CHAPTER 6 - Act As His Girlfriend

Natigilan ang lahat ng mga babaeng naka paligid at kinikilig kay Jonas at napatingin sila sa 'kin.

Biglang lumakad si jonas papalapit sa 'kin. Napasinghap ang lahat nang kunin niya ang kamay ko at hilahin ako patayo.

Pagtapat namin sa tulalang si Mrs. Valdez ay ipinagpaalam ako ni jonas. Pagkatapos ay hinila na niya ako palabas.

Tila hindi napapansin ni Jonas ang paligid, pero kitang kita ko kung paano ako tingnan nang matalim ng mga babae dito sa department namin. Huhuhu... Jonas, ipinapahamak mo talaga ako!

Hinila ako ni jonas hanggang sa rooftop.

Kinalas ko ang kamay ko at dumistansya sa kanya nang konti. "Jonas, puwede bang sa susunod, sabihan mo na lang ako. H'wag mo na akong hihilahin sa harap ng mga tao."

"Ha? Bakit naman?"

Napahawak ako sa noo ko. "Alam mo ba'ng sa ginagawa mo, e napapahamak ako."

Tumawa siya. "Gan'un ba? Understandable naman 'yon."

"Ano nga pala ang kailangan mo sa 'kin at dito mo pa ako dinala?"

Ang masayang awra ni jonas ay biglang nawala. Bigla siyang nagmukhang problemado.

"Marigold, please tulungan mo naman ako o." Pagsusumamo niya sa 'kin.

"Bakit? Anong nangyari?"

"Sasabihin ko pero... Mangako ka muna na tutulungan mo 'ko." Nakangusong wika ni jonas.

"H-ha?... Um." Hindi ko alam kung dapat ba akong mangako, baka kasi mapasubo ako. Pero dahil may utang na loob ako kay jonas, alam kong dapat ko lang talaga siyang tulungan.

Bahala na. Hindi ko naman siguro ikapapahamak ang pagtulong sa kanya. "Sige."

"T-talaga‽... Thank you!" biglang nabuhayan ang hitsura ni jonas.

"Ano ba kasi ang problema?"

Tumikhim muna si Jonas. "Ganito kasi, kailangan ko ang tulong mo para magpanggap na... girlfriend ko."

"Iyon lang pala e. Hindi mo agad-" natigilan ako. Parang may mali sa narinig ko. "A-ano nga uli?"

Bahagyang inilapit ni jonas ang mukha niya sa 'kin. "Ang sabi ko, kailangan ko ang tulong mo para magpanggap na girlfriend ko."

Nagulat ako't napa igtad sa sinabi ni jonas. "Ano‽ Magpapanggap akong girlfriend mo? B-bakit?"

Napabuntong hininga si jonas. "Pasensiya na marigold, kailangan kasi e. Kung hindi, hindi niya ako titigilan.

Ikinuwento sa 'kin ni jonas ang pulot dulo ng problema:

Noong bata pa si jonas ay mayroon siyang kababatang babae na ipinagkasundo sa kanyang ipakasal paglaki nila.

Ngunit nang mamatay ang magulang ni jonas sa car accident ay hindi na natuloy ang agreement nila dahil ibinayad sa casino at sa ibang pinagkakautangan ng ama ni jonas ang mga ari arian nila.

Nang malamang wala halos natira kay jonas ay iniatras na ng magulang ng kababata niya ang kasal nila.

Ngunit hindi akalain ni jonas na ipipilit pa rin ni chesca ang pagpapakasal sa kanya sa kabila ng pag atras at pagtutol ng mga magulang nito.

Hindi gusto ni jonas si Chesca kaya nakahinga siya nang maluwag nang masira na ang kasunduan nila, pero nagulat siya nang sabihin ni chesca na gusto siya nito at desidido itong magpakasal kahit nawala na kay jonas ang lahat.

"Alam mo ba'ng sumasakit na ang ulo ko sa kaiisip kung paano patitigilin ang babaeng 'yon? Lagi niya akong ini-stalk. Nagiging malaya lang ako kapag pinauuwi siya ng mga magulang niya sa canada. Ngayon, babalik na naman siya dito... Ito na lang ang last resort ko, Kaya sana marigold tulungan mo na ako." Wika ni jonas habang napapasabunot sa sarili.

Naawa ako sa ayos ni jonas na mukhang kunsumido sa buhay kaya lumapit ako't inayos-ayos ang buhok niya.

"Tingin mo ba gagana itong plano mo? Tingnan mo naman ang hitsura ko? Sinong makaka isip na papatol ka sa 'kin? Baka magduda lang si chesca."

Tiningnan ako ni jonas mula paa hanggang ulo. Pagkatapos ay lumapit siya at dahan-dahang iniangat ang mukha ko.

"Bakit mo ba minamaliit ang sarili mo? Hindi mo ba alam marigold na maganda ka?"

Namula ako sa sinabi at sa interaksiyon ni jonas sa 'kin, agad akong dumistansya sa kanya. "T-tutulungan na nga kita, nambobola ka pa."

"Hindi kita binobola no, totoo ang sinasabi ko. And I think you are way better than chesca in many aspects."

Pagbalik ko sa department ay mga nakatingin ang mga kasamahan ko sa 'kin pati si Mrs. Valdez. Binilisan ko ang paglalakad papunta sa mga ka-grupo ko at agad naupo.

"Marigold! Hindi ka nagsasalita a, close pala kayo ni Mr. Villaflores?"

"May something ba sa inyo ni Mr. Villaflores?"

"Oo nga! May pa holding-holding hands pa kayong dalawa!"

Pag upo ko ay 'yun agad ang ibinungad ng ka grupo ko sa 'kin. Napansin ko rin na parang nanghahaba ang mga leeg ng mga nasa kabilang mesa sa direksyon namin.

"H-hindi. May... Pinapagawa lang siya sa 'kin." Palusot ko. pagkatapos ay nagpatay-malisya na 'ko.

Nang matapos na ang maghapong trabaho ay pinaikutan ako ng mga ka-grupo kong babae at tinanong muli tungkol sa nangyari kanina, habang nakatanaw lang sa malayo ang iba ko pang kasamahan sa department.

Hanggang sa nasa lobby na ay sinusundan-sundan nila ako at walang tigil sa kakatanong.

Natigilan kami pare-pareho sa paglalakad nang mamataan namin ang isang paparating na naka shades na babae na may mga bodyguard na naka buntot.

Sa bihis pa lang at sa handbag na dala niya ay mukhang mayaman na ang babae, at kahit naka shades ito nang malaki na halos sakupin na ang mukha niya, tingin ko ay maganda ito.

"Sino kaya 'yan? Hindi kaya, bagong girlfriend na naman ni papa Ceo?" Dinig kong tanong ni carla sa likod.

Biglang lumitaw sa isip ko ang guwapong mukha ng isang lalaki na may malalamig na mga mata. Napapaisip tuloy ako. Puwede pa kayang magbago ang mga gan'ung lalaki balang araw?

Ibinuntong-hininga ko na lang ang panghihinayang na nararamdaman ko at nagtuloy na ng paglalakad habang naiwan sila carla na tinatantiya ang babae, nang lumapit ito sa receptionist.

Paglabas ng building ay nagulat ako nang biglang may kotseng huminto sa harapan ko. pagbabâ ng salamin ay nagulat ako nang makita ko si Mr. Villaflores.

"Ms. Magbanua, get in." Wika niya.

Hindi ako kumilos. Baka kasi nagkakamali lang siya ng taong pi-pick up-in niya at mapahiya lang ako.

"A-ako po?" Sabi ko habang nakaturo sa sarili ko.

"Yes, you... Sumakay ka na, Jonas ask me to pick you up."

Nagtataka man pero nang marinig ko ang pangalan ni Jonas ay sumakay na 'ko. Baka kasi may kinalaman ito sa napag usapan namin sa rooftop.

"Um... Sir, nasaan po si Jonas?" Tanong ko nang tumatakbo na ang sasakyan.

Tumawa muna nang mahina si Mr. Villaflores. "Si jonas? Nagtatagò. Nandito na kasi ang nightmares n'ya."

Makalipas ang halos 30 minuto ay huminto na ang sasakyan. Paglabas ko ay nakita ko na lang na nasa harap ako ng isang mukhang mamahaling boutique.

"Marigold!"

Pagtingin ko sa pinto ay nakita kong nagmamadaling lumabas si jonas. Parang tuwang-tuwa ito nang makita ako.

Umalis na rin si Mr. Villaflores matapos silang mag usap saglit ni jonas.

Hinila ako ni jonas papasok sa loob ngunit binawi ko ang kamay ko na hawak niya.

"Bakit? May problema ba?"

Napatingin ako sa suot ko. "Ano kasi... puwede ba ako d'yan sa loob? Baka palabasin lang ako."

"At bakit naman? Tara na!" At muli na naman niya akong hinila.

Pagpasok sa loob ay magalang Kami binati ng saleslady.

Inilibot ko ang paningin ko sa loob. Hindi ko mapigilang mamangha nang makita ko ang mga naka-display na mga magagandang bestida. Ang gagarang tingnan ng mga disenyo nila at mukhang mga mamahalin at mukhang mga pang sosyalin.

Habang tinitingnan at sinusuri ko ang isa sa mga bestida ay lumapit si jonas na may kasamang babae na mukhang professional.

"This is marigold. Bihisan mo siya nang maganda from head to toe. Dapat 'yung magmumukha siyang socialite... go!" Pagkatapos ay hinila ako ni Jonas at ipinasa d'un sa babae.

"T-teka, Jonas..."

"Don't worry Ms.marigold, kami na ang bahala sa 'yo. Aside from our beautiful dresses na ima-match namin sa 'yo, ay magagaling rin ang glam team namin dito na mag aayos sa 'yo, kaya siguradong lalabas ang ganda at karisma mo sa event na dadaluhan mo." litanya ng babae.

Napalingon ako kay jonas. Anong nangyayari? bakit kailangan akong ayusan at bihisan? Anong event?

"Please marigold... We have to do this. Pasensiya na kung hindi kita nasabihan. Biglaan kasi e. 'Yung leech... I mean si Chesca, nandito na sa bansa at... hina-hunting agad ako." Wika ni Jonas. Ngayon ko lang napansin na mukha siyang stress.

Sumama ako sa babae pero parang kinakabahan ako. Ngayon pa lang kasi ako makakaranas nang ganitong make over sa buong buhay ko.

Tinanggal nila ang salamin ko at pinagsuot nila ako ng contact lens. Akala ko n'ung una ay masakit itong ilagay sa mata pero hindi naman pala.

Matapos make up-an ay hindi na muna nila ako pinaharap sa salamin para makita ang hitsura ko, ang sabi nila ay surprise daw. Pagkatapos ay pinag-sukat nila ako ng pinag-sukat ng mga dress na sa tingin ko naman ay magaganda lahat. Puwede bang suotin ko na lang lahat 'to?

Makalipas ang ilang bihisan ay sa wakas natapos na rin kami. Sila kasi ang magdedesisyon ng dapat kong suotin na naaayon raw sa event.

Nang humarap ako sa salamin ay hindi ako makapaniwalang, ang repleksyon ko ang nakikita ko. Hindi ko akalaing may itinatago pala akong ganitong ganda! Nagmukha akong mayaman at sosyalin!

"Wow! Marigold, you look stunningly gorgeous! Hindi kita nakilala!" Wika ni jonas na naka suit na titig na titig sa 'kin.

Matapos ang ilang papuri sa isa't-isa ay tumungo na kami ni jonas sa party.

Ang sabi ni jonas, pagkabalik na pagkabalik ni Chesca ay nagpa organize agad ito ng party sa mansion nila at in-invite ang lahat ng mga kaibigan nila, at mahigpit na nagpasabi kay jonas na pumunta siya.

Ang ipinag aalala ni jonas ay baka i-announce na ni chesca ang kahibangan nito sa kanya at matali na nang tuluyan kay Chesca. Kaya pala mukhang stress na stress si jonas, tsk.

Kaya ngayong gabi ay ipakikilala niya ako bilang girlfriend niya.

Huminto ang sinasakyan namin sa tapat ng isang malaking bukas na gate. Pagsilip ko sa bintana ay namangha ako sa mga nakita ko. Bigla akong naging excited nang maisip kong makakapasok din ako sa wakas sa isang mansyon.

Habang naglalakad papasok ay inoobserbahan ko ang mga palamuti at mga ilaw sa paligid, maging ang mga magagara't sosyalin na mga suot ng mga taong nadadaanan namin.

"Ang ganda naman pala dito, parang nawawala na rin ang nerbiyos ko... Ano nga palang negosyo ng pamilya ni Chesca, bakit ganito sila kayaman?" Tanong ko sa katabi ko, ngunit wala akong narinig na sagot.

Paglingon ko kay jonas ay nakita kong nakatitig lang ito sa 'kin. Hindi ko tuloy maiwasang mamula. "Tumingin ka sa dinadaanan mo, baka matisod ka." Tinawanan lang niya ang sinabi ko.

Pagpasok namin ni jonas sa mansiyon ay sinalubong agad kami ng isang babae. Nagitla ako nang makita ang babae. Hindi ako nagkakamali, kahit naka shades s'ya kanina, siya 'yung babae sa lobby na may kasamang mga bodyguards.

Malamig akong tiningnan ng babae. "Jonas, sino 'to?" Pagkatapos ay hinaguran niya ako ng tingin.

"Long time no see, chesca.. Im glad to introduce to you, my girlfriend, marigold."

"Impossible!!"

Nagulat ako at napa hawak sa dibdib ko nang biglaang sumigaw si chesca. Napukaw din ang atensyon ng mga tao sa paligid at napalingon sa 'min. Hindi kaya bipolar 'to?

"Your lying right? right jonas? Hindi ka naman nagka girlfriend since birth e. Kaya paano'ng..." Biglang huminahon si chesca at nakangiti na ito. Hindi kaya may something s'ya?

Nang mga oras na 'yon ay narinig kong nagkakaingay ang mga tao sa likuran namin na parang may dumating. Dahil nasa daanan kami ay tumabi kami sa gilid.

"I'm not done with you Jonas, you must explain everything to me." Sabi ni Chesca. Bago umalis ay tiningnan muna niya ako nang matalim.

Sinalubong ni Chesca ang kararating lang na bisita. Dahil maraming tao sa entrance ay hindi ko makita kung sino iyon.

"Kuya chardon! I'm so glad you came!"

Nagulat ako nang marinig si Chesca. Chardon? Nandito si Mr. Atanante?

nakumpirma ko ang iniisip ko nang bumungad na sa paningin ang mala Adonis na mukha ng isang lalaki sa entrance.