Chapter 2

Chapter 2

Naghanap sila ng mauupuan. Mas lalo siyang kinilig dahil bitbit nito ang tray. 

''Marion!'' tawag ni Nancy nang madaanan ang table ng mga ito.

Kumaway siya dito at napansin niyang nakasimangot naman si Jerra.

Lalong naging ampalaya.

"Doon muna ko ha?" paalam niya sa kaibigan.

"Basta mamaya kwento ka ha?" ngingisi-ngising ani Nancy.

Natatawang tumango na lang siya dahil sa pagiging Marites nito.

"Dito ka," tinapik ni Shin ang bakanteng upuan sa tabi nito kaya naupo nga siya.

Tinulungan niya itong maglapag ng mga pagkain sa mesa.

"Masarap ba?" tanong pa nito nung kumakain na sila.

"Oo, favorite ko to. Bakit nga pala nagyaya kang kumain?"

"Wala naman, ayaw mo ba kong kasama?"

"Hindi, ah. Nagtataka lang, kasi madami naman tayong classmate na babae, I mean hindi naman tayo close, eh."

"Pero pwede namang maging close di ba?" nakangiting tanong nito.

"O-Oo naman. Yun lang pala, eh. Thank you ulit dito."

"Welcome. Manonood pala ako ng play, ikaw si Cinderella di ba?" tanong pa nito.

"Thank you. Kaya lang nagalit sa akin sister mo kasi hindi siya yung lead," naalala niyang sabihin.

Ahead sa kanila ng isang taon ang kapatid nitong si Chelsea. Kasama niya ito sa drama club at talaga namang nainis ito sa kanya ng todo dahil sa kanya nga napunta ang role kahit na mas senior pa ito sa kanya.

Kung minsan, nararamdaman niyang tinutotoo nga nito ang sabunot at sampal sa kanya dahil ang step sister na character ang nakuha nito.

"Don't mind her. Brat lang 'yun. Saka ilang beses na rin naman siyang naging star ng drama club. Baka naumay na sa kanya kaya pinalitan siya. Something new."

"Uhm Shin...thank you pala sa pagfollow mo sa'kin ah?"

"Wala 'yun. Galing mo talaga kagabi sa steps na 'yun. Alam mo sa totoo lang kagabi ko lang narealize na maganda ka pala talaga."

Kunwaring umirap siya. Pero kinilig siya dahil sa sinabi nitong maganda siya.

"Bakit dati ba hindi?"

"Cute ka na dati pa. Kaso parang Nene, ang laki kasi ng itinangkad mo ngayon. Pumuti ka rin kaya mas kapansin-pansin ka."

Natawa siya.

"Kasi naman simula nung pandemic hindi na halos makalabas ang mga tao. Sa bahay lang. Saka pinagbabawalan na rin ako ng Lola ko na lumabas-labas kasi nga dalaga na raw ako. Mahirap na. Ikaw rin naman lalo kang pumogi at pang-basketball player na 'yang height mo kahit 15 ka palang din."

"Talaga? Gwapo ko?"

"As if naman hindi mo alam 'yun? Popular kaya kayo nina Grant dito sa school."

"Eh, isa ka ba naman sa mga fan ko?" pabiro nitong tanong.

"Oo..." pag-amin niya.

"Means crush mo ko?"

"Ay walang akong sinabing ganyan..." tumatahip ang dibdib na sabi niya. 

Nako-conscious siya sa titig nito.

"Ako, crush kita."

Nabitiwan niya ang kutsara sa walang gatol na pag-amin nito.

"S-Seryoso ka ba?"

"Oo naman. Kaya nga kita niyaya, eh. Saka may itatanong din sana ako, eh."

"Ano 'yun?"

"May boyfriend ka na ba?"

Mas lalo siyang nataranta sa tanong nito.

"W-Wala pa."

"Pwedeng maging boyfriend mo?"

Shucks! Halos malaglag na siya sa kinauupuan sa confessions nito.

"Agad?"

"Liligawan kita kung nabibilisan ka," nakangiting sagot nito.

Natameme siya.

Totoo bang nangyayari 'to? Parang kailan lang hanggang tanaw lang siya dito.

"Magagalit ang Lola ko. Hindi pa raw ako pwedeng makipagboyfriend, eh."

"Pero kung ikaw lang ang tatanungin? Gusto mo ba kong maging boyfriend mo?"

"Uhm...gusto."

 

Ang lawak ng ngiti nito sa sagot niya.

"Eh, di liligawan na kita."

Grabe ang tili ni Nancy nang magkwento siya sa mga ito habang nakatambay sila sa gilid ng stage ng gym.

Pare-pareho silang member ng drama club. At breaktime nila kaya nakakapagtsikahan sila.

"Hoy Nancy ang ingay mo naman!" saway ni Jerra.

"Ikaw naman ang bitter mo! Selos ka lang, eh," pairap na ani Nancy.

"Shut up! Magsama nga kayo!" galit na sabi nito at akmang tatalikod na ito pero pinigil niya.

"Galit ka ba?" hindi niya naiwasang itanong.

"Oo! Alam mo naman crush ko si Shin."

"At alam mo rin na crush ko siya di ba? Kung nagkabaliktad ba tayo ng sitwasyon na ikaw ang liligawan niya? Iiwas ka ba kasi alam mong magsiselos din ako?" panunubok niya. At hindi ito nakasagot.

"Di ba hindi rin? 'Wag ka ng magalit," pakiusap niya dito.

"Oo nga naman! Para lalaki lang, eh. Kung hindi na pwede si Shin, eh, di sa ibang member ka na lang. Like Grant. Ang gwapo-gwapo rin kaya niya! Iyon nga lang aloof, effort ka lalo para pansinin ka niya," suggest ni Nancy.

"Ewan ko sa inyo," inis pa ring sabi nito at tinalikuran na sila.

"Hay naku, 'wag mo ng pansinin 'yang si sungit, wala naman siyang magagawa kung nagayuma mo si Shin sa galing mong magsayaw!"

"Sira!" natawa siya sa biro nito.

Nahabol na lang niya ng tingin si Jerra. May ugali talaga ito na ayaw nadadaig. Very competitive kasing tao. Hindi na rin naman siya nagtataka dahil napepressured ito sa expectations ng mga magulang nito na parehong magaling na abogado. May sariling law firm ang mga ito kaya angat din sa buhay. Siya naman ay simple lang ang buhay kung ikukumpara dito. Likas lang din siyang matalino kaya nagkaroon siya ng scholarship at malaki ang discount sa tuition kaya siya nakapasok sa private school na iyon.

Ang kaibigan din niyang si Nancy ay may kaya rin dahil sa dami ng baka at baboy na alaga sa malaking lupain ng mga ito.

Pero nalulungkot din siya kung hindi maaalis ang sama ng loob sa kanya ni Jerra. Kaibigan niya ito. Pero ano'ng magagawa niya? Malakas din ang tawag ng puso niyang mapalapit kay Shin.

Nang araw na iyon ay chatmates na sila.

Nang mag-weekend ay nagyaya si Shin na mag-outing sila, kasama ang barkada nito. Pwede rin daw niyang isama ang mga friends niya.

Pinilit pa nila ni Nancy si Jerra na sumama.

At sa huli ay napapayag din naman nila.

Kailangan na lang niyang mapapayag ang Lola niya.

"Sige na La, need naming tapusin ang project namin, eh. Kasama ko naman sina Nancy at Jerra," pangungumbinsi niya sa matanda. Kasama na ang pang-uuto. Alam niyang hindi siya papayagan nitong mag-outing. O yung lakwatsa lang ang dahilan kaya siya lalabas.

Kung minsan nasasakal na talaga siya sa pagkaistrikto nito kaya umaabot sa puntong nakakapagsinungaling na siya. Tulad ngayon.

"Sigurado ka bang project 'yan?" tanong nito habang nakaupo sa tungga-tungga at naggagantsilyo.

"Opo! Peksman!" iniangat pa niya ang kanang kamay.

"O siya, sige. Basta uuwi ka bago mag-alas otso ng gabi ha?"

"Yes! Thank you Lola!"

Overnight ang usapan nila ni Shin pero bahala na. At least pinayagan na siya.