Chapter 2

ELLIE

NAGING MALAPIT kami sa isa't isa ni Uno. Palagi niya akong hinahatid at sinusundo sa opisina. Madalas na nga kaming tinutukso nina Mark at Reese at ibang mga kaibigan nina Uno na nakilala ko na rin.

Kahit sa opisina ay madalas na rin akong tuksuhin tuwing may nakakakita sa amin na mga ka-officemate ko na hinahatid ako ni Uno at sinunsundo. Ang tiyaga nga niya sa ginagawa niya. Walang araw na hindi niya ginagawa iyon.

Kapag weekend ay umaalis kami at namamasyal or out of town. Iyong malapit lang sa Manila dahil may pasok ng Monday. Minsan naman ay sa apartment kami tumatambay o minsan sa condo unit niya. Basta palagi lang kaming magkasama.

Tinatanong na nga ako ni Reese kung kami na ni Uno pero todo tanggi ako kasi wala namang sinasabi sa akin si Uno na manliligaw siya o kung may balak siya. Nakakahiya naman kung ako pa ang magtatanong. Iisipin pa no'n ay assumera ako and worst baka mapahiya pa ako. Hahayaan ko na lang muna, tutal nag-eenjoy naman kaming dalawa na kasama ang isa't isa.

Naging malapit din ako sa parents ni Uno. Mabait sina Tito Lorenzo at Tita Criselda. Wala akong maipipintas sa kabutihan nila. Kahit mayaman sila ay hindi sila matapobre. Dalawa lang silang magkapatid ni Brett at nakabukod na sila ng tirahan pareho.

Ang pamilya ni Uno ang may-ari ng ilang branches ng sikat na restaurant dito sa Pilipinas.

“Uno, sorry talaga. May work pa ako na kailangan kung tapusin ngayon,” sagot ko kay Uno na nasa kabilang linya.

Isa akong accounting specialist sa isang pribadong kumpanya dito sa Makati. Isang sikat na kumpanya. Month end kasi ngayon kaya madami talaga akong kailangan tapusin.

Nag-uungot kasi sa akin si Uno na sumama sa lakad nilang magkakaibigan, kasama si Reese dahil syempre kasama si Mark.

Halos mag-iisang taon na rin kaming magkaibigan ni Uno at kaming dalawa ang naging malapit. Mas madalas ko na siyang nakakasama kaysa kay Reese dahil busy iyon kay Mark.

"Please?" pangungumbinsi ni Uno sa akin. "Susunduin kita diyan ngayon."

Magkaiba kasi kami ng department ni Reese kaya kahit sa iisang kumpanya lang kami nagtatrabaho ay hindi kami magkasabay na uuwi ngayon. Sa Marketing department kasi si Reese.

"Uno, I'm really sorry. Hindi talaga ako p'wede ngayon. Maybe next time. Mag-enjoy ka na lang kasama sina Brandon."

He heaved a deep sigh.

"Okay. Call me kapag natapos ka na diyan sa trabaho mo. Susunduin kita mamaya." Napangiti ako. Alam kong hindi niya ako matitiis.

"Huwag na. Kaya ko nang umuwi mag-isa mamaya. Mag-enjoy ka na lang kasama sila. Huwag mo na ako isipin dito."

"No. Susunduin kita." He insist. Napakamot ako sa ulo.

"Pero, Uno..." Ayaw ko naman na makihati sa oras ng mga kaibigan niya. Baka kasi isipin nila ay pinaghihigpitan ko si Uno kahit minsan hindi ko siya pinapayagan na uminom kapag hindi ko kilala ang mga kasama niya.

"No buts, okay? tawagan mo ako mamaya."

"Okay. Huwag kang iinom nang madami. Magdadrive ka pa." Paalala ko sa kaniya. Narinig ko pa ang mahina niyang pagtawa sa kabilang linya.

Kapag magdadrive siya ay hindi ko siya pinapayagan na uminom nang marami kahit sina Mark ang kasama niya.

"Yes boss," sagot nito.

" Good! Sige na, magtatrabaho na ako para matapos na ako."

"Bye. Kumain ka, okay." Paalala pa nito bago ko binaba ang tawag niya.

MAAGA akong natapos sa ginagawa ko. Mga alas diyes y media na. Pinadalhan ako ni Uno ng pagkain na galing sa restaurant nila na pagmamay-ari na malapit sa building na pinagtatrabahuan ko. Alam kasi niya na 'di ako makakakain habang nagtatrabaho kaya nagpadeliver na lang ng food sa office. Tuwang-tuwa nga ang mga kasama ko kanina na nagover time rin.

One thing na nagugustuhan ko kay Uno, sobrang thoughtful niya sa akin. Ayaw na ayaw niyang nalilipasan ako ng gutom.

Napangiti ako habang nagliligpit ng gamit sa desk ko. Hindi ko kasi siya tinext or tinawagan para sabihin na tapos na ako. Alam kong nagsabi ako sa kaniya na tatawagan ko siya para sunduin ako. Pero gusto ko kasi siyang surpresahin. Pupuntahan ko siya doon.

Kanina pa niya ako tinatawagan pero hindi ko sinasagot. Nagtext lang ako na 'di pa ako tapos.

Nag-book ako ng grab papuntang D&M bar sa BGC. Habang nasa biyahe ay tumunog ang phone ko. Tumatawag si Uno. Napangiti lang ako pero hindi ko sinagot. Ang kulit talaga niya.

Nagsend siya sa'kin ng message.

'Hey... Ano'ng oras ka matatapos diyan?'

Hindi ko rin siya nireplyan. Siguro ay nakasimangot na iyon ngayon.

Pagdating ko sa D&M bar sa BGC ay agad kong hinanap ang kinaroroonan nina Uno. Napangiti ako nang nakita ko na siya. Sina Reese ay nasa dance floor at nagsasayaw. Si Uno ay nakasimangot at panay ang tingin sa cellphone.

Pinulupot ko ang kamay ko sa leeg niya mula sa likuran. "Waiting for my text, hmm?" bulong ko sa punong tainga niya. Hinalikan ko rin siya sa pisngi.

Ang nakasimangot niyang mukha kanina ay agad napalitan nang malapad na ngiti. "Hey... bakit 'di mo ako tinawagan para sunduin ka?"

Tumayo ako at tumabi sa kaniya sa kinauupuan niya. "Gusto ko lang bumawi sa'yo."

"You should have called me."

"Kaya ko naman ang sarili ko. Thank you nga pala kanina sa food."

Inakbayan niya ako at hinapit sa kaniyang katawan at saka hinalikan sa ulo. "Do you like the food?" Tumango ako. "It's late. Sana talaga tinawagan mo ako. Kanina pa ako naghihintay ng text or tawag mo. Paano kung may nangyaring masama sa'yo?"

Tiningala ko siya at inikutan ng mata. Tinanggal ko rin ang kamay niyang nakaakbay saka umayos nang pagkakaupo. "Masiyado kang praning. Kaya ko naman ang sarili ko, Uno."

"Ayaw ko lang na bumabiyahe ka ng mag-isa tapos gabing-gabi pa."

"Sorry na po..."

Mayamaya ay dumating sina Logan, Mark, Reese at Sandra.

"Oh, mabuti nandito ka na, Ellie. Kanina pa nakasimangot 'yang kaibigan namin," saad ni Mark.

Umupo na rin sila. Kumuha ng tissue si Uno at binato kay Mark kaya nagkatawanan. "Nananakit na ngayon porque may kakampi," dagdag ni Mark.

"Damn you!"

Nagkatinginan kaming dalawa ni Sandra. Tipid niya akong nginitian. Ewan ko ba? kahit kailan ay hindi palagay ang loob ko sa kaniya. Kaibigan din siya ni Uno. Magkababata silang dalawa. Maganda si Sandra at sexy. Mabait naman siya, pero talagang hindi lang ako kumportable kapag alam kung magkasama silang dalawa ni Uno.

Hindi kami malapit sa isa't isa. Hindi naman siya sumasama sa mga lakad namin ni Uno kahit niyayaya namin siya. Lagi niyang rason ay busy siya sa trabaho niya. Kaya nagulat ako na nandito pala siya.

"Tingnan mo, ngumiti na rin sa wakas si Uno. Ikaw lang talaga ang happy pill  niyan, Ellie." Natatawang saad ni Reese. Sinulyapan ko si Uno na nakangiti nga.

"Guys, spare us, okay? Let's enjoy this night," saad ni Uno sa kanila. Kumuha siya ng alak at nakipagcheers sa kanila.

Naramdaman ko ang kamay niyang pinatong sa hita ko. Kapag magkatabi kaming dalawa ay palagi niyang ginagawa iyon. Para bang binabakuran ako. Lihim akong kinikilig tuwing ginagawa niya iyon.

"Are you, okay?" Nilapit niya ang mukha niya sa akin para tanungin dahil maingay ang paligid. Tumango lang ako.

"Yes."

Hindi ko sinasadya pero napatingin ako kay Sandra. Nakatingin pala siya sa amin ni Uno. Iniwas niya ang tingin nang nagkatinginan kaming dalawa.

Past 1AM na. Nakakaramdam na ako ng antok dahil maaga akong gumising kanina. Nageenjoy pa sina Logan at sina Mark. Kami ni Reese ay nagkukuwentuhan lang. Si Uno ay hindi na umalis sa tabi ko simula kanina. Si Sandra ay nakipagsayawan kasama ang ibang mga nakita niyang mga kaibigan.

Panay ang hikab ko na dahil antok na ako at pagod na.

"Uwi na tayo. You're tired." Bulong ni Uno sa'kin. Tumango lang ako dahil gutso ko na rin talaga umuwi.

"Pare, mauuna na kami ni Ellie. She's tired." Paalam niya kina Logan.

"Drive safe, pare," wika ni Mark.

Tumayo si Uno at nilapitan si Sandra. May binulong ito kaya napatingin sa'kin si Sandra saka tumango. Nagpapaalam siguro si Uno.

"SA condo ka na matulog ngayon. It's late at saka para makapagpahinga ka na agad." Uno said while driving. Nakatuon ang atensyon niya sa daan.

"Okay," tipid kong sagot habang nakasandal sa bintana ng kotse at nakatingin sa labas.

Madalas naman akong natutulog sa condo ni Uno. May ilang mga gamit na rin ako na naiwan sa condo niya para may magamit ako sa tuwing doon ako matutulog, katulad ngayon. Kapag late na kami nakakauwi ay doon ako natutulog para hindi na mapagod si Uno na ihatid ako sa apartment ko tapos uuwi siya.

"Kasama pala si Sandra." hindi ko naiwasang sabihin kay Uno. Kanina ko pa iyon gustong sabihin sa kaniya dahil wala naman siyang nabanggit na kasama si Sanda.

"Hmm... yes. Hindi ko alam na sasama siya dahil alam kong busy iyon."

"Alam ba niya na hindi ako kasama kanina?"

Napatingin ako kay Uno at gano'n din siya sa'kin. "Yes. Tinawagan kasi siya ni Mark kanina at niyayaya. Nabanggit ni Mark na hindi ka kasama, para may kasama rin si Reese na makakuwentuhan. Mabuti nga at sumunod."

Parang nanikip ang dibdib ko. Talagang iniiwasan niya ako.

"Hmmm... wala bang boyfriend si Sandra?"

"Wala. Paano naman siya magkakaboyfriend? Nakikita mo naman kung gaano siya ka-busy sa trabaho. Himala nga at nakapunta kanina.

"Bakit 'di mo niligawan si Sandra? Maganda siya at sexy- pang model." Wala sa sariling naitanong ko saka muling binalik ang tingin sa labas ng sasakyan.

"What?!" bigla niyang inihinto ang sasakyan kaya napatingin ako sa kaniya ulit. Nakakunot ang noo niya at salubong ang kilay.

"Wala lang. Naisip ko lang, bakit hindi mo siya niligawan. You look perfect together. Guwapo ka at mayaman. Maganda at mayaman din si Sandra."

"Because I don't like her. She's like a sister to me. Bakit mo naman naisip itanong 'yan? Are you jealous of her?"

Nanlaki ang mata ko. Si Uno naman ay nangingiti. Inirapan ko siya para pagtakpan ang nararamdaman ko.

Nagseselos nga ba ako? Naiinsecure kay Sandra- oo. Sino ba ang hindi? Bagay na bagay silang dalawa ni Uno. Parehas sila ng katayuan sa buhay. Galing sila parehas sa mayamang pamilya. Magkababata pa silang dalawa. Madalas kong naitatanong sa sarili iyon kung bakit hindi man lang sila nagkagustuhan na dalawa.

"H-indi, ah. Sige na magdrive ka na ulit. Inaantok na ako."

Hindi na siya nagsalita pa ulit. Pinaandar niya na lang ang sasakyan. Hindi na rin naman ako umimik pa ulit. Namayani na ang mahabang katahimikan sa pagitan naming dalawa.