Kabaklaan 3

HABANG naglalakad si Wella palabas ng kanto ay hindi maiiwasang may mga kalalakihang manukso sa kanya. Kumekendeng-kendeng siyang naglalakad sa eskinita ng kanilang barangay na ani mo'y beauty queen na wala namang beauty.

Sipol doon, sipol dito, sabay sabing, "Sexy! Wampibti!"

Iyan ang mga naririnig niya sa kanyang pagrampa. Pero kiber ang bakla, diretso pa rin ang hada kahit hindi naman kagandahang tingnan sa full-pack make up niya.

"Ay! Ganda yarn? Sa'n ka na naman haharot, 'te? May booking ka?" salubong na tanong ni Ava nang matanaw siya nito sa kalsada.

"Maghahanap ng trabaho. Wala na kasi akong pambili ng panty liner ko," seryosong wika ni Wella.

Hagalpak naman ng tawa ang kaibigan sa sinabing dahilan niya. "Bakla, anong gagawin mo sa panty liner? Itatapal sa santol mong kumakalembang? Wala kang merlat kaya huwag kang mangarap na may tatapalan kang butas."

Tumalim ang tingin ni Wella sa kaibigan, "Hoy! Baklang pinaglihi sa posporong sunog! Para sabihin ko iyo, may merlat ako!" may kompiyansang wika nito sa kaibigan.

"At nasaan, patingin?!"

"Sa... sa likod," tugon ni Wella na hindi sigurado sa sagot. Lalo pa tuloy siyang tinawanan ng kaibigan sa naisip niyang dahilan. Bakit ba naman kasi nasa likod ang merlat na sinasabi niya?

"Aling merlat? 'Yong umuutot?" tanong ni Ava at mas lalo pang nilaksan ang tawa na wari'y nanadyang maimbyerna ang kaibigan.

"Tse! Palibhasa, 'yang merlat mo, isang tapikan na lang lumalabas na agad ang jerbaks!" Hindi talaga siya titigilan ni Ava sa pang-i-imbyerna nito kaya minabuti na lang niyang iwasan sa halip na patulan.

Alam kasi niyang masasayang lang ang oras niya kapag kinausap pa niya ito. "Bakla, pasalubungan mo na lang ako ng boylet. 'Yong mabibilaukan ako sa laki ng... alam mo na!" At talagang nagbilin pa ito sa kanya.

"Oo, bibigyan kita. 'Yong sisiguraduhin kong hindi lang lalamunan mo ang dudurugin. Pati apdo mo, wasak. Baklang 'to!" bawi ni Wella sa kaibigan.

"Bet ko 'yon! Sige, bakla! Ingat!" Matapos ang chickahang naganap sa pagitan ng dalawang baklang magkaibigan, dumiretso na si Wella sa paradahan ng jeep kung saan siya madalas sumakay papuntang bayan.

"Kuya, saan ang next destination ng jeep na ito?" tanong ni Well sa barter ng jeep ngunit laking gulat niya nang humarap sa kanya ang lalaking nakatalikod na tinanong.

"H-Hi! Hindi ba ikaw 'yong..." Halos malaglag ang suot na pantalon ni Wella nang makita kung sino ang lalaking napagtanungan. Iyon ay walang iba kundi ang nagpapatibok ng kanyang imaginary merlat na si Hans.

"Ah... eh... eke nge..." ang maharot na sambit ng baklita dahil alam niya kung ano ang tinutukoy ng binata sa isipan.

"Sorry nga pala sa nangyari. I don't mean it," nakangiting sambit ng binatilyo sa baklitang feel na feel ang paghingi ng paumanhin sa kanya nito.

Sino ba naman kasing hindi kikiligin sa ganoong klaseng binata. Halos lahat ng kababaihan at sangkabaklaan sa kanilang baranggay ay halos malaglag ang panty at panga sa taglay nitong kaguwapuhan. Bukod pa roon, nakakaakit ding tingnan ang bumabakat nitong pagkalalaki. Kumbaga, fitted shirt kasi ang suot nito kaya halos bumakas na ang malapad nitong dibdib at ang nagsusumigaw nitong abs na pakiwari ni Wella ay binati siya ng mga ito nang nakangiti.

Halos maglaway ang baklita sa nakikitang ka-macho-han ng binatilyo. Kulang na lang ay lumuhod ito at lawayan iyon. Pero s'yempre, bilang isa siyang mahinhing bakla, hindi dapat siya magpahalata na kanina pa niya gustong lapain si Hans. Kaya mabilis nitong binawi ang sarili sa nakakalasong pag-iisip at tumingin nang diretso sa binatilyo.

"Wala 'yon. Hindi nemen mesyedeng mesheket?" Wala. Kahit anong pilit niyang hindi maging maharot sa pananalita ay hindi pa rin nita mapigilan ang sarili habang kaharap ang lalaking nagpapatibok ng kanyang imaginary merlat.

"Okay ka lang ba talaga? Bakit gan'yan ka magsalita?" usisa ng binata.

"Oo naman. Okay lang ako." Saglit silang nagkatitigan na mas lalo pang nagpabilis ng tibok ng kaniyang puso. Nakaramdam siya ng pagpapawis ng kili-kili sa kaba dahil noon lang talaga niya nasilayan ang magkalaglag panty na kaguwapuhan ni Hans. "S-Sige, aalis na ako." Mabilis niyang iniwas ang kanyang tingin sa binata dahil baka hindi na niya mapigilan ang sarili at luhuran niya ito.

Jusko! Hindi pa siya p'wedeng magpakarupok. Marami pa siyang pangarap sa buhay. Plano pa pa niyang maging reyna ng sangkabaklaan at ipakalat sa buong mundo ang rainbow colors. Pero paano niya magagawa iyon kung may Hans na pipigil sa kaniya?

"Hoy, bakla! Sasakay ka ba o ano? Isa na lang ang kulang!" sigaw sa kaniya ng dispatcher at nagising siya sa katotohanang mag-isa na nga lang siya dahil wala na sa harap niya si Hans.

"Kuya, for your information, hindi ako bakla?" Halos mawala ang itim sa kaniyang mga mata sa pag-irap niya sa lalaking amoy araw na at iisa lang ang ngipin sa harap.

"Eh, ano ka?" tanong sa kaniya nito.

"Ako ay isang..." Umikot muna siya na parang turumpo sabay sabing "Dyosa!" nang humarap sa dispatcher. Napatawa naman ang mamang kausap.

"Hoy! Wala pa akong nakikitang Dyosa na kasing pangit mo!" Imbyerna ang Wella. Tawagin ba naman siyang pangit ng mas pangit pa sa kaniya.

"Kung ako, pangit, ano ang tawag mo sa sarili mo?" nakataas ang isang kilay niyang wika. Hindi niya mapapalagpas ang sinabi ng lalaking iyon sa kaniya.

"Sa guwapo kong 'to, maraming nagsasabi sa akin na kamukha ko raw si Paulo Avelino," may kompiyansang saad ng lalaki habang hinihimas ang kaniyang baba na wari mo'y nagpapa-cute.

Binigyan niya ng nakaririmarim na ngiti ang lalaki. Hinimas niya ang pisngi nito na para bang inaakit. "Oo nga, kamukha mo nga si Paulo."

"Avelino?" ani ng lalaki.

"Paulo Pustiso! Huwag kang mag-ilusyon, kuya. Baka nga mas makinis pa ang p'wet ni Paulo Avelino sa iyo!" wika ni Wella.

"Aba! Bastos 'to, ah!" Akmang sasampalin ng lalaki si Wella pero mabilis na nahawakan ito ng isang lalaki.

"Boss, huwag kang masyadong agresibo. Hindi tama 'yan," saway nito. Lalong tumibok nang mabilis ang puso ni Wella nang makita kung sino ang lalaking nagligtas sa kaniya nang muntik nang dumapo sa kanyang mukha ang makalyong palad ng lalalaki.

"H-Hans?"

Bongga! Kahit walang merlat, feeling naman niya ay naka-jackpot siya noong mga oras na iyon. Taob ngayon sina Catriona at Pia sa taglay niyang ganda.