Chapter 4

Chapter 4

Dream Adelone Cortes

HINDI ko alam kung paano haharapin si Blaze kaya umaga na pero nakahiga pa rin ako at nakatulala sa kisame. Idagdag pang hindi ako naligo kagabi at gano'n pa rin ang suot ko. Wala rin akong toothbrush o mouthwash manlang.

Nakakainis! Bakit kasi naiwan ko sa loob 'yung pouch ko. Masyado akong naexcite na makikita ko siya kaya naman hindi na ako makapasok sa sarili kong bahay.

“Dream?”

Napakislot ako at mabilis na bumangon nang kumatok si Blaze kasabay ng pagtawag sa pangalan ko. Lumunok ako at kinagat ang pang-ibabang labi? Sasagot ba ako? Kapag sumagot ako malalaman niyang gising na ako at mapipilitan akong lumabas.

“Gising ka na ba?”

No! Hindi ko siya pwedeng hayaang magsalita riyan gayong gising na ako. Tumikhim ako. “G-Gising na ako.”

“Okay. May banyo diyan. Sa loob ng cabinet may toothbrush na bago pa. Kung gusto kong maligo, pwede mong gamitin muna ang damit ko. Ihahatid naman kita ng kotse mamaya.”

Kinagat ko ang pang-ibaba kong labi. “S-Sige. Salamat.”

“Labas ka nalang ha. Bibili ako ng breakfast natin.”

Dahan-dahan kong kinapa ang dibdib ko kung saan nagwawala nanaman ang puso ko. Simpleng conversation lang 'yon pero grabe na ang epekto sa 'kin. Ano pa kaya kapag ikinasal na kami at nagsasama na sa iisang bubong? Baka araw araw akong himatayin dahil sa kaniya.

Tumayo ako at niligpit ang higaan. Inamoy ko muna ang mga unan at kumot para siguradong hindi natuluan ng laway ko saka ako pumili ng damit sa closet niya. Napapabuntong-hininga ako habang kumukuha ng damit na sa tingin ko ay mas maliit kaysa sa iba niyang damit. Sa huli ay pants at t-shirt na malaki ang nakuha ko.

Agad akong naligo at nagsepilyo. Pagkatapos ay itiniklob ko ang hinubad kong damit saka ipinatong sa kama. Pinagdikit mo ang mga hita ko dahil hindi akl komportable. Sinuot ko ulit kasi ang underwear na suot ko kahapon dahil wala akong choice. Alangang humarap ako sa kaniya na walang panty at bra na suot sa loob.

Nang lumabas ako ng kwarto ay luminga-linga ako para hanapin ang kusina. Tamang-tama naman na dumating si Blaze at napangiti sa akin matapos akong hagurin ng tingin.

Bahagya akong ngumuso. Wala akong suot na sapin sa paa dahil heels ang suot ko kahapon.

“Nagugutom ka na ba?” nakangiting tanong niya.

Awkward akong ngumiti. “Medyo.”

Mahina siyang tumawa saka hinubad ang suot niyang tsinelas. Isuot mo 'to. Malamig ang sahig.

Nanlaki ang mga mata ko. OA na kung OA pero hindi ko inaasahan na ganito siya ka-caring. Kaya siguro maraming nahuhumaling sa kaniya na babae.

“Wear it, Dream. Sumunod ka na rin sa 'kin sa kitchen.” sabi niya bago tumalikod.

Kagat-labi kong isinuot ang tsinelas niyang napakalaki sa 'kin. Sa liit ng paa ko, halos kalahati lang ang nasakop sa tsinelas. 

Agad akong sumunod sa kaniya sa kitchen. Naabutan ko siyang nag-aayos ng mesa. May sopas na nakalagay sa bowl. May fried rice, bacon at egg. May nakatimpla na ring hot chocolate at kape.

Nag-angat siya ng tingin at ngumiti nang maramdaman ang presensiya ko. “Upo ka na. Pasensiya na. Hindi ko kasi natanong ang gusto mo.”

Ngumiti ako. “Okay lang. Uhm...”

Hindi ko alam kung paano sasabihin sa kaniya pero natatakam talaga ako sa sopas. Favorite ko kaya 'yon.

Mahinang tumawa si Blaze kaya napatingin ako sa kaniya. Naghila siya ng isang upuan. “Sit here, miss. Gusto mo ba 'tong sopas?”

Tumango ako saka lumapit sa kaniya. Naupo ako sa upuang hinila niya para sa 'kin. Naupo rin naman siya at inilagay sa harapan ko ang sopas at hot chocolate.

“Kain na tayo.” sabi niya pa saka nag-umpisa nang kumain.

Napangiti ako at nagsimula na rin. Ah! Ang sarap ng sopas! Gustong-gusto ko 'to!

“Oo nga pala, every night ang duty mo diba. Nag-absent ka ba kagabi?”

Napalingon ako sa kaniya at marahang umiling. “Hindi. Day off ko talaga kagabi tapos mamayang gabi, may pasok na ulit ako.”

Tumango-tango siya. “Hindi ba mahirap ang trabaho mo?”

Bahagya akong ngumuso. “Mahirap lalo na't sa ER ako nakalagay pero okay na rin kasi na-eenjoy ko naman. Iyon nga lang, pagod pagod kasi araw-araw may emergency.”

Natahimik na kami pagkatapos n'yon. Nang matapos kami mag-almusal ay nagpresinta ako na maghugas ng plato. Nagpaalam naman siyang maliligo lang at ihahanda ang kotse para maihatid ba ako.

Habang nagsasabon ng mga plato ay napabuntong-hininga ako. Gusto ko pang mag-stay at makipagkwentuhan sa kaniya pero nakakahiya naman masyado. Nakitulog na ako,  nakikain tapos makikipagkwentuhan pa. Mamaya sabihin niya abusado ako.

Napatawa ako saka umiling. Kung anu-anong pumasok sa isip ko.

Mabilis at maingat kong tinapos ang paghuhugas ng plato. Kung nasa bahay ako siguradong kanina pa ako tapos maghugas pero dahil nasa unit ako ni Blaze, kailangan maganda ang pagkakalinis ko ng mga plato para maimpress naman siya sa 'kin.

***

NAPATALON ako sa gulat nang pukpukin ni Blaze ang lock ng pinto ko nang hindi pa umaabot sa tatlo ang bilang ko. Sabi niya kasi magbilang ako ng tatlo at sa pangatlo ay pupukpukin niya ang pinto pero nakakadalawa palang ay inupakan na niya. Siraulo yata 'to.

Humalakhak siya kaya nagtataka ko siyang tiningnan. Naiiling na binuksan niya ang pinto saka tumingin sa 'kin. “After you.”

Napangiti ako saka pumasok. Sumunod naman siya sa 'kin pero hindi niya binitawan ang pinto. Inumpisahan niyang kalagin ang sirang doorknob para palitan ng bago.

“Maligo ka na. Ako nang bahala dito.”

Napatitig ako sa kaniya. “Pero...”

Ngumisi siya. “Hindi kita papasukin, promise.”

Napasinghap ako sa gulat. P-Papasukin?

Ilang saglit ay humalakhak na naman siya saka sumeryoso at tiningnan ulit ako. “Sige na, Dream. Hindi ka na komportable sa suot mo.”

Napakagat ako ng pang-ibabang labi. “S-Sige na nga. Dito ka lang ha.”

Tumango siya at ngumiti. “Dito lang ako.”

Tumalikod ako at naglakad palayo. Palingon-lingon pa ako sa kaniya kaya nakikita ko ang pagtawa-tawa niya at mahinang pag-iling.

Hindi ko alam kung ano ang tumatakbo sa isipan niya at kung bakit siya tumatawa pero sana hindi dahil sa hitsura kong napapajama, malaking t-shirt at nakaheels.

Nakakahiya talaga!

TO BE CONTINUED....