Kabanata 7- Contract Signing

Araw ng sabado at walang pasok sa trabaho nang pumunta si Valerie sa opisina ng abogado ni Lester. Kumakabog ang puso niya nang makarating na siya sa loob ng building at kasalukuyang hinahanap ang opisina ni Attorney Leandro Alcantara. Hindi niya maiwasang nerbyusin dahil ngayon ang araw na itatali niya ang kanyang sarili sa isang kasunduan kay Lester Montefalcon, ang lalaking hindi niya masyadong kilala at ni sa panaginip ay hindi niya inaasahang magkrus ang kanilang landas. Oo nga't alam niya ang buong pangalan nito pati na rin ang estado nito sa buhay ngunit ,maliban dito'y wala na siyang nalalaman pa. 

Matapos nilang mag-usap kahapon ng lalaki ay sinabi nito sa kanya na ngayon siya pipirma ng kontrata. At ngayong nandito na siya, hindi niya maiwasang makaramdam ng kaba sa kanyang puso. Pero kailangan niyang magiging matatag alang-alang sa kanyang amang maysakit. Nakatanggap siya ng tawag kahapon mula sa kanyang ina na lumalala na ang sakit ng kanyang ama kaya kinakailangan na nitong maoperahan sa lalong madaling panahon. Kaya nagdesisyon na lamang siya na tanggapin na ang inalok sa kanyang kontrata. Nasa isip niya, madali lang naman ang anim na buwan at pagkatapos noon magiging malaya na siya. Kailangan lang niyang magtiis muna para sa kanyang pamilya. Ito naman ang pangunahing dahilan niya kung bakit nais niyang tanggapin ang kasunduan, at pumapangalawa na lang ang hangarin niyang makaganti kay Ivan.

Nang matiyak niyang ito na nga ang opisina ng abogado ni Lester, kumatok na siya kaagad."Yes, come in", boses ng isang lalaki.  Dahan-dahan niyang pinihit ang doorknob at t'saka pumasok.

ATTY. LEANDRO ALCANTARA.

Ito ang nababasa niya sa namedesk na nasa ibabaw ng mesa ng lalaki kaya natitiyak niyang ito nga ang abogado ni Lester. Ngunit hindi pa ito nag-angat ng tingin dahil abala ito sa pagpindot ng keyboard sa kanyang laptop. Nagbigay-galang siya at pagkatapos niyang sabihin ang kanyang pangalan, saglit na nag-angat ng tingin ang abogado at ngumiti ito sa kanya. Pagkatapos pinapaupo siya nito sa sopa habang hinihintay pa si Lester. Patuloy na itinuon ng abogado ang kanyang mga mata sa kanyang laptop kaya natitigan niya ng maayos ang mukha ng lalaki. Gwapo itong tingnan sa suot nitong business suit at sa tantiya niya'y kaedad lang ito ni Lester. 

Pagkaraan ng tatlumpung minuto, dumating na rin ang kanilang hinihintay. Pagkapasok pa lang ng lalaki ay muli na namang kumakabog ang dibdib niya. Tinanong niya sa kanyang sarili kung tama ba ang desisyon na gagawin niya. 

"O bro, ba't ngayon ka lang. Kanina pa naghihintay si Miss Sandoval sa iyo", nakangiting wika ng abogado.

"Nagkaroon lang ng konting aberya bro, pero okay na naman".

"Nandito na tayo Miss, wala ng urungan. Ipapaliwanag ni Leandro sa iyo ng mabuti ang mga nakasaad sa kontrata. By the way, this is Atty. Leandro Alcantara, ang bestfriend ko at abogado ng aming pamilya", wika ni Lester habang mataman itong nakatingin sa kanya.

Ngumiti lang si Leandro sa kanya at pagkatapos kinuha nito ang papel. Buong linaw na ipinaliwanag nito ang mga nakasaad sa kontrata at ang mga bagay na dapat at hindi dapat gawin. Nakikinig lang siya at tumango-tango paminsan-minsan. Pagkatapos basahin ni Atty. Leandro ang kontrata, tinanong siya nito kung ano ang hindi niya nauunawaan.

"Uhm, Attorney, bakit ho kailangan ko pang doblehin ang bayad sakaling umurong ako sa kasunduan? Hindi ho ba napaka unfair naman iyon? Hindi ba pwedeng isoli lang ang katumbas na halagang naibayad na?",nagtatakang tanong niya.

Bahagyang ngumiti ang abogado at bumaling ng tingin sa kaibigan nito.

"Eh, iyon nga ang mga kondisyones na ibinigay Miss, kaya wala ka ng kawala pa once makapirma ka na ng kontrata. At t'saka anim na buwan lang naman, pagkatapos nu'n wala ng maghahabol pa sa iyo", mariing tugon ni Lester.

"Miss Sandoval, hindi ka namin pinipilit dito, kung sa tingin mo wala kang balak na tapusin ang kontrata, mas mabuti pang hindi mo na pipirmahan", mahinahong sabi ng abogado.

Bumuntong-hininga si Lester, at alam niyang tinotopak na naman ito dahil halata ang pangangasim ng mukha. Masyadong pikon ang lalaking ito, sa isip niya. Napakaikli ng pasensya. Siguro nga dahil mayaman, nakukuha lahat ng gusto at hindi sanay tinatanggihan.

"Just tell us frankly Miss Valerie, take it or leave it?", inis na tanong nito.

"Hoy Mister, h'wag mo akong madaliin. Ikaw kaya ang nangangailangan ng serbisyo ko kaya pwede ba, h'wag mo akong daanin dyan sa topak mo!", inis na ring tugon niya.

"Hindi ako tinopak Miss. Ikaw itong pakipot. Di ba't kailangan mo naman ang pera ko kapalit ng serbisyo mo?"

"Tama na iyan bro, Miss Sandoval. Nandito tayo para magkasundo hindi para mag-away kayo", nakangiting wika ng abogado.

"Hindi pa nga kayo nagkapirmahan, nagtatalo na kayo. Paano niyo mapapaniwala ang lahat na totoong magkasintahan kayong dalawa kung para kayong aso't pusa na ayaw magkasundo?"

Pinandilatan niya ng mata ang lalaking topakin habang nakatingin lang si Leandro sa kanilang dalawa. Hindi nga talaga niya kung bakit hindi sila magkasundo ng lalaki. Hindi niya alam kung bakit mabigat ang loob nito sa kanya at palaging mainitin ang ulo. Hindi nakakapagsalita ng maayos dahil palaging nangingibabaw ang topak.

"Miss Sandoval, handa ka na bang pumirma?", tanong ng abogado.

Saglit na nag-isip siya. Paano kung hindi na lang siya tutuloy? Ngunit paano naman ang kanyang itay na maysakit? Alam ng Diyos kung gaano niya kamahal ang kanyang ama kaya ano ba naman ang magsakrispisyo siya sa loob ng anim na buwan para maipagamot niya ito?

Isang malalim na buntung-hininga ang kanyang pinakawalan.

"Pumapayag na ho ako Attorney. Nakahanda na akong pumirma", aniya. Medyo naging emosyonal siya dahil alam niya ilang sandali na lang ay hindi na siya magiging malaya pa. Kailangan na niyang magiging sunud-sunuran kay Lester Montefalcon.

"Uhm, pwede ho bang mag request kahit isa lang ho Attorney", alanganin wika niya.

"Yes ano iyon, kung mapagkasunduan ninyo ni Lester, why not?", tugon ng abogado.

"Pwede bang patuloy pa rin ako sa pagtatrabaho sa bangko? Napamahal na kasi sa akin ang trabaho ko at ayaw ko ring iwan ang kaibigan ko sa apartment".

"Bro, okay ba yan sa iyo?", binalingan ng abogado ang kaibigan nito.

"Okay naman sa akin yan. Pwede ka pa ring magtrabaho sa bangko pero kapag maikasal na tayo kunyari, hindi ka na pwedeng sumama pa sa kaibigan mo sa apartment. Maari mo naman siyang dalawin but of course doon ka na titira sa bahay ko", mariing tugon nito. 

Tumingin ang abogado sa kanya na parang tinatanong nito kung sumasang-ayon ba siya sa sinabi ni Lester. Tumango lang siya at pagkatapos inihanda na ni Leandro ang pipirmahan niya. Ngunit hiningi muna nito ang kanyang bank account para doon maihulog ang limang milyon na paunang bayad sa kasunduan. 

Matapos magpirmahan silang dalawa, ay kinamayan sila ng abogado ngunit tinapunan sila nito ng isang makahulugang ngiti.

"Ano, trabaho lang ha walang personalan!", wika nito. Pagkatapos ay tinapik nito sa balikat si Lester.

"Bro, goodluck!".

"Salamat bro", tugon ni Lester at t'saka ito tumayo. 

Tumayo na rin siya at naunang lumabas ng opisina pagkatapos makapagpaalam kay Leandro. Maya't maya'y sumunod na rin sa kanya ang lalaki at sinabihan siya nitong doon na sumakay sa kotse.

"Magta-taxi nalang ako Mister", seryosong wika niya.

"Hoy Miss, katatapos lang nating magpirmahan, baka nakalimutan mo dapat mong susundin kung ano man ang sasabihin ko basta't hindi nakakasama sa iyo. Ang bilis mo namang magka amnesya!"

"Hoy Mister, h'wag mo akong masigaw-sigawan at baka nakalimutan mo ring nakasaad doon na dapat magiging mahinahon ka sa pagsasalita!", sarkastikong tugon niya.

"Basta't sumakay ka sa kotse ko. Period!", padabog na wika ng lalaki at saka binuksan ang pintuan ng passenger's seat. Tumalima na lamang siya dahil baka pagtitinginan na naman sila ng mga tao, nakakahiya para sa kanya. Pero itong lalaking kasama niya ay wala yatang hiya sa sarili at kahit babae pinapatulan.

Padabog na isinara ni Valerie ang pintuan ng kotse dahil naiinis talaga siya sa inaasal ni Lester. Pero kailangan niyang magtiis at magsakrispisyo sa kagaspangan ng ugali nito sa loob ng anim na buwan. 

"Hoy, dahan-dahan sa pagsasara ng pinto at mahal yan!", bulyaw nito.

Matalim niyang tiningnan ang lalaki dahil hindi niya akalaing napakayabang nito. Alam naman niyang mahal itong kotse ng mokong na ito pero iyong ipangangalandakan pa? Tssk..

Wala silang imikan sa loob ng sasakyan. Ayaw na niyang makipagtalo pa rito dahil marami na siyang iniisip. Maya't maya tumunog ang kanyang cellphone at agad niya itong kinuha, at baka nagtext sa kanya si Faye. Ngunit notification pala iyon sa email niya na naihulog na sa kanyang bank account ang limang milyong piso. Nababalot sa tuwa ang puso niya dahil sa wakas may pera na rin siya para sa pagpapagamot ng kanyang ama. Ngunit ang sandaling kasiyahan na kanyang naramdaman ay napalitan na naman ng kalungkutan nang masulyapan niyang pumapasok sa loob ng mall ang kanyang dating nobyo at ang babaeng ipinalit nito sa kanya.

"Uhm, saan tayo pupunta Mister?", tanong niya nang makita niyang papasok sila sa parking garage ng mall.

"Dito. Saan pa nga ba?", sarkastikong tugon ni Lester.

Kahit na nagtataka man siya kung bakit papasok sila sa mall ay hindi nalang siya nagtanong pa dahil hindi rin naman sumasagot ng maayos itong lalaking kasama niya. Sa tingin niya ayaw nito sa kanya. Pero bakit siya ang napili nito para alukin ng kasunduan? 

Nang makapasok na sila sa loob ng mall agad silang nagtungo sa women's wear section. Hindi na nakatiis si Valerie at tinanong niya sa lalaki kung bakit doon ang punta nila at kung mamimili lang ito ng mga damit bakit hindi sa men's section?

"Kailangan mong bumili ng damit na isusuot sa birthday ng aking lola bukas. Ipapakilala na kita sa kanya, kaya kailangan mong magiging presentable", walang kaemo-emosyong wika nito.

"Ang ibig mong sabihin, hindi ako presentable kaya kailangang bihisan ako ng maayos? Aba, sobra ka na yata Mister Lester!", bulyaw na tugon niya at saka mabilis na naglakad palayo. Sinundan naman siya kaagad ng lalaki at hinila ang kamay niya.

"Hoy Miss, nandito tayo sa mall. H'wag kang masyadong epal!" mahigpit na hinawakan nito ang kamay niya. Pinagtitinginan tuloy sila ng mga customers sa loob. Ang iba'y parang kinikilig pa sa bangayan nilang dalawa. 

"Miss Valerie, huwag mo akong galitin at hindi mo alam kung anong pwede kong gawin sa iyo", pagbabanta ng lalaki. Pagkatapos ay kinabig siya nito at inakbayan.

"Tayo na at nang makapili ka ng damit na isususot mo bukas."

Papalag pa sana siya ngunit nakita niya sa may di-kalayuan si Ivan at ang babae nito, kaya sumunod na lamang siya kay Lester dahil unang-una, ayaw na niyang magkita pa sila ng dati niyang nobyo.