Chapter Four

MUNTIK na mapatalon si Hannah na nakapuwesto sa may bintana nang biglang magsalita si Oliver. "Umakyat pa tayo kung sisilipin mo rin pala si Abo."

"Abo?" taka niyang tanong. 

"Abo -- Gray sa wikang Ingles," natatawa nitong sabi pero hindi niya makuhang mangiti man lang sa corny joke nito. Pagkaraan ay hinarap niya si Oliver na kampanteng nakaupo sa single sofa na gawa sa narra habang umiinom ng juice. "Teka nga pala, anong ginawa mo sa akin kanina sa may sasakyan?"

Natawa ito. "Kung magsalita ka naman parang hinalikan kita, ah."

"Eh, bakit mo nga ginawa iyon? Nakita ni GB 'yong ginawa mo kaya ang talim-talim ng tingin sa'yo. At kung hindi ko lang napigil ang sarili ko, natulak na kita."

Marahang tawa ang pinawalan nito. "Hindi mo naman ako matutulak dahil wala naman talaga akong planong halikan ka. Gusto ko lang makita ni Abo na kunwari'y hinalikan kita para malaman ko kung may pupuntahan nga ba talaga itong palabas natin."

"Ano bang mayroon ang babae na 'yon at hindi pa niya maitaboy?" inis niyang tanong kay Oliver saka umupo sa pandalawahang upuan. Kahit kasi wala na siya sa may bintana ay nag-iinit pa rin ang kanyang ulo. Paano, parang naka-paste na sa kanyang isipan ang mala-lintang pagkakayapos ng babaeng iyon kay GB.

"Sexy at maganda kasi iyong babae."

"Mukha namang pok --," kahit inis siya ay hindi na niya itinuloy ang sasabihin dahil ayaw niyang manira. Ngunit, talaga namang marami itong lalaking nakakasama kaya hindi na siya magtataka kung sasabihin ni GB na hindi naman ito ang nakauna sa babaeng iyon. Kaya lang dahil gentleman si GB, hinding-hindi ito magkukuwento sa kanya tungkol sa sexcapades nito. Talaga kasing babangasan niya ito kapag nagkuwento ng ganoon sa kanya. 

Tinawanan siya ni Oliver. "Selos ka lang."

"Kung umasta ka naman parang close na close tayo," inis niyang sabi rito pero bigla rin siyang natigilan. Alam niyang nasobrahan siya sa pagtataray kaya na-guilty siyang bigla. Kaya, maya-maya ay nag-sorry rin siya rito. 

Humugot ito nang malalim na buntunghininga. Nang tingnan niya ito'y pilit itong ngumiti. "Sabi ko nga sa'yo, may task ako sa pinsan ko. Iyon ay ang tulungan kang pagselosin si Abo."

"Hindi mo naman kailangang sundin ang ang pinsan mo," nahihiyang sabi niya rito. 

Ngumiti ito sa kanya. "Tulad ng sabi ko, may TF naman. Kaya kung tutuusin ay ako rin ang mas makikinabang."

Kumunot ang noo niya at pinakatitigan ito. Gusto niyang tanungin ito kung kailangan ba talaga nito ng pera para sundin ang 'kalokohan' ng pinsan nito pero ayaw naman niyang ma-offend si Oliver. Kaya, pinili na lang niyang manahimik. Iyon nga lang dahil sa hindi siya nagsasalita ay kung anu-ano naman ang kanyang naiisip. Gaya ng kung anong ginagawa ngayon nina GB at Nicole sa bahay ng kanyang bespren. 

"Pwede mo ba akong samahan?" tanong niya kay Oliver pagkaraan.

Kumunot ang noo nito. "Saan?"

"Mag-shopping. Gusto kong mag-makeover."

Lumapad ang ngiti ni Oliver. "Let's go."

"Ngayon na?" gulat niyang tanong. 

"Hindi ko na hihintayin pang magbago ang isip mo. Saka, talagang kailangan mong magpalit ng image para naman mataranta mo ang puso ni Abo," wika nito sabay palakpak.

Mangha siyang napatingin dito. "Are you gay?"

Nanlaki ang mga mata nito. "Shhh..."

"IKAW, anong drama mo?"

"Saan?" natatawa niyang tanong kay Oliver kahit gets na niya ang tanong nito. Hindi naman kasi siya ang tipo ng tao na nagsasabi ng nararamdaman sa bagong kakilala. Kaya lang, magaan ang loob niya kay Oliver. Siguro dahil pinsan ito ni Chesca. Saka, ito ang unang nagbahagi ng damdamin nito sa kanya. Hindi raw kasi nito maamin sa pamilya ang tunay nitong pagkatao dahil ayaw nitong ma-disappoint ang ama nito. Dati raw heneral ang Papa nito kaya magiging kasiraan dito kung malalaman ng lahat na isa itong bading.

"Bakit hindi ka pa nagkaka-bf? Don't tell me dahil kay Abo? Matagal ka ng in love sa kanya?" maarte nitong tanong sa kanya. Nag-out na ito sa kanya kaya hindi na rin nito itinago sa kanya ang tunay nitong tono at kilos. 

"Ayoko talagang ma-in love dahil ayokong ma-broken hearted. Wala naman kasi akong parents na. Hindi dahil sa dedo na sila kung hindi dahil sa mayroon na silang sari-sariling pamilya. Nagpakasal sila hindi dahil sa nagmamahalan sila kundi dahil pinilit sila ng kanilang mga magulang na magpakasal."

"Arranged marriage. Usong-uso talaga 'yan sa mga rich."

Hindi na siya nakapag-komento sa sinabi ni Oliver dahil tumunog na ang kanyang cellphone.

Nang mabasa niya ang BESTFRIEND GB CALLING, napangiti siya. Pakiramdam niya lahat ng tampo niya rito ay naglaho na. Talagang nakatulong ang pagsa-shopping. Kaya, hindi na siya nagdalawang-isip na i-accept ang call ni GB.

"Where are you?" pagalit nitong tanong matapos siyang mag-'hello'.

"Mall."

"Pupuntahan kita. Saang mall?"

Sinabi muna niyang nasa SM Manila siya siya bago niya sinabing, "Kasama ko si --,"

"Susunduin kita."

"Pero --,"

Natigil siya sa kanyang pagsasalita ng senyasan siya ni Oliver na hayaan na lang si GB.

"Papunta na ako dyan. Kaya, pwede paalisin mo na ang kasama mo," inis nitong sabi saka pinutol ang linya.

"So, itutuloy na ninyo ang date." nanunuksong sabi sa kanya ni Oliver.

Hindi man niya tunay na ka-date si Oliver, sobra pa rin siyang nahiya nang sabihin niyang susunduin siya ni GB. Sa halip na ma-offend, ang lawak pa ng ngiti nito. Ang sabi'y umipekto raw ang kanilang gimik. Dapat sana talaga ay matuwa siya pero di niya makuhang mangiti man lang dahil madilim ang anyo ni GB nang dumating sa mall.

"Ang dami mong pinamili, ah," pansin nito pero wala pa rin itong kangiti-ngiti.

"Ngayon lang kasi ako nag-shopping," kunwa'y balewala niyang sabi kay GB. Hindi pa rin niya pinansin ang malamig na pakikitungo nito kay Oliver.

Hinintay muna kasi ni Oliver na dumating si GB bago ito umalis. Siyempre, bahagi iyon ng 'drama' nito. Kaya naman nang makita ni Oliver na palapit si GB, naging extra sweet ito sa kanya at inilapit sa bibig niya ang straw sa orange juice na iniinuman naman talaga niya.

Matapos kasi niyang mamili ng mga bagong damit at sapatos, niyaya muna siya ni Oliver na kumain muna sa Shakey's. Natuklasan niya na paborito rin pala nito ang pizza. Bigla tuloy niyang na-miss si GB habang kumakain siya. Kapag nagba-bonding kasi sila ay palaging pizza ang kanilang pinagsasaluhan.

"Bakit ba naisipan mong mag-shopping?" malamig pa ring tanong nito habang bitbit ang pitong plastic bag.

Hindi niya napigilan ang mangiti dahil hindi siya nito hinayaang magbitbit. Para tuloy kinilig siya sa gesture ni GB. Pakiramdam kasi niya'y itinuturing siya nitong prinsesa.

Bigla lang siyang natigilan nang maisip niyang gentleman naman talaga si GB. Lagi nga itong nakaalalay sa kanya pero hindi niya iyon napapansin. Ngayon lang.

Dahil sa'yo, iyon sana ang gusto niyang isagot sa tanong ni GB. Ayaw na kasi niyang balikan ang inis na naramdaman nu'ng makita niyang nakayakap ang babaeng iyon kay GB. "Nasa mood lang akong gumastos,"wika niya sabay hagikgik nang nasa loob na sila ng Space Wagon pero wala pa ring nababago sa hitsura nito.

"Nasa mood gumastos o nasa mood na iwasan ako?" sarkastikong tanong nito sa kanya.

"I'm sorry," sabi na lang niya pagkaraan.

"You should be," inis niyang sabi sa kanya pero kahit naka-start na ang sasakyan, hindi pa rin nito nagawang paandarin iyon. Nanatili lang nakatingin si GB sa daan. "Masyado mo ako pinag-alala."

"Sobra kasi akong nahiya sa'yo."

"Narinig mo ba 'yang sinabi mo, Hanna Marie?" Nang hindi siya kumibo, muli itong nagsalita. "Bestfriend mo ako. Six years old pa lang tayo, magkakilala na pero nahiya ka pa sa akin."

"Sobra naman kasing nakakadiri ang hinihingi kong birthday gift sa'yo. Parang hindi ako nag-isip." Nakangiwi pa niyang sabi pagkaraan.

He laughed.

Dapat makaramdam siya ng kasiyahan dahil parang balewala na rito ang nangyari pero para pa ring may kumurot sa kanyang puso. Para kasing sinasabi nu'n na balewala siya rito bilang babae. Kunsabagay, hindi niya ito masisisi kung one of the boys din ang tingin nito sa kanya dahil puro maluluwag na t-shirt at puruntong short ang madalas niyang isuot pa ang madalas niyang isuot kapag nasa bahay. Kung aalis naman siya'y t-shirt, maong pants at rubber shoes ang kanyang suot.

"Kalimutan mo na 'yon."

"Talaga," mariin niyang sabi. "Kung pwede nga lang ma-delete sa memory natin ang eksenang iyon, idi-delete ko na."

"Ayaw mo na akong maging tatay ng anak mo?" nanunudyong tanong nito sa kanya.

Shucks, bulalas niya ng bigla itong lumingon sa kanya. Kung kanina kasing naka-sideview ito at madilim na madilim ang mukha'y ang guwapu-guwapo na nito sa kanyang paningin, ngayong humarap ito sa kanya at ngumiti nang pagkatamis-tamis, anghel na ang tingin niya rito. Maamo naman kasi talaga mukha ni GB.

"A-ayoko na," sabi niya kahit na ang gusto naman niya talagang sabihin ay 'gustung-gusto niya'. Tiyak kasi niyang kapag ang mga salitang iyon ang ibubulalas niya ay may tendensiya na masira ng tuluyan ang kanilang pagkakaibigan. "Naisip ko kasing bakit ba kita gagawing ama ng anak ko kung pwede namang ninong na lang."

"Damn," buwisit na sabi ni GB saka pinaharurot ang sasakyan.