Art of Destiny XCIII

KITANG-KITA ni Naikkah sa mga mata ni Juno ang sinseridad sa mga sinasabi nito. Halos pautal-utal nga ito kung magsalita na hindi niya maintindihan kung nahihiya lang ito o kinakabahan.

Alam niyang mas bata sa kaniya ng halos limang taon si Juno at mas marami pang babae ang maaring pumasok sa buhay ng binata. Gayunpaman, paano niya ba tatanggihan ang alok na pag-ibig nito? Mag-iinarte pa ba siya gayong alam niyang seryuso ang binata sa nararamdaman nito para sa kaniya.

"Pero alam mo namang buntis ako di'ba Juno? Matatanggap mo ba ang mga consequences kapag nalaman ng mga taong ang pakakasalan mo ay isa nang buntis?" Iyon ang naisip niyang itanong dahil baka nabibigla lang ito sa napiling desisyon. Sumagi sa isip niya baka naging padalus-dalos ang plano nitong pakasalan siya at sa huli ay maiiwan na naman siyang umaasa at mag-isa.

'Aba! Kung magkakataon ay si Juno ang ikatlong lalaki sa buhay na iiwan sa kaniya pagkatapos ng masasayang ala-ala na buuuhin pa lamang nila nang magkasama.'