracelet na binili pa niya sa Quiapo noong isang araw. Isa rin sa mga pinagdasal niya na sana ang lalaki na ang makatuluyan niya. Labis-labis ang pagmamahal niya rito. Sa ilang beses na pambababae nito, napili pa rin niyang patawarin ito nang paulit-ulit. Sinekreto niya ito sa bestfriend niyang si Avalon dahil siguradong magwawala ito oras na malaman nitong niloko na siya ni Braylon nang ilang ulit. Siya pa mismo ang sumusuyo sa lalaki para magkabalikan sila kahit bumibitaw na ito sa kanya dahil bata pa raw siya. Naisuko na niya nang ilang beses ang sarili pero maingat ang binata na hindi siya mabuntis. Gumagamit man ito ng proteksyon o hindi, alam nitong hindi sila makakabuo dahil bata pa nga ang tingin nito sa kanya kahit ipagpipilitan niyang nasa tamang edad na siya.

18 years old pa lamang siya at neneng-nene pa ang hitsura pero inspirasyon niya ang kaibigang si Avalon na kinasal sa lalaking mahal nito. Napangiti siya dahil magiging ganito rin sila ni Braylon. Si Asher, ang asawa ng bestfriend niya, dati rin itong bababero kagaya ni Braylon pero nagbago ito kaya pinanghahawakan niya ang bagay na iyon. Magbabago rin ang mahal niya.

Agad siyang nagpulbo nang mapatapat sa unit ng nobyo. Kilala na rin siya ng guard sa baba at may duplicate key din siya ng condo. Muli niyang chineck ang labi, pulang-pula ito ng lipstick. Ngiting-ngiti siya nang mabuksan ang pinto pero nawala ang ngiting iyon nang tuluyan siyang makapasok. Tahimik ang sala. Madalas tumambay ang binata rito pero wala ito ngayon. Maingat pa ang pagkakasara niya sa pinto para hindi makalikha ng ingay. Mga ganitong oras ang uwi nito minsan or pwede ring mamaya pa kapag loaded ito sa trabaho.

Sa kusina siya dumeretso para lutuan ang lalaki. Puno naman lagi ang ref nito kaya hindi na niya kailangan pang mag-grocery. Natigilan siya nang makarating dito dahil parang dinaanan ng bagyo ang kusina nito. May ilang basyo ng alak at pagkain na hindi na natakpan. Na-excite siya nang maisip ang binata, baka tulog ito sa kwarto. Mabilisan niyang nilinis ang kalat at pinunasan din niya ang kitchen top. Nilagay na rin niya ang mga tirang pagkain sa ref. Halos takbuhin niya ang kwarto ng nobyo para makita agad ito pero napahinto siya nang makarinig ng mahinang hagikhikan sa likod ng nakapinid na pinto.

Binundol ng sobrang kaba ang dibdib niya pero sana naman—nakagat niya ang labi. Ilang beses na ba? Hindi niya na mabilang ang pagkahuli sa kataksilan ng nobyo mismo sa kwartong ito. Huminga siya nang malalim bago pinihit nang dahan-dahan ang seradura nito at—pinanlamigan siya ng katawan.

"I can't get enough of you, B-Bray." Sinabayan ito ng hagikgik ng babae habang may ginagawa ito sa ibabaw ng lalaki.

Ang mukha ng nobyo, kagat-labi ito at nakataas pa ang dalawang kamay sa ulunan nito. Hindi niya mapigil ang pagmalisbis ng luha nang makita ang mukha nitong nag-e-enjoy sa kandungan ng iba. Animo nagsasayaw ang haliparot na babae sa ibabaw nito habang hinihimas nito ang dibdib ng nobyo niya. Gusto niyang sumigaw pero hindi niya magawa.

"Is this all you can do?" Napahalakhak nang malakas si Braylon nang tampalin ito ng babae sa noo. "You're so fucking boring, babe."

"Shame on you." Sinundan ito ng malakas na tawa ng babae bago tumingkayad para halikan ang lalaki.

Nakuyom niya nang mariin ang mga kamay at animo may bumara sa lalamunan niya nang lumunok siya. Malaki ang kwarto ng lalaki at bukas ang TV nito pero mahina lang ang sound. Kaya siguro hindi siya napansin ng mga ito dahil busy sa paglalampungan.

Kaya mo 'yan, Enya—gigil niyang usal bago bumuwelo at pabalibag na sinara ang pinto. Lumikha ito ng malakas na kalabog na ikinatingin ng dalawa sa pinto.

"B-Braylon!" malakas niyang hiyaw. "Mga taksil!"

Nakita niya ang pagkagulat ng mga ito. Nabahiran ng ngisi ang mukha ng babae ilang sandali pa at pagkairita naman sa mukha ni Braylon.

"Enya? Fuck!" Gulat na react ng binata. "What are you doing here? May pasok ka, 'di ba?"

Halos talunin niya ang kinaroroonan ng mga ito. Buhok agad ng babae ang nahawakan niya bago ito hinila nang malakas. Nahulog sa lapag ang babae bago ubod lakas niyang sinabunutan ito. Kakalbuhin niya ang isang ito para matigil na ito sa pakikipaglandian sa boyfriend niya.

"Ahh... h-help me, Bray," sigaw ng babae sa biglang paghablot niya ng buhok nito. Isang sampal ang pinakawalan nito sa kanya nang makatayo ito bago nakipagsabunutan din. "It's you again, bitch! You're always interrupting us!"

"Fuck! Can you stop!" Napabangon na lang sa kama si Braylon nang makitang nagsasabunutan na silang dalawa. Una nitong nahawakan si Flera para ihiwalay sa kanya. Agad nitong sinalag ang kamay niya nang pilit pa niyang inaabot ang babae nito. "Enya, please stop and you Flera, magbihis ka na't umalis. Kakausapin ko lang siya."

Nang makakita ng pagkakataon, si Braylon naman ang napagbuntunan niya ng galit. "Walanghiya ka, Braylon, binigay ko ang l-lahat pero kasama mo na naman ang babaeng 'to?" Walang hinto ang paghampas niya sa dibdib ng lalaki na hinahayaan lamang nito.

"Enya..." Wari'y nahahapo na ang binata nang bigla nitong pigilan ang kamay niya. "Tama na, okay? I'm sorry, mag-usap muna tayo." Patamad na dinampot nito ang short at sinuot ito sa harap niya. "Flera, can you leave us?" Binalingan nito ang babae para paalisin na ito.

"I'm not going anywhere, Bray. Tell that kid kung ano ang napasok niya at please, explain it clearly para 'di na siya umasa." Nakasuot na si Flera ng roba bago sila tinalikuran nito.

Akmang susundan niya ang babae pero nahawakan agad ni Braylon ang isang braso niya. Kahit nasasaktan siya, hindi niya kayang mawala ang lalaki sa buhay niya. Sa lalaki lang na ito umiikot ang mundo niya.

"B-Bray." Maraming bakit sa isip niya kung ba't ito paulit-ulit na ginagawa ng lalaking mahal niya. "Bakit?" may paghihirap na tanong niya bago nagsimula na namang sumuntok ang kamay niya sa dibdib nito. "Akala ko okay na tayo pero b-bakit?" Nang mapagod siya sa kakasuntok dito, naisubsob niya ang mukha sa dibdib nito habang umiiyak nang malakas.

"I'm sorry, Enya... let's end this. Bata ka pa. You're only 18 and I'm 27. Mauulit at mauulit lang ito, trust me." Binuhat na siya ng lalaki para maiupo sa kama. "Listen."

Kahit galit siya rito, handa siyang magpatawad basta mangako lang ito. Bigla siyang nagpakandong sa lalaki. Inilingkis niya ang mga braso sa leeg ng nobyo sabay subsob ng mukha sa balikat nito.

"Please, mahal, nangako ka na, eh. B-bakit inulit mo pa?" Hilam na hilam sa luha ang mga mata niya nang titigan ang nangangasul nitong mata. "B-binigay ko naman ang lahat, bakit kulang pa rin ako?" Naramdaman niya ang paghaplos ng lalaki sa buhok niya kaya lalo lang siyang nag-iiyak.