Chapter 58

“Kuya, kumain ka muna.” Pang limang beses ng dumalaw si Dave sa kwarto ni Mr. Shein. Dalawang buwan na rin kasi itong nagkulong sa kwarto niya.

“Tinatapos ko lang itong report, Dave. Kakain rin ako.”

Hindi makatingin si Mr. Shein sa kapatid ng asawa niya at iginugol ang attention sa mga papeles sa harapan. Lumabas si Dave at tumingin sa mga tao sa labas na naghihintay ng sasabihin niya.

“Ayaw pa rin?” Nag-aalalang tanong ni Lee dito. Tumango si Dave at sa hindi inaasahang pagkakataon, dalawang bata ang nag-unahan sa pagtakbo papasok sa kwarto ni Mr. Shein.

Nagulat ang lahat sa presenya ni Rico at Sico.

“Pa,” sa pintuan pa lang nabasag na ang boses ni Sico habang tinatawag ang papa niya.

Malaki ang pagbabago sa mga bata at kapansin-pansin iyon. Walang nagsalita sa lahat, tanging luha at pag-iyak lang ni Mr. Shein ang narinig nila no’ng niyakap na siya ng mga anak.

Walang pasakalye na tumakbo ang dalawa at niyakap ang ama. Sa byahe palang, puro iyak na ang naririnig sa mga bata.