Chapter 89

“D-Drake? Nay Myrna?” pagtawag ko sa dalawang tao na nakatalikod sa akin.

Marahan naman silang bumaling at tumingin sa akin, tapos ay pareho pang ngumiti.

“Magiging okay rin ang lahat, Ali…” mahinahong saad ni Drake.

“Hindi ba’t sinabi ko sa ’yo na hindi kita iiwan hangga’t hindi ko nakikilala ang lalaking magmamahal at magbibigay ng pamilya sa ’yo? Hindi natin masasabi ang mangyayari sa hinaharap, anak, pero iyong taong sasamahan ka habang buhay ay kasama mo na. Kapag may nawala… may bagong darating…”

Naguluhan ako sa sinabi ni Nay Myrna. Tapos ay may namuong luha sa mga mata ko nang makita na unti-unti silang maglaho.

“Drake! N-Nay—” agad kong iminulat ang mga mata ko at unang bumungad sa akin ang kulay puting kisame.

“Ali, okay ka lang?” napalingon ako kay Ate Gigi nang itanong niya iyon, nagmamadali pa siyang tumayo mula sa sofa tapos ay lumapit sa akin.

“A-Ate…” malungkot na saad ko.