Kabanata 0249

Matapos maging biktima ng isang malagim na trahedya, nagpasya si Ella Apostol na hanapin muli ang kanyang kaligayahan sa pamamagitan ng pagbisita sa iba’t-ibang bansa. Nang magtungo siya sa Italya upang saksihan ang kasal ng matalik na kaibigan na si Diana, muling nagsanga ang landas nila ni Ardian Dimarco, ang pinsan ng kaibigan at gaya rin niyang sawimpalad sa pag-ibig.

Ang sandaling kumustuhan at kwentuhan, dagdagan pa ng kaunting impluwensiya ng alak, ay nauwi sa isang mapusok na gabi sa pagitan nila ni Ardian. Dahil sa kalituhan at labis na kahihiyan sa nagawang kamalian, umalis si Ella at nagsimula ng bagong buhay sa Espanya, malayo sa mga kaibigan at kakilala.

Tatlong taon ang matuling lumipas, isa nang arts teacher at wedding singer si Ella. Sa pamamagitan ng kanyang mga bagong kaibigan sa events industry, kinuha siyang singer sa kasal ng anak ng pinakamayamang tao sa Espanya. Subalit may isang problema; ang groom ay walang iba kundi si Ardian.

Maatim ba ni Ella na umawit sa kasal ng lalaki na aminin man niya o hindi'y, mayroong espesyal na puwang sa kanyang puso? O mas makakabuti kayang muli siyang magpakalayo-layo? Kung aalis siyang muli, paano niya sasabihin kay Ardian... na nagbunga ang isang gabi ng kanilang pagkakamali?