Chapter 5: FACING REALITY

Maagang gumising si Matthew upang pumasok sa opisina. Tulog na tulog pa ang kanyang asawa. Hinalikan niya ito at binulungan ngunit wala itong reaksyon. Kontento pa rin naman siya sa kanyang nakikita.

Maraming lalaki ang inggit na inggit sa kanya dahil siya ang pinalad na mapangasawa ang isang tulad ni Judea ngunit iyon ang akala nila. Hindi nila alam kung gaano sumasakit ang ulo niya dahil sa ginagawa ng asawa.

Tumunog ang kanyang cellphone. "Hello, kumusta? About tonight? Sige, I’ll meet you there,” tugon nito kay Noah Madrigal na isa ring successful businessman. Nakakatuwa ang kanyang kaibigan dahil napangasawa nito ang caregiver ng kanyang Lola Natalia.

Malapit silang magkaibigan ni Noah. Sa kanya humingi ng payo ang lalaki kung ano ang gagawin. Napasubo kasi sa isang arranged marriage ang kaibigan dahil sa huling kahilingan ng kanyang lola na mamamatay na.

Walang masama dahil dalaga naman ang pakakasalan niya kaya lang may ibinabahay na pala siya. Natuloy naman ang kasal at sa bandang huli na-in-love si Noah sa kanyang asawa. The sad thing was Donna left him. And that made him miserable.

Nakita ni Matthew ang pagiging miserable ng buhay nito. Araw – araw ay niyayaya siyang uminom habang tagapakinig lang naman siya sa problema ng kaibigan. Sa bandang huli, mukhang sila pa rin talaga ni Donna dahil hindi niya inasahan ang pagbubuntis nito ng kambal.

Malalaki na rin siguro sina Donita at Donovan. Masuwerte ang kaibigan sa asawa at sa mga anak. At mukhang magkakabaliktad na sila ng puwesto ngayon. Mukhang siya naman ang magdadrama sa muli nilang pagkikita ni Noah.

Kailangan rin niyang makausap ang kaibigan. Medyo mabigat na ang kanyang dinadala at baka isang araw ay sumabog na siya.

Iniwan ni Matthew ang lahat ng alalahanin sa bahay. Trabaho kung trabaho. Tulad ng nakagawian, abala na sa kanyang opisina pagdating ni Matthew. Sinalubong siya ni Naomi habang iniabot niya ang Frapuccino na pinaorder niya. Nakikinig siya sa mga sinasabi nito. Mukhang hectic ang kanyang schedule para sa araw na iyon.

Kailangan niyang pumunta sa vineyard, sa taniman ng ubas upang magkaroon ng regular na pagbisita. Inaral din ni Matthew ang pag-aalaga ng ubas dahil noong bata pa siya ay dinadala rin siya ng ama sa lugar. Dahil sa pagiging workaholic ng ama ay binawian siya ng buhay kaya siya na ang umasikaso sa kanilang negosyo. Malaking ektarya ng lupain ang kanilang pataniman. Hangga’t maaari ay gusto niyang kumustahin ang mga trabahador dito at kung ano ang lagay ng ubasan.

May schedule rin siya sa pagpunta sa planta kung saan pinuproseso ang mga ubas upang gawing alak. Kailangan rin niyang tingnan ang bodega kung saan iniimbak ang maraming bariles nito. Pagkaminsan ay pinapatikim din siya ng konti upang masubukan ang lasa ng bawat alak na nasa bote.

Sa mahabang panahon ng kanilang negosyo ay lumago ito at naging isang korporasyon.

Mahalaga ang alak sa iba’t ibang okasyon, bukod sa serbesa ay mayroon ding alak na gawa sa ubas. Maging noong binata si Matthew ay sinanay na siya ng magulang kung paano tumikim na alak na de kalidad.

“Dapat marunong ka ring pumili ng babaeng de kalidad,” naisingit lang na sabi ng ama noong nabubuhay pa siya.

Siniko ng kanyang ina ang ama. "Kung anu-ano naman ang itinuturo mo kay Matthew, Papa.”

“Ano ka ba? Lalaki ang anak natin.”

Ngunit hindi daw sila tulad ng alak na kailangang tikman o nilalasahan bago malaman ang kanilang kalidad. May tamang panahon para sa mga seryosong bagay.

Pinaalala ng Papa niya na ang babae ay iniingatan at inaalalagaan. Dinidiligan tulad ng halaman. Ibinibigay ang lahat ng kanilang mga pangangailangan. Sa edad niya noon ay hindi niya ito masyadong naiintindihan ngunit ngayon, alam na niya kung ano ang ibig sabihin noon.

Namatay na ang ama ni Matthew bago pa sila ikasal ni Dea kaya maraming beses na nauudlot ang marriage proposal nito. Ang kanyang ina at Ninong Maxwell na lang ang naghatid sa kanya sa altar sa araw ng kanilang kasal.

Ganoon naman ang ginagawa ni Matthew. Sinunod naman niya ang bilin ng ama at natuto siyang maghintay ngunit doon rin niya nalaman na ang alak na kanyang iningatan ay napakialaman na. Mukhang bukas na at may iba nang nakatikim. Isang bagay na hindi rin natanggap ni Matthew ng ganoon kadali because he expects too much from Dea. She could have been honest to him sa kanilang relasyon. Itinago nila iyon sa media at patago pa sila kung mag-date. Hindi niya sinabi ang totoo sa buo niyang pagkatao.

Wala siyang ibang babaeng nakilala kundi si Dea na matagal niyang pinagpantasyahan habang ito ay nasa ibabaw ng rampa. Bukas ang kanyang katawan sa maraming mga mata. Nakikita ng buong mundo ang hubog ng kanyang katawan at konting saplot na lang ang natatakpan ngunit iyon ang hinihingi ng kanyang trabaho.  Maayos naman siyang manamit kapag nasa bahay.

Maihaharap mo naman talaga si Dea sa maraming bisita. Maipagmamalaki mo naman siya sa kanyang panlabas na katangian. Sa ibang bagay na parang natatakpan ng maskara, si Matthew na lang ang nakakaalam kung anong klaseng tao talaga siya. Dahil kapag sila na lang dalawa, lumalabas ang totoong ugali niya.

Matapos ang nakakapagod na pagpunta sa iba’t ibang planta at pakikipag-usap sa iba’t ibang staff ng bawat departamento, ipinaalala ni Naomi kung oorder pa rin ng bulaklak para kay Dea.

Hindi umimik si Matthew. Sa tagal ng panahon ng palagi niyang pagpapadala dito ng bulaklak, lahat ay nakikita lang naman niya sa basurahan. May ibang bulaklak ang nailalagay naman ng kasambahay sa plorera at simula ng maging mag-asawa sila, ni hindi na rin niya narinig na mag-thank you ang asawa sa kanya.

Sa kama lang talaga siya nakakakuha ng kasiyahan sa kanya. May mga panahong hot na hot siya at may mga panahong napaka-frigid talaga. Pero sa ganoon lang talaga maaasahan si Dea.

“Naomi, saan ka ba umoorder ng bulaklak?”

“Sa Eufloria pa rin po Sir, kasi alam na nila ang mga gusto ni Ma’am Dea.”

“Have you ever met the owner of Eufloria?” Umiling ang kanyang sekretarya.

“By the way Sir, ano po palang plano ninyo sa inyong anniversary ni Ma’am Dea? Do I need to make arrangements with Eufloria? Where do you want to celebrate this time? Are you going out of town?”

“Hey, isa-isa lang ang tanong. Mahina ang kalaban.” Napahinto si Naomi. “Huwag mo munang isipin ‘yan, malayo pa naman.”

Napasandal si Matthew. Sampung taon, paano sila magsi-celebrate ng sampung taon ng kanilang pagsasama ni Dea ngayon? Palaging sila na lang dalawa.

“Good afternoon, Sir Matthew,” bati ng mga nakasalubong niyang staff. Kumaway siya at bumati rin.

Pagpasok niya sa loob ng opisina ay naupo siya sa kanyang mesa. Nag-check ng cellphone ngunit walang nag-miss call man lang sa kanya. Wala man lang wrong sent galing sa asawa kaya siya na ang tumawag dito ngunit hindi nito sinasagot ang kanyang cellphone kaya tumawag siya kay Yaya Sita.

“Sir Matthew, umalis po si Ma’am Dea.”

As usual, ano pa nga ba ang bago? Hindi na siya magugulat. Pero sisiguraduhin niyang magtutuos siya pag-uwi nito sa bahay.

Maaagang umuwi si Matthew at nagbukas kaagad siya ng alak. Uminom siya ng uminom hanggang sa abutan siya ng asawa. Madaling araw na itong dumating.