Chapter Five

BAKIT ba kita gagawing ama ng anak ko kung pwede namang ninong na lang?

Damn it! Shit! Gigil na gigil na sabi ni Gray habang biling baligtad sa kama. Hanggang sa kasalukuyan kasi ay parang naririnig pa niya ang boses ni Hannah, puno ng excitement. Hindi rin nakaligtas sa paningin niya ang mga mata nitong parang bituin na kumukuti-kutitap. At hindi niya maiwasan ang makaramdam ng panggigigil dahil alam niyang hindi iyon para sa kanya. 

Shit na shit na shit talaga!

Dapat sana ay makahinga na siya nang maluwag dahil hindi na interesadong magpabuntis sa kanya si Hannah. Ibig sabihin, hindi na masisira ang kanilang pagkakaibigan. Ngunit nang sabihin ni Hannah na pwede namang ninong na lang siya, daig pa niya ang hinagisan ng granada.

Talagang hindi niya kayang isipin na may iba ng gusto si Hannah na maging ama ng anak nito. Nang makita nga niya ang lalaking iyon kung gaano ka-sweet kay Hannah ay parang gusto na niyang magwala. Paano pa kapag nalaman niyang nagtalik ang mga ito?

No way!

Pakiramdam niya'y makakapatay siya kapag nangyari iyon. Ang tagal na panahon niyang iningatan si Hannah. Kung minsan nga ay iniiwan niya ang kanyang ka-date para lang mabantayan niya ito sa mga lalaking nagkakainteres dito tapos ngayon, malulusutan lang siya. Mararahas na buntunghininga tuloy ang pinawalan niya. Gusto niya talagang mawala ang pagka-badtrip na kanyang nararamdaman. 

Kung malalaman lang ni Silver ang tumatakbo sa isipan niya ngayon, siguradog ipagpipilitan na naman nitong in-love siya kay Hannah. At tiyak niyang mahihirapan na siyang tumanggi.

Sa kauna-unahang pagkakataon tuloy, tinanghali siya ng gising. Mataas na kasi ang araw nang mapadilat siya. Hindi na nga rin siya sigurado kung anong oras siyang nakatulog. Basta ng magising siya ay dumungaw agad siya sa may bintana. 

Muntik na siyang mapamura nang mahagip ng tingin niya ang mala-Diyosang kagandahan ng isang babae. Ang mapuputi nitong balat at ang mayaman nitong dibdib na kitang-kita dahil may kasikipan ang pang-itaas nitong suot na para lang malapad na bra dahil sleeveless din iyon.

"Shit!" hindi niya napigilang sabihin dahil sa naramdaman niyang paninigas ng isang bahagi ng kanyang katawan.

Hindi pa siya nakaka-recover sa pagkabiglang nararamdaman niya nang lumingon sa gawin niya ang babae na para bang ini-expect na makikita siya. 

"Good Morning," bati ng babaeng kanyang pinagnanasaan. Pagkatapos ay kumaway pa ito sa kanya na para bang siyang-siya ito sa nakitang pagkakatulala niya. Mabuti na lang at nakatago ang kanyang pang-ibabang katawan kaya hindi nito nabuking kung gaano siyang naapektuhan sa hitsura nito. 

"GB!" sigaw nito na talaga naman nagpagimbal sa kanya. Isa lang naman kasi ang tumatawag sa kanya sa pangalang iyon. 

Muli'y napamura siya dahil tuluyan na niyang nakilala kung sino ang babaeng nakabilad halos ang katawan dahil parang malapad na bra at mahabang panty lang ang suot dahil ngumiti na ito sa kanya ng pagkatamis-tamis -- si Hannah.

-

PARANG gustong magdalawang-isip ni Hannah nang makita niyang muli ang kanyang mga pinamili. Napagtanto niya kasing kapag isinuot niya iyon, kitang-kita na ang kanyang balat. Halos ang maseselang parte na lang kasi ng katawan niya ang itatago nu'ng mga damit na pinili niya.

Kung nabubuhay lang ang mga lola niya'y siguradong makakatikim siya ng kurot sa singit. Pinalaki siya ng mga itong konserbatibo tapos ngayon ay ibibilad niya ang katawan para makuha ang pansin ng isang lalaki. Iyon nga lang, may iba pa ring lalaki na nakakita sa halos hubad na niyang katawan pero wala naman siyang pakialam sa mga ito kaya pakiramdam niya'y hindi naman counted iyon. 

Well, si GB naman talaga ang kanyang target kaya tiyak niyang mapapatawad din siya ng kanyang mga lola. Alam naman kasi niyang boto ang mga ito kay GB kahit magkaibigan lang naman sila. Napabuntunghininga tuloy siya ng muling rumehistro sa kanyang isipan ang relasyon nila ni GB.

Magkaibigan.

Mag-bespren.

Ewan niya kung bakit bigla na lang bumigat ang kanyang kalooban sa salitang iyon. Kahit pa sabihing matalik silang magkaibigan ay hindi pa rin mababago ang katotohanan na hanggang doon lang ang relasyon nila.

Mahal na nga ba niya si GB?

Kung paniniwalaan niya ang sinabi nina Chesca at Oliver, marahil 'oo' agad ang kanyang sagot. Si GB lang naman kasi ang labis niyang pinagkakatiwalaan. Siguro nga dahil lagpas dalawang dekada na niya itong kakilala. Sanay na siyang lagi itong nakikita at nakakasama. Ayaw na niyang mabago pa 'yon. Tiyak niya kasing katakut-takot na adjustment na naman ang kanyang gagawin kaya't ninanais niyang manatili ito sa piling niya habambuhay.

Iyon nga lang ba ang dahilan kaya gusto niyang magkaanak sila ni GB?

Marahil, kung magkakaanak sila ni GB tiyak niyang hindi mapuputol ang kanilang relasyon kahit magkaroon pa ito ng sariling pamilya. Alam niya kung gaano karesponsableng bestfriend si GB kaya nasisiguro niyang magiging responsableng ama rin ito.

"Anong kalokohan ang ginagawa mo?" galit na galit na tanong ngayon sa kanya ni GB. 

Hindi niya napigilan ang mangiti sa galit na nakikita sa mga mata ni GB. Katunayan, inaasahan na niya iyon. Kahit naman kasi weakness nitong nakakakita ng babaeng halos hubad na ay hindi nito gustong makita siya na tumutulad sa mga babaeng iyon. 

"Masama bang mag-exercise?" nagmamaang-maangang tanong niyang ganito ang magiging reaksyon ni GB, hindi niya makuhang mailang man lang. Ang lapad pa nga ng ngiti niya rito.

"Mag-exercise ng halos hubad?" hindi makapaniwalang tanong ni GB.

Biglang naglaho ang ngiti sa kanyang labi. Ang inaasahan niya ay makikita ang paghanga sa mga mata nito pero hindi iyon ang nababasa niya sa pagtitig ni GB.

"Wala ba akong karapatang magsuot ng ganito?"

"Wala," mariin niyang sabi.

Ayaw sana niyang paniwalaan ang sinabi nito dahil nakita niya sa mga mata ng tenant niyang lalaki ang paghanga sa mga mata ng makita siya. Gayunman, hindi rin niya maitatanggi sa sariling hindi siya kumportable sa kanyang suot.

"Kailan ka pa natutong magsinungaling, bespren," nang-aasar niyang tanong kay GB.

"I'm not lying."

"Ang dami kayang lalaking lumuwa ang mga mata kanina nang lumabas ako ng bahay." Nakangisi niyang sabi nang maalala niya ang reaksyon ng ilan niyang tenant. May narinig pa nga siyang sumipol.

"Hindi naman kasi kataka-taka kung bakit ganoon ang reaksyon ng mga ito sa kanya. Ngayon lang naman kasi siya nagsuot ng daring. As in sobrang daring.

Sunud-sunod ang murang pinawalan ni GB kaya naman napahagikgik siya. Sa pula kasi ng mukha nito, alam niyang nagagalit ito.

"Hindi ka ba makapaniwala na sexy and hot pala ang bespren mo?" kunwa'y sabi niya sabay nguso. 

"Shut up!"

At bago pa siya muling nakapag-react, hinila na siya nito papasok sa kanyang bahay. Ang lakas ng kanyang pagsinghap nang mapagtanto niya kung anong klaseng paghawak ang ginawa nito sa kanya. Nagkasalikop ang kanilang mga palad. Walang pinagkaiba sa magkarelasyong magka-holding hands.

"Magpalit ka nga ng damit mo," inis nitong sabi sa kanya. Wala pa ring salitang ibig lumabas sa kanyang bibig. Hindi pa rin kasi siya nakaka-recover sa nararamdaman niya nang magdaop ang kanilang mga palad. Pakiramdam niya'y may milyun-milyong boltahe ng kuryente ang nanulay sa bawat himaymay ng kanyang kalamnan.

"Ganito na rin ang iba kong damit. Ang mga luma kong damit, inimpake ko na. Nagdesisyon na akong magpalit ng image."

"Why?"

"Para maakit sa akin ang magiging ama ng baby ko."

"Kung ako lang pala ang aakitin mo, hindi mo na kailangan pang ipakita sa iba ang katawan mo."

"Hindi ikaw ang aakitin ko, 'no," defensive niyang sabi. Siyempre, hindi muna nito kailangang malaman ang totoo hanggang hindi niya nasisiguro na papayag itong maging ama ng kanyang anak. 

Naningkit ang mga mata nito. "Ang lalaking iyon ba?"

Napangiti siya dahil kahit na si GB na ang kanyang kaharap ay rumehistro pa rin ito sa kanyang isipan. "His name is Oliver."

"Gaano mo ba kakilala ang lalaking iyon?" madilim ang mukhang tanong nito. 

Kinagat niya ang pang-ibabang labi para huwag na mangiti. "Kahapon lang kami halos nagkakuwentuhan at kahit sasandaling oras pa lang parang kilalang-kilala ko na siya. Siguro, kami ang destiny."

"Tigilan mo nga 'yang sinasabi mo."

"Palibhasa, wala kang karoma-romansa sa katawan. Ang alam mo lang, tumira nang tumira."

"Magpalit ka ng damit."

"Wala na nga akong ibang damit."

"Hindi ka pwedeng lumabas ng bahay kung wala kang matinong damit."

Natawa siya sa sinabi nito. "Kung umasta ka naman parang tatay. Sus, bakit ba nakalimutan kong wala nga palang pakialam sa akin ang sarili kong ama?" wika niya sabay buntunghininga.

"Ako, may pakialam sa'yo. Best friend mo ako."

Hindi na siya kumibo. Naisip niya kasi, maya-maya naman ay aalis na si GB kaya't magagawa na rin niya ang gusto. Gayunman, wala na rin naman siyang balak na lumabas. dahil marami siyang trabahong haharapin. Saka, si GB lang naman talaga ang dahilan kaya gusto niyang magbago ng image.

"I'm not going anywhere," wika nitong parang nabasa ang laman ng kanyang isip. 

"Hindi ka pupunta sa firm mo?" mangha niyang tanong.

"Ayokong alisin ang tingin ko sa'yo. Mahirap na, baka bigla kang mawala," anitong titig na titig sa kanya. "Anong gusto mong breakfast?"

"Ikaw," wala sa loob niyang sabi. Kung bakit ba naman kasi napatitig pa siya kay GB. Muli tuloy niyang napagtanto kung gaano kaguwapo at kamacho ang kanyang bestfriend lalo na't nasilayan niyang muli ang pilyong ngiti ni GB.

"Gusto mo akong kainin. Game!"

"I-ibig kong sabihin, ikaw, a-anong gusto mong kainin?" kandautal pa siya dahil talagang nataranta siya.

Ngumisi ito bago sumagot. "Kapag ba sinabi kong ikaw, papayag kang kainin kita?"

"Manahimik ka," inis niyang sabi dahil sobra siyang naapektuhan sa sinabi nito.