Chapter 2

“WALA ka na bang balak umuwi sa bahay natin, Kuya?” tanong ni Aivi habang tinitingnan ang mga malalaking kahon sa loob ng condominium unit ng nakatatandang kapatid na si Aiden. Sinadya niya muna ang kuya bago pumasok sa trabaho.

     Itinulak muna ni Aiden ang sofa sa gusto niyang pwesto nito bago niya binalingan ng tingin ang kapatid, “To be honest, ayoko nang umuwi sa atin. I don’t like it there anymore. Hindi ko magawa ang mga gusto ko. At least kapag may sarili na akong condo unit, may kalayaan na akong gawin ang mga trip ko.”

     Sumimangot si Aivi, “So iiwan mo ako dun? Hahayaan mo na lang ako sa bahay na yun?”

     “Kung ayaw mo na rin dun eh ‘di umalis ka. Hindi naman magagalit sayo si Dad eh. Mas gusto pa nga niya kung bubukod na tayo. We’re adults now, Aivi. Basta ba huwag ka lang titira dito sa condo unit ko. There is no freaking way that I would let you stay here,” untag ni Aiden sa kapatid habang nagpupunas ng pawis sa mukha gamit ang kamay.

     “Wala naman akong balak makitira sayo dito, ‘no. Gabi-gabi ka lang magdadala ng mga babae dito. Gosh, ayoko nang i-imagine ang mga ginagawa ninyo. The thought of it disgusts me. Kung kani-kanino ka na lang pumapatol, Kuya. It’s disgusting. Very disgusting,” umarte pa ang dalaga na parang nandidiri.

     Natawa na lamang si Aiden sa reaksyon ng kapatid. Hindi kasi gusto nito ang pagiging playboy niya. “Alam mo, kung wala ka rin namang balak na tumulong sa akin, umalis ka na lang. Ang ingay-ingay mo. Tsaka naiistorbo mo itong pag-aayos ko dito.”

     Hindi naman itatanggi ni Aiden ang pagiging isang playboy. Naeenjoy niya talaga ang company ng mga babaeng fini-flirt niya, and he makes the most out of it. Hindi niya naman ginagawang girlfriend ang mga babaeng ito dahil ayaw niya rin namang magkaroon ng seryosong relasyon sa kasalukuyan. Madalas ay puro fling lang ang inaatupag niya, at karamihan sa mga ito ay hindi na lumalampas sa isang buwan.

     Kung itsura ang pag-uusapan, halatang-halata naman ang dahilan kung bakit hindi siya nauubusan ng babae. Kahit pa mukha siyang masungit at suplado, isang kabaliktaran naman niyon ang pag-uugali niya. At ang pagiging magandang lalaki ang naging puhunan ng isang Aiden Lazaro para maging isang sikat at matagumpay na modelo. Dahil na rin sa mga proyekto at photoshoot na kinabahagian niya, lumaki ang kanyang fanbase hindi lamang sa loob ng Pilipinas, kundi pati na sa ibang bansa. Libo-libo ang followers niya sa social media, na talaga namang nag-aabang ng mga updates at posts niya. Madaming fans ang talaga namang naglalaway at nagkakandarapa sa kanya. Dahil sa good looks na taglay niya, naging isang public figure ang binata.

     Subalit kahit kilala siya ng lahat, pinipilit ni Aiden na gawing pribado ang buhay ng kanyang pamilya. Panganay na anak kasi si Aiden ng isang napakayamang businessman at philanthropist na si Antonio Lazaro, at nakatatandang kapatid ng chef na si Aivi Lazaro. Ayaw niyang madamay ang pamilya sa gulo at stress ng pagiging isang celebrity.

Dahil nagagawa niyang itago ang pribadong buhay mula sa mga mata ng mga tao, marami ang hindi nakakaalam na hiwalay na ang mga magulang nina Aiden at Aivi, dahil sumama ang kanilang ina sa ibang lalaki labindalawang taon na ang nakakaraan. 26 na ngayon si Aiden, subalit hindi pa rin naghihilom ang sugat na dulot ng pag-iwan sa kanilang pamilya ng ilaw ng kanilang tahanan.

     Nasaktan nang labis si Aiden sa ginawa ng kanyang ina, at iyon ang itinuturing niyang dahilan kung bakit siya naging babaero. He does not take girls seriously, especially those types of women who throws themselves at him. Ayaw niyang sumeryoso ng mga babaeng easy-type, yung madaling sumasama sa lalaki kapag dinaan mo sa konting bola. Kung magseseryoso siya, gusto niya yung may challenge. Yung tipo ng babae na mahirap mapasagot at mahirap suyuin, para mas may thrill.

     But so far, wala pa siyang nakikilalang ganoong babae, dahil karamihan sa mga babaeng nakakasalamuha niya ay iyong mga tipong kulang na lang maghubad na sa harap niya makuha lamang ang atensyon niya.

     “Wala naman talaga akong balak na tumulong sayo, ‘no. Dumaan lang ako para i-check kung nakapag-ayos ka na ng mga gamit. Tsaka gusto ko rin ma-meet yung neighbors mo dito. Baka mamaya may mga creepy na palang tao dito. Baka kung ano ang gawin sayo.” Sincere naman sa sinabi niya si Aivi. Nag-aalala rin siya para sa kapatid.

     “Wow, ang sweet naman ng kapatid ko,” Aiden stretched his arms wide, waiting for his younger sister to come to him, “Halika nga dito. Payakap ako sa baby sister ko.”

     “Ew, no way! Naliligo ka na kaya sa pawis. You stink, Kuya,” sabi ni Aivi sabay pisil sa ilong.

     “Excuse me, mabango kaya ang pawis ko. Nag-aaway ang mga babae para maamoy lang iyan, ‘no,” pagyayabang ni Aiden sa kapatid.

     “Well, those girls are stupid,” mataray na sabi ni Aivi sa kanyang kuya, “Anyways, I need to leave. Bibisitahin na lang kita ulit. Huwag ka nang mambababae, okay? And be good to your neighbors, especially if they’re women.”

     “You don’t really have to worry, dear sister. I think you know that your brother is exceptionally good with women,” tugon ni Aiden, habang may isang makahulugang ngisi sa gwapo niyang mukha.

     “Ibang good ang ibig kong sabihin, Kuya. Nakakastress ka naman. Ang dumi talaga ng isip mo!” naiinis na sabi ni Aivi bago binato ng isang throw pillow ang kapatid. “O sige Kuya, maiwan na kita. Bye!”

     “Bye din. Ingat sila sayo – I mean, ingat ka sa pagdadrive,” biniro pa ni Aiden sa kapatid habang hinahatid ito papunta sa elevator.

Nang makaalis si Aivi ay naglakad na pabalik si Aiden sa kanyang unit, pero natigilan siya nang mahagip ng paningin niya ang pintuan ng kabilang condominium unit. Hindi niya mapigilang mapangiti habang naaalala ang itsura ng babaeng kapitbahay niya.

     Tumutulong siya noon sa mga trabahador para dalhin ang mga gamit niya sa nilipatan nang maabutan niya ang isang babae na nakatayo sa gitna ng dadaanan niya. Nakapikit ito at humihinga nang malalim, na para bang kinakalma ang sarili. Mukhang hindi nito napansin ang pagdating niya kaya nagkaroon ng kaunting segundo si Aiden para pagmasdan ang dalaga.

     Nang dumilat ang mga mata ng babae ay parang nagulat ito nang makita ang mga paa niya. Marahil ay hindi nito akalain na may nakatayo na sa harap niya. Unti-unting inangat ng dalaga ang mukha niya, and Aiden knew she was staring at his body. Hinubad kasi ni Aiden ang suot niyang t-shirt dahil pinagpapawisan na siya kakabuhat ng mga gamit niya.

     Umangat pa nang kaunti ang paningin ng dalaga, kaya iyon na ang naging pagkakataon ni Aiden para masilayan nang maayos ang mukha ng babaeng kaharap. And what he saw pleased him very much. His neighbor is ridiculously beautiful. Mahaba at malago ang buhok nito na aabot hanggang sa kalahati ng likod. Her eyes reminded him of almonds, at taglay rin niya ang mahahabang pilikmata na nakapagpapungay sa mga mata nito. Matangos ang ilong nito na binagayan ng mapupulang labi na parang ang sarap halikan. Mestisa rin ito at sa tantiya ni Aiden ay hanggang dibdib lamang niya ang dalaga. Hindi nga lang mawari ni Aiden ang hubog ng katawan nito dahil nakasuot ito ng isang black leather jacket.

     What a beauty… ani Aiden sa isipan niya. Napangisi siya dahil sa pagtitig ng dalagang kaharap sa mukha niya. Kakausapin niya sana ito, pero bigla na lamang itong nagtatakbo papunta sa elevator.

     Nang makaalis ang dalaga ay natawa na lamang siya. Her reaction and her beautiful face were more than enough to stimulate Aiden’s interest.

     “I shall see more of you, my pretty neighbour,” sabi ni Aiden habang nakangising naglalakad papasok ng unit niya.