Chapter 93

Pumara ako ng taxi dahil hindi ko pa nakuha ang aking sasakyan. Napahawak ako sa aking sentido pagpasok ko loob ng taxi. Hindi ko alam kung magiging masaya ba ako o malulungkot dahil may gusto ang kapatid ko kay Francine. Natatakot ako na baka mahulog ang loob ni Francine sa aking kapatid.

"Maraming salamat po," sabi ko bago bumaba sa taxi nang nakarating na kami sa labas ng aking bahay. "Keep the change." Dugtong ko.

Madaling araw na pero gising na gising pa rin ako. Hindi man lang ako dinalaw ng antok. Tumakbo ako papasok sa main gate. Agad naman itong binuksan ng mga guwardiya nang nakita nila ako.

"Good morning, Sir!" Rinig kong bati nila pero hindi na ako nag-aksaya pa ng oras para lingonin sila.

Lakad at takbo ang ginawa ko hanggang sa makapasok ako sa loob ng bahay. Tahimik ang buong paligid dahil natutulog na ang lahat. Huminga muna ako ng malalim bago nagtungo sa aking kuwarto. Pagpasok ko sa loob, larawan agad ni Francine ang sumalubong sa akin na nakasabit sa dingding.