CHAPTER 03

CHAPTER 03

" Paano ako nakakasigurong tutupad kayo sa usapan? " tanong ni Sebastian sa kaniyang Lolo Pio na lalong lumaki ang ngiti sa labi sa naging sagot niya. 

" Malalaman mo kapag kinasal na kayo, " tugon ni Lolo Pio saka naglakad pabalik sa upuan ng kaniyang apo. " Sebastian, may isang salita ang lolo. Kailan man ay hindi ko nagagawang hindi tumupad sa usapan. "

Hindi kumibo si Sebastian at nanatili ang mga tingin sa marriage contract na hawak ng kaniyang lolo. Pakiramdam niya ay pinaglalaruan siya dahil wala pa mang isang linggo ang kasambahay na ito sa kaniya, nakagawa na ito agad ng isang malaking pagkakamali na pati siya ay nadamay. 

" Hindi ba talaga kayo makakapaghintay na makapag asawa ako? " hindi maiwasang itanong ni Sebastian dahil halos araw-araw, palaging pinapaalala sakaniya ang pagkakaroon ng kasintahan at pag aasawa. Noon ay hindi naman niya ito pinapansin dahil alam niyang titigil din ang lolo Pio niya sa ginagawa nito pero nagkamali siya dahil umabot na sa puntong may mga babae ng ipinapakilala sakaniya at ang malala, kumuha na rin ito ng marriage contract para sakaniya na kahit anong punit niya, wala ring kwenta dahil marami itong kopya. 

" Paano ka mag aasawa kung puro trabaho ang inaatupag mo, Sebastian? Matanda ka na hijo. "

" Thirty years old pa lang ho ako. "

" Aba, matanda na 'yon. Baka di mo alam na taon-taon ay nadadagdagan ang mga edad natin, pero nababawasan naman ang kakayahan nating mag bigay ng lahi, " katwiran nito. " Hihintayin mo bang hindi na tumayo 'yan bago ka makapagpasyang mag-asawa? "

" Lolo—"

" Ikaw na lang ang pag-asa ng Martinez na magtutuloy ng lahi natin. Ako ay gustuhin ko mang magkaroon pa ng anak pero wala na ang lola mo at di na kaya ng balakang ko " dagdag pa ni Lolo Pio saka hinimas-himas ang likurang bahagi ng katawan. " Ang iyong ama naman ay hindi na rin kaya. Ikaw na lang ang nag iisang lalake sa mga apo ko na nakaupo sa trono at reyna na lang ang kailangan mo upang magtuloy-tuloy ang lahi natin at maging masagana ang ating kaharian. "

Napahawak sa sentido si Sebastian dahil sa kahihiyan. Kakaibang imahinasyon talaga ang mayroon ito na ipinagpapasalamat niyang hindi niya namana. 

" Isang linggo. Bigyan niyo ako ng isang linggo para mapag isipan ang bagay na 'to. "

" Hindi ito business proposal para mag isip ka ng ganoon katagal. " Tumayo ito at umalis sa mesa ng kaniyang apo. " Isang araw lang ay sapat na kaya bukas ng umaga, umaasa akong may sagot ka na. "

" What the heck? Bakit bukas agad? "

" Aba, huwag mo akong mamura-mura, Sebastian! " gamit ang hawak nitong tungkod, tinangka nitong paluin ang apo na mabilis nakailag sa kaniya. " Ilang taon na akong naghihintay baka akala mo? "

" Tsk, masyadong mabilis ang araw—"

" Iyon nga ang punto ko. Mabilis lang lumipas ang araw kaya mag desisyon ka na. Iyang isang linggo mo na 'yan ay posibleng umabot ng isang buwan kaya mamayang gabi, pag isipan mo na nang maagi. " Lumapit si Lolo Pio sa kaniyang apo saka tinapik ang balikat nito. " Sebastian, huwag mo sanang bibiguin ang lolo. "

Isang malalim na buntong hininga lamang ang pinawalan ni Sebastian dahil kung magsasalita pa siya, paniguradong hahaba pa lalo ang kanilang diskusyon. 

***

" Isa, dalawa, tatlo! " sabay na ibinalibag nina Estrella at Anna ang makapal na kumot sa sampayan matapos banggitin ang napagkasunduang bilang. Inayos nila ang pagkakasabit nito sa sampayan saka piniga ang magkabilang dulo ng kumot dahilan para lumabas ang mga naipong tubig sa loob. 

" Grabe, hindi ko akalaing ganito kabibigat ang mga kumot nila dito, " ani Estrella saka pinunasan ang pawis sa sentido niya. " Ang kumot na ginagamit namin sa probinsiya ay sobrang nipis lang kaya madaling labhan at mabilis din matuyo. "

" Ganito talaga kumot ng mga mayayaman. Sa sobrang kapal, kailangan may katulong ka pa sa pagsampay dahil napakabigat lalo na kapag di pa napipiga, " tugon naman ni Anna. " Ewan ko ba kay sir, linggo-linggo nagpapalit ng kumot, bed sheet at pillowcase. Ako sa totoo lang, dalawa hanggang tatlong linggo pa ang kailangan lumipas bago ko mapag desisyunang magpalit ng higaan. "

" Ganoon rin ako, Anna. Aksayado kasi sa tubig at sabon kung linggo-linggo magpapalit ako ng sapin sa higaan, pero palagi ko namang pinapagpag ang gamit ko para siguradong hindi pugaran ng mga surot. "

" Totoo, sobrang aksayado sa sabon kung linggo-linggo ngang kasama sa paglalaba ang mga sapin natin sa higaan, " pagsang-ayon nito saka kinuha ang basket na pinaglagyan nila ng mga sampayin. " Pero siyempre wala naman tayong magagawa kung ito ang gusto ng amo natin. Masyado kasing OC si sir Sebastian kaya intindihin na lang natin. "

" OC? Anong ibig sabihin no'n? "

" OC, kumbaga sobrang linis niya sa gamit. Ayaw ng magulo, gusto laging nasa ayos ang lahat, " paliwanag ni Anna, " Basta, napaka sinop ni sir Sebastian. Ayaw niyang makakakita ng mga alikabok lalo na sa gamit niya. Madaling uminit ang ulo. "

Napatango na lamang si Estrella habang pino-proseso sa isip ang narinig niya. Hindi rin niya gusto ang magulo at makalat na paligid pero hindi siya masinop sa gamit. 

" Estrella. " Napahinto ang dalawa sa paglalakad nang humarang si Manang Susan sa harapan nila. " Gusto kang makausap saglit ni sir Pio. Naroon siya sa sa garden, puntahan mo. "

" Po? Bakit raw po? " tanong ni Estrella pero isang kibit balikat lang ang tinugon ni Manang Susan sakaniya.

" Sige na puntahan mo na si sir Pio, ako na ang bahala rito, " ani Anna kaya walang nagawa si Estrella kundi ang pumunta sa hardin kung saan naghihintay sakaniya ang matandang may matamis na ngiti nang makita siya.

" Sir Pio, pinapatawag niyo raw po ako. May ipagagawa ho ba kayo? " tanong ni Estrella. 

" Huwag ka ng maging pormal saakin, Estrella. Darating ang araw na lolo Pio na ang itatawag mo saakin, " anito saka siya inanyayahang maupo sa kabilang silya. " Gusto lamang kitang makita at kumustahin. Nais ko ring malaman kung anong masasabi mo sa trabahong binigay ko sa'yo. "

" Sobra ho akong nagpapasalamat sainyo, " agad na wika ni Estrella, " Masaya po ako sa trabahong binigay n'yo saakin. Mababait po ang mga kasambahay dito at madali po silang pakisamahan kaya sigurado ho akong walang magiging problema sa hinaharap. "

Bahagya itong natawa. " Ano namang ibig mong sabihin sa bagay na 'yan? "

" Ang alin po? "

" Iyong sinabi mong walang magiging problema sa hinaharap? "

" Ah, iyon po ba? Ang ibig ko pong iparating ay hindi po ako aalis dito kahit na anong mangyari. Hindi bali na pong masungit ang amo ko, mabait naman ang mga kasama ko kaya sigurado ho akong magtatagal ako dito. "

Lalong lumaki ang ngisi sa mukha ng matanda saka sumandal sa silyang inuupan nito. 

" Suplado nga ang apo ko pero mabait na tao 'yan, Este. Nasisiguro ko sayo ang bagay na 'yon. "

" Ah, opo alam ko naman pong mabait si sir Sebastian. Siguro nasakto lang na mainit ang ulo niya kanina kaya nasungitan ho ako, " ani Estrella habang nagkakamot sa ulo niya. Gusto niyang bawiin ang sinabi niya kanina dahil nawala sa kaniyang isip na lolo ng amo niya ang kausap niya.

" Anyway, mayroon sana akong gustong itanong patungkol sa personal mong buhay kung ayos lang? Maliiit na detalye lang naman. "

" Ayos lang po, wala pong problema, " agad na tugon ni Estrella na kinatuwa ni Lolo Pio. 

" Ikaw ba ay may kasintahan ka na? "

" Wala po akong nobyo. "

" Maari ko bang malaan kung bakit? "

" Hindi ko pa po masyadong iniisip ang bagay na 'yon. Gusto kong mai-ahon muna sa kahirapan ang lola at lolo ko bago ho ako mag desisyon na magkaroon ng nobyo. "

Tumango-tango ito. " Kung ganoon, mas gusto mo munang tulungan ang lolo't lola mo bago ka pumasok sa isang relasyon. "

" Ganoon na nga po. Tsaka hindi po ba nabanggit ko na sainyo ang tungkol sa kalagayan ngayon ng lolo ko? " ani Estrella, " Ayon po, kailangan ko lalong mag doble kayod para sa kanila. Ayos lang po saakin na hindi muna magkaroon ng karelasyon dahil hindi naman po ako nagmamadali. Sina lola at lolo muna ang prayoridad ko para panatag ang loob ko. "

Umalis sa pagkakasandal si Lolo Pio nang makahanap ng tamang bwelo. 

" Paano kung sabihin kong ako na ang bahala sa mga gastusin ng iyong lolo sa ospital? Papayag ka? "

Nagsalubong ang kilay ni Estrella. " Bakit niyo ho 'yon gagawin? "

" Hmm, sabihin na nating magaan ang loob ko sayo at kagaya nga ng sabi mo kanina, wala akong nakikitang problema sayo sa hinaharap, " ani Lolo Pio saka ibinaba sa mesa ang folder na hawak niya mula pa kanina. " Ikaw ang babaeng napili ko para ituloy ang henerasyon ng mga Martinez. "

Bumaba ang tingin ni Estrella sa folder na ibinaba sa harap niya. Hirap siyang basahin ang nakasulat kaya tinanong na lamang niya. 

" Tungkol ho ba saan ito sir Pio? Hindi ko ho kasi maintindihan ang gusto niyong iparating saakin, " nahihiyang sabi ni Estrella saka binalik ang tingin sa folder. " Alam niyo naman po, hirap akong magbasa kaya pasenya na po kung di ko mabasa ang--"

" Ikaw ang babaeng napili ko para ipakasal sa aking apo. "

Katahimikan. 

" Po? A-ano hong kasal? Hindi po ako kasal sa apo n'yo. "

Nagpakawala ito nang mahinang tawa. " Alam ko dahil mangyayari pa lang ang bagay na 'yon kung papayag kang pakasalan ang aking apo na si Sebastian. "

" Si sir Sebastian? B-bakit po? Bakit po ako? " doon lang nag rehistro ang lahat kay Estrella kaya hindi niya maitago ang pagkataranta. " Sir Pio, hindi po kami magkasintahan ng apo niyo kaya wala pong dahilan para ipakasal niyo kami pareho. "

" Alam ko naman 'yon pero kailangan na kasi niyang makasal dahil matanda na si Sebastian. Ayokong umabot sa punto na tumanda siyang binata. Sayang ang lahi naming Martinez kung hindi niya gagamitin. " Bumuntong hininga ito upang ipakita ang pagkadismayado. " Wala siyang oras maghanap ng nobya o mapapangasawa dahil tutok na tutok siya sa trabaho. Sa katunayan, ako na nga ang gumagawa ng paraan para magkaroon siya ng kasintahan pero nasasayang lang dahil napaka pihikan ng apo ko. Magaganda naman ang mga babaeng ipinakikilala ko sakaniya pero wala pa rin siyang interes. Hindi ko nga malaan kung babae o lalake ba ang tipo. "

Napangiwi si Estrella. " Ganoon ho ba? "

" Oo ganoon nga at ako'y pagod na rin kahihintay magkaroon ng pangalan at pirma ang marriage contract na ito dahil wala talaga siyang balak asikasuhin ito. " Itinuro ni Lolo Pio ang folder na nasa harap nila. " Pero tadhana na ang kumilos dahil sa maniwala ka man o sa hindi, pangalan mo ang nakalagay dito. "

Nanlaki ang mata ni Estrella. " Po? Paano pong nangyari 'yon? "

" Aba'y hindi ko alam. Sulat at pirma mo ito kaya wala akong kinalaman diyan. " Binuksan nito ang folder at doon nakita ni Estrella ang pangalan at pirma niya sa isang bahagi ng papel. " Ngayon tatanungin ulit kita, papayag ka bang pakasalan ang apo ko kapalit ng pagtulong ko sa lolo't lola mo? Lahat ng gagastusin, h'wag mo ng alalahanin dahil ako na ang bahala doon. "

Katahimikan. 

" Ayos lang kung hindi mo pa alam ang sagot. Bibigyan kita ng isang araw para pag isipan—"

" Payag na po ako. " Huminga  nang malalim si Estrella. " Payag po akong pakasalan ang apo niyo. "

Gulat ngunit isang malaking ngiti ang gumuhit sa mukha ni Lolo Pio matapos marinig ang desisyon ng dalaga sa harap niya. Hindi inaasahan na magiging mabilis ang sagot niyo pero kakaibang tuwa naman sakaniya ang dala nito. 

" Masaya akong marinig 'yan pero gusto ko lang din ipaalam sayo na wala ng atrasan ang kasunduang ito. Hindi laro ang papasukin mo, Estrella kaya naman umaasa akong seryoso ka sa tugon mo ngayon saakin, hija. "

" Seryoso po ako sa naging sagot ko sainyo. Hindi po ba't pakakasalan ko lang naman ang inyong apo at tutulungan niyo naman po ako sa mga bayarin sa ospital ng aking lolo? Naiintindihan ko po ang papasukin ko, sir Pio, " ani Estrella. " Pero gusto ko lang pong itanong kung hanggang kailan po ito? "

Nagsalubong ang kilay ni Lolo Pio. " Hanggang kailan ang alin? "

" Ito pong kasunduan. Halimbawa pong  kinasal na po kami ni sir Sebastian, tutulungan niyo pa rin po ba ang lolo at lolo ko? "

" Tuloy-tuloy ang pagtulong na gagawin ko sakanila at huwag kang mag alala, ako na ang bahala sa kanila. Ang isipin mo na lang ngayon, kung paano mo paghahandaan ang buhay mag-asawa dahil sa susunod na buwan, hindi ka na kasambahay dito, isa ka ng Maybahay. "

---