Chapter 5

Napasinghap si Charline sa napaka-gandang tanawin. Kung nakita niya na ang ganda ng paligid habang papalubog ang araw, higit niyang nasilayan ang ganda ng Onok Island ngayong unti-unti ng binabalot ng liwanag ng sikat ng araw ang paligid. Malamig ang simoy ng hanging dumadampi sa kaniyang balat. At parang idinuduyan ng mahinang pag-ihip ng hangin ang mumunting alon sa dalampasigan.

Tila natutukso na siyang hubarin ang see through mesh cover-up na nakatakip sa suot na one-piece swimsuit. Inilinga n'ya ang paningin sa paligid. Abala sa di-kalayuan ang staff ng resort. Iniwan niyang natutulog pa si Xander sa silid kaya medyo nakahinga s'ya ng maluwag sa isiping kahit papano ay ligtas s'ya sa mga titig nito.

Mabilis niyang hinubad ang cover-up at hinayaang nasa buhanginan at inihakbang ang mga paa patungo sa tubig. Natukso siyang sumisid at nagparoo't parito sa hanggang balikat na lalim ng tubig.

Naaliw siya sa pagtatampisaw at nakalimutang naroon nga pala siya dahil nagtatrabaho siya kay Xander Vergara. Muli siyang sumisid at tinungo ang direksyon sa mas malalim na bahagi.

Ngunit natilihan s'ya ng may biglang pumulupot na mga braso sa mga binti. Nagkakawag siya, ngunit mabilis siya nitong niyakap paharap.

Nanlaki ang mga mata ni Charline ng mapagtantong nasa mga bisig siya ni Xander.

"Let me go!" tili niya. Pilit kumakawala sa mga bisig nito, nag-aalala sa maaaring isipin ng mga staff na maaaring makakita sa kanila.

Tumawa ito na lalo niyang ikinainis.

"P-please..." pakiusap niya.

Heto na naman kasi ang nakaka-tensyong mga titig ng gwapong boss. Para siyang kakapusin ng hangin, lalo pa at nararamdaman niya ang pang ibabang bahagi ng katawan nito na natatakpan lang ng swimming trunk nitong suot.

"Ayaw mo bang niyayakap ka?" mapanukso ang mga ngiti nito.

"B-baka may makakita...Nakakahiya..." nauutal niyang saad sa kawalan ng maisagot. Tila nananadya pa nitong ibinundol ang pilit niyang iniiwasang sumagi sa kaniya.

Tumawa ito saka siya binitiwan. Sinamantala ni Charline ang pagkakataon at mabilis na umahon sa tubig at mabilis na dinampot ang cover-up at itinakip sa katawan. Ngunit dahil baka kailanganin pa siya nito, pinili niyang maupo na lang sa buhangin at panoorin ang paglangoy nito.

Nawili siyang pagmasdan ito at panoorin. Ngunit ng tila mapagod na ito bigla itong huminto at tumingin sa direksyon niya. Namumula ang mukhang nag-iwas siya ng tingin at nagkunwaring nakatanaw sa malayo. Nakita niya sa sulok ng mga mata na umahon na ito at papalapit.

Napilitan siyang tingnan ito habang humahakbang patungo sa direksyon niya. Nahigit niya ang paghinga sa tanawing tila nagpainit ng umaga. Parang nililok ng magaling na iskultor ang bawat bahagi ng katawan nito. Tila matitigas na pandesal ang mga abs nito na nakalagay sa tamang pwesto. Napalunok siya ng maisip na ang katawang 'iyun ang unang nakaangkin ng kaniyang katawan. Pinamulahan siya ng mukha ng bumaba ang paningin sa umbok na natatakpan ng swimming trunk, alam niyang hindi ordinaryo ang sukat at laki ng natatakpan ng kapirasong tela. Napalunok siya ng mapagtantong kalahating dipa na lang pala ang agwat nito mula sa mukha niya.

"Mukhang nag i-enjoy ka sa tanawin?" nakangisi nitong tanong.

Napamulagat ang dalaga at mabilis na nakatayo mula sa kinauupuan.

"Charline?"

Kinakabahang tumingala siya rito. Nakakainis! Dumagdag lang sa kagwapuhan nito ang basang buhok. At ang nakakainis pa, hindi niya kayang pigilan ang matinding kaba na hatid ng karisma nito.

"X-xander?"

"Tinatanong kita?"

"Ha? Ano po 'yun? Sorry, hindi ko narinig eh."

"Sabi ko nag i-enjoy ka ba?"

"Y-yes S-sir..." alam niyang nang-iinis lang ito, dahil nahuli siya nitong nakatitig sa katawan nito.

"Bumalik na tayo sa cottage." nagpatiuna na ito sa paglakad, kaya nabunutan siya ng tila tinik sa dibdib.

Bakit ba kahit ang gawing likuran nito kayang maghatid ng kakaibang init sa pakiramdam? Masyado na yata siyang nagiging malandi lately? Gusto niyang sampalin ang sarili. No! Nandito ka para magtrabaho hindi para magbilang ng abs at alamin kung gaano ka-hot ang isang Alexander Vergara.

UMUPO na ito sa bamboo chair ng cottage na nasa dulo ng wooden bridge. Nanatili siyang nakaabang sa mga ipinag-uutos nito.

Natatawang sumenyas ito na umupo siya sa tapat nito. "Ganyan ka ba talaga?" tanong nito.

Nagtatanong ang mga matang tiningnan niya ito.

"Hindi mo alam ang mga ginagawa mo?"

Gusto niya itong irapan. Eh, sa talagang naiilang siya rito eh! Lalo na ngayong kakapiranggot lang ang telang nakatakip sa katawan ng kaharap? Sanay naman siyang makakita ng katawan ng lalake, dahil kahit papano naman ay nararanasang niyang makapunta ng mga beaches dahil isinasama siya ng mga kaklase kapag may outing ang mga ito.

Hindi niya lang talaga kinakaya ang presensya ng taglay nitong karisma.

Bawat tingin kasi nito sa kaniya tila naghahatid ng kakaibang kilabot sa buo niyang pagkatao. May bahagi ng damdamin niya ang nakadarama ng kakaibang excitement sa tuwing tinititigan siya nito. Hindi niya maintindihan ang sarili pero inaamin niyang tila may binubuhay sa pagkatao niya ang bilyonaryong boss.