Chapter 11 Hi Gorgeous

Siniguro ni Jessica na maayos na ang lahat bago siya umalis.

Mahigit isang oras siya sa harap ng salamin na nag aayos ng sarili para siguruhin na walang mintis ang detalye sa kanya. Simula sa ayos ng buhok, light make up, damit at sapatos na suot hanggang sa manicure at pedicure niya. Nang makuntento na sa wakas sa nakikita sa harap ng salamin, saka lamang lumabas ng kwarto ang dalaga.

Dali dali naman siyang pumunta sa kotse at ng aakmang pasakay na siya dito, tinawag siya ni Manang rose, ang pinakaunang kasambahay nila. "Iha, ere at baunin mo. Bukod sa agahan ay wala naman laman iyang sikmura mo." Sabay abot nito ng maliit na lalagyanan sa kanya. Napangiti naman si Jessica dahil sa thoughtfulness nito simula noon hanggang ngayon. Inabot niya ang binigay nito at nagpasalamat saka nagmamadaling umalis.

Dahil lunch time na, naipit sa gitna ng traffic si Jessica. Inis na inis si Jessica dahil napakaaga niyang gumayak pero heto siya at nasa gitna ng heavy traffic. Mabilis pang umusad ang pagong at nag aalala siyang hindi makarating ng tama sa oras kila Althea. Nag update naman siya dito at sinabing wag mag alala dahil kasalukuyan pa naman silang kumakain ng tanghalian.

Kumulo ang tiyan ni Jessica. Naisip niya, dapat pala ay kumain siya kahit na kaunti bago umalis, bagay na pinag sisihan naman niya. Saka niya naalala ang pinabaon sa kanya ni manang Rose. Binuksan niya ito saka nakita ang chicken salad na may kasamang thousand island dressing na ginawa ng matanda. Her favorite! Tuwang tuwa si Jessica na kinain ito habang nasa sasakyan. Kahit papaano ay naibsan nito ang gutom na kanina pa niya tinitiis.

Pasado ala una na nakadating si Jessica sa bahay nila Althea. Bagay na pinagpasalamat niya dahil sakto na nag aasikaso na ang mga ito paalis.

"Hi tita." Bati ni Jessica kay Emily Romano. Ang ina ng magkakapatid na Romano.

"Oh, hija! Kamusta ka. Saktong sakto ang dating mo. Naghahanda na din kami paalis. Ang akala ko hindi ka na makakasama sa pag sundo kay Alex" Ganting bati naman sa kanya ng ginang.

"Nako sobrang traffic po tita! Buti na lang din at naabutan ko pa kayo dito." Sagot naman niya habang papalapit sa ginang para bumeso.

"Sya, maupo ka na sa loob ng sasakyan at tatawagin ko na ang mag ama para makaalis na din tayo. Mahirap na, baka mauna pa sa atin si Alex sa paglapag."

Tumalima naman si Jessica at naupo na sa loob ng sasakyan ng mag anak. Maya maya pa ay sumunod na din ang mag asawang Romano at si Althea sa kotse. Katabi niya si Althea habang nasa unahan ang mag asawa.

"Kamusta na? Lalo kang gumanda ah. Mukang pinag handaan mo talaga ang pag uwi ni kuya." Biro ni Althea sa kanya. Bagay na kinapula naman ng mga pisngi ni Jessica at tumawa nalang para maitago ang nararamdaman.

"Nako, hindi naman. Siguro naging blooming lang ako kasi nawalan ako ng taga kunsumi sa loob ng dalawang taon." Biro din ni Jessica. Naging dahilan naman ito para magtawanan silang apat sa loon ng sasakyan.

Naging maaliwalas naman ang byahe nila papuntang airport. Pero hindi maalis ang excitement kay Jessica dahil minuto nalang ang iniintay niya para magkita ulit sila ni Alex. Panay ang tingin niya sa relo. Lalo na ng makadating na sila sa waiting area ng airport para salubungin si Alex.

Kanda haba ang leeg niya sa pag silip sa mga pasaherong lumalabas at pilit na hinahanap si Alex.

Makalipas ang ilang minuto, nangawit na sa kakasilip at kakaintay si Jessica. Ayaw man niya ngunit tinatawag siya ng kalikasan kaya nag paalam siya na mag pupunta lang sa CR. Dala na din siguro ng sobrang kaba kaya hindi na niya mapigilan ang pantog.

Makalipas ang ilang minuto, dali dali siyang bumabalik sa waiting area para intayin ulit si Alex.

Nakita niya ang mag asawang Romano at si Althea na may kausap na lalake. Hindi siya maaaring magkami. Si Aaron ito. Pero nasan si Alexander? Napahinto siya sa pag lalakad at nag tatakang naglibot ng paningin para makita kung nasan ang binata pero wala siyang nakitang Alex sa paligid.

Lalakad na sana siya palapit sa mag anak para itanong kung nasaan ito ng may isang pamilyar na boses ang nag salita galing sa likod niya.

Napahinto siya sandali at parang huminto ang paligid niya.

"Hi gorgeous."